18 "आंय तुमाआं आखाआ बाप्तिम नाहां कोतू; जियांहां मी निवड़ीत लेदेहे, तियांहां आंय ओलखोहो; पोन ओं याअकाजे होये के पवित्र शास्राआ ओं वसन पुरो ओवे, ‘जिवेज रोटू आप्यू आन जिवोहोज देनो उठ्यो.’ 19 ओमे तो ओवीइलोअ पेल आंय तुमुहूं कोत मेकोहो, के जेहेलाम ओं ओवे तेहेलाम तुमू विश्वास कोआ के ‘आंय जो होय तोज होंव.’ 20 आंय तुमुहूं खोरीज कोहो के जो मी मोकल्योहो तियाहा स्विकार कोअहे, तो माहूं स्विकार कोअहे; आन जो माहूं स्विकार कोअहे, तो माहूं मोकलीइनाराआ स्विकार कोअहे."
ईसुउ तोआइलोअ सौंसू
21 ए गोठी कोत कोइत ईसु आत्मामेहें दुखी ओवू आन ए साक्शी आप्यी, "आंय तुमुहूं खोरीज कोहो, के तुमामेर्युउ एक जोउं माहूं धोकू देत तोआडे."
22 ताहां तियाआ सेला एकान बिहीराअहें पाला वोल्या आन विसारोमेहें पोड़्या, के तो कोडाअ बाप्तिमेहें कोहे. 23 सेलामेर्युउ एक जोऊँ जियापोअ ईसु मेर कोअतुतो, ईसुउ एकी वोगेहे ओंणाइत बोठुतो. 24 ताहां शिमोन पेत्रे तियाहा इशारु कोअयून फुशो, "कोडाअ बाप्तिमेहें कोत्लू तों आमुहूं को एहें कोत फुसेए?"
25 ताहां तिये तेहेंज कोइत ईसुउ सातीइहें ओंणाइत तियाहा फुशो, "प्रभु, तो कोडू होये?"
26 ईसु उत्तर आप्यो, "ओ रोटाअ कुटकू आंय वाटकामेहें जियाहा पिगवीत कोइत आपीहीं तोज होये." आन तिये कुटकू पिगवीत कोइत शिमोन इस्कार्योतोअ बेटाह्हा यहुदाहा आप्यू. 27 जेहेंज रोटाअ कुटकू आथम लेदू तेहेंज सैतान तियामेहें फोहीत गोयू, ताहरुउ ईसु तियाहा कोयो, "तू जों कोअहे, तों तु ताबुड़ कोअ." 28 पोन आरीवाला बोहनाराहां कोडाहाज ने समजाअयो के ईसु ए गोठ तियाहा किहाअ काजे कोयी. 29 यहुदा पोअ खोत्ली रोतीते, तियाहा काजे थोड़ाक सेलाहां ओं समजाअयो के ईसु तियाहा कोहे के जों किबी आपुहूं तिवारोअ काजे जोवनारोहो तों वेसातो लेत्ले, नेते एहेलोह के गोरब्योहों वाजिहीं आपी दे. 30 तियाहा काजे यहुदे रोटाअ कुटकू लेत कोइत ताबुड़ बारथे जातु रोयू; आन ते रातीइ वेल ओती.