1 जेहेलाम फरिसी ओं उनाअया के ईसु योहानोअ रोत वादार सेला बोणावेहे आन तियांहां बाप्तिस्मा आपेहे. 2 खोरीज, ईसु सोताहा नाहां पोन तियाआ सेला बाप्तिस्मा आपताते. 3 जेहेलाम ईसु ओं उनाअयू, ताहां तो यहुदीयाहा सोड़ीत कोइत वापिस गालीलोम जातु रोयू, 4 यी फेरे तियाहा शोमरोनोमेहें रोत जाअहूं पोडनारो ओत्लो.

5 तियाहा काजे तो सुखार नावोअ शोमरोनोअ एका होयरोमेहें आवयू, ओं होयर तिया खेतोअ आहने ओतो, जियाहा याकोबे तियाआ पोर्‍या योसेफोहो आप्योतो; 6 आन याकोबोअ वेए बी तिहींज ओती. आन ईसु वाटे साली सालीइ थाकलुज तियी वेईइ जागे आवित बोहीत गोयू. ए गोठ दिहेए वेले ओवी.

7 तेताजमेहें तिहीं एक शोमरोनोवाली बाय पाईं पोइ आयी. ईसु तियीही कोयो, "माहूं पाईं पीइहूं आपा." 8 तियाआ सेला रोटू वेसातू लेअलाअ काजे गांवोंमेहें गोया.

9 तियी शोमरोनोवाली बायी तियाहा कोयो, "तुमू यहुदी होय आन आंय शोमरोनोअ होय, तेबी तुमू मापोअ पीइलोअ काजे पाईं काहा मागतेहे?" काहाके यहुदी तोम शोमरोन वालाअरी कोड्लोज सबंध ने मेकतेते.

10 ईसु उत्तर आप्यो, "जर तू देवोअ वरदान की होय तो जांअती, आन ओं बी जांअती, के जो ताहूं कोहे, ‘माहूं पाईं पीइहूं आप,’ तो कोडू होये, ताहां तू तियापोअ मागती, आन तो ताहूं जिवनोअ पाईं आपतू."

11 तियी बोईं तियाहा कोयो, "प्रभु, तुमापोअ कोड्लोज बासन कायनाहां, आन वेए तोम जाअखीलीही उंडी होये; ताहां तुमापोअ जिवनोअ पाईं का रोत रोनारो? 12 केहें तू आमाआं आब्हा याकोबोअ रोत वोडू होये, जिये सोताहा आमुहूं ए वेए आप्यीही; तो आन तियाआ पोर्‍ये, आन तियाआ बोकड़ेन डोगरे इंहीं रोत पाईं पितेते?"

13 ईसु तियीही उत्तर आप्यो, "जो कोडो ओं पाईं पिये तियाहा फाश्यी तोरह लागे, 14 पोन जो कोडो तिया पाअयोंमेहें रोत पिये जो आंय तियाहा आपिहीं, तो फाशोअ केदीहींज तोरह्‍यो ने रोये; पोन जो पाईं आंय तियाहा आपिहीं, तो तियामेहें एक उकलू बोणीत जाये, जो हादाजल्म्याअ जिवनोअ काजे निहीया कोए."

15 बायी तियाहा कोयो, "प्रभु, तो पाईं माहूं आपेए, काहाके माहूं तोरह ने लागुहूं जोवे आन ने पाईं पोई एवडी सेटे आवुहूं पोड़े."

16 ईसु तियीही कोयो, "जा, आन ताआ माट्योहो हादीत लेत वापिस आव."

17 तियी बायी कोयो, "माआं कोड्लूज माटी कायनाहां."

ईसु कोयो, "तू कोहे के, ‘माआं माटी कायनाहां,’ ताहां ओं तू बोराबर कोहे. 18 काहाके ताआ पास माटी ओता, आन ओमे तू जिया माट्योअरी जिवेहे, तो बी ताआ माटी कायनाहां. तियाहा काजे तुमे जो कोयोहो तो खोरो कोयोहो."

19 तियी बोईं तियाहा कोयो, "साहीब, माहूं लागेहे के तुमू भविश्यवक्ता होये. 20 आमाआं वेगाअ डायहां याज डोगो पोअ देवोअ आराधना कोअयिही, पोन तुमू यहुदी कोतेहे के येरुसालेमुज आराधनाआ कोइलोअ जागू होये."

21 ईसु तियीही कोयो, "ए बाय, माआं गोठीइ विश्वास कोअ के ते वेल आवेहे के तुमू ने डोगोपोअ आब्हाअ आराधना कोअहा, ने येरुसालेमो मेहें. 22 तुमू शोमरोनोअ माअहें जियाहा नाहां ओलखीइते, तियाआ आराधना कोअतेहे; पोन आमू यहुदी जियाहा ओलखीइतेहे तियाआ आराधना कोअतेहे; काहाके तारण यहुदीमेहें रोतुज होय. 23 पोन ते वेल आवेहे, आन आवतीज लागीही, जाहां खोरे भक्ते आब्हाअ आराधना आत्मा आन खोरा मोनो वाअहीं कोअनारे, देव आब्हू एहेलाहाज भक्तोहों होदेहे. 24 देव आत्मा होय, आन ओं जोवयोज के तियाआ आराधना कोअनारे आत्मा आन खोरा मोनो वाअहीं तियाआ आराधना कोअहूं जोवे."

25 तियी बोईं ईसुहू कोयो, "माहूं मुंदू होये के मसीहा जो आवनारु होय; तो जेहेलाम आवे, तेहेलाम आमुहूं आखी गोठी समजाड़ी देये."

26 ईसु तियीही कोयो, "आंय जो ताअरी गोठी कोअहो, तो आंय तोज होये."

27 तेताजमेहें ईसुउ सेला तिहीं वापिस आवित लागा, आन ते ओं देखीत कोइत हुदाअलीज एहेलाहा बोगलाअया के तो एकी बोईंइरी गोठी कोअहे; पोन कोडेज तियाहा किन्ने कोयो, के "ताहूं यी बोईंइरी की लेणो-देणो?" नेते "तू यीइरी काहा गोगेहे?"

28 ताहरीइ ते बोयोंअ तियीइ पाईं पोइलाआ डोसरो तिहींज टाकी देत होयरोम वोलीत गोयी, आन माअहोंहों कोनी वोल्यी, 29 "आवा आन पाला, एक एहेलोहो माहुंउं होये, जिये आंय जो किबी कोअयोहो तो आखो कोत देदोहो. केहें तोज ख्रिस्त ओत सेकेहे के?" 30 यी गोठी वाअहीं माअहें होयर सोड़ीत ईसुउ जागे जात पोते.

31 तेहेलाजमेहें ईसुउ सेलहां तियाहा रावणी कोअताते, "ए गुरु, वाहींक ते खात ले."

32 पोन ईसु तियांहां कोयो, "मापोअ खाअलाअ काजे एहेलुहू रोटू होये जियाअ बाप्तिम तुमू नाहां जांअता."

33 इंहीं वाअहीं सेला तियां तियांआंज एकानेकाहा फुसा वोल्या, "एखू याअ काजे खाअलोअ लेतायोय के?"

34 ईसु तियांहां कोयो, "माआं रोटू ओ होये के आंय माहूं मोकलीइनाराआ ईश्शाआ पुरमाणे सालो आन तिये होपल्यो काम पुरो कोओ. 35 तुमू कोताहा के ‘शार मोयना फाश्याआ होय, ताहां कामाय आवे.’ पाला, आंय तुमुहूं कोहो, वारुहूं खेतोअहें पाला, ओन पाकीत गोयोहो आन वाडीइलाअ काजे तियार होये. 36 वाड्नारु मोजरी मेलवेहे आन हादाजल्म्याआं जिवनोअ काजे फल हाटवेहे, काहाके पेएनारु आन वाड्नारु बेनू मिलीत खुस रोअहूं जोवे. 37 काहाके यी जागेहे ए काईं खोरी होये: ‘एक पेएहे आन बिहीरो वाडेहे.’ 38 आंय तुमुहूं तियी कामायीही वाडेतेहें मोकल्याहा जियीपोअ तुमाआं मेहेंनत नाहां लागी: जियीपोअ बिहीरे मेहेंनत कोअयिही आन तियांआं मेहेनतीइ फल तुमुहूं जोड़्योहो."

39 तिया होयरोमेर्‍येए जाअखीलेहे शोमरोनोअ माअहें तियी बायीइ कोल्यावाअहीं ईसुपोअ विश्वास कोअयू; काहाके तियी ए साक्शी आप्यीते: "तिये आक्खोज जों आंय कोअयोहो, तों माहूं कोत देदो." 40 तियाहा काजे जेहेलाम एं शोमरोनोवाले तियाआ जागे आवये, ताहां तियाहा रावणी कोए वोल्ये के आमाआं जागे रुकाआ. ताहरुउ ईसु तिहीं बेन दिही जाआं रोयू.

41 तियाआ वसनोवाअहीं बिहीरे बी जाअखीलेहे माअहें विश्वास कोअयू, 42 आन तियां तियी बायीही कोयो, "ओमे आमू ताआ कोअला वाअहींज विश्वास नाहां कोअते; काहाके आमू सोताहाज उनाइत लेदो, आन समजीत लेदो के ओज हादामक्युज दुन्याअ तारनारु होये."

43 बेन दिहोअ फासाड़ी ईसु तिहीं रोत निहीत कोइत गालीलोम गोयू, 44 काहाके ईसु सोताहाज कोयोतो के, "कोड्लाज भविश्यवक्ताहा सोताआ जागामेहें मानपान नाहां जोड़तू." 45 जेहेलाम तो गालीलोम आयू, ताहां गालील वाले तियाआ स्वागत कोअयो; काहाके जेते कामे तिये येरुसालेमोमेहें वल्हांडणोअ तिवारोअ होमसे कोअयेते, तियां ते आखे कामे देख्येते, काहाके तें बी वल्हांडणोअ तिवारोमेहें सामील ओते.

46 फाशुउ एक वारी ईसु गालीलोअ काना गांवोंमेहें आयू, जिहीं तिये पांअयोंअ दाराक्शाआ रोहो बोणावी देदूतो. कफर्णहुमोमेहें एका राजाआ आधिकार्‍योअ पोर्‍यू बिमार ओतू. 47 जेहेलाम राजाआ आधिकार्‍ये होंबल्यो के यहुदीयामेहें रोत ईसु गालीलोम आयुहू, ताहां तो तियाआ जागे आयू आन रावणी कोअयी के तो कफर्णहूम जात कोइत तियाआ बेटाह्हाहा हाजू कोई दे: जो मोअहूंज ओतू. 48 ईसु तियाहा कोयो, "जाअहूं जाआं तुमू समत्कार आन वोडे वोडे कामे ने देखहा ताअहूं जाआं विश्वास ने कोअहा."

49 राजाआ आधिकार्‍ये कोयो, "मालिख, माआं पोर्‍याआ मोईलोअ पेल तुमू माअहीं साला."

50 ईसु तियाहा कोयो, "जा, ताआ पोर्‍यू जिवतु रोये."

तो माटी ईसुउ कोल्यी गोठी पोअ विश्वास कोअयू आन कोअ जातु रोयू. 51 तो कोअ वोलत्लू, ताहां वाटेज मेहें ओतू तेहेंज तियाआ सेवके तियाहा खोबर आप्यी, "ताआ पोर्‍यू जिवतु होये."

52 तिये तियांहां फुशो, "कोड्ली वेले तो हाजू ओनू वोल्यू?" तियां तियाहा कोयो, "काल दिहे एक वासता तियाआ जोरु उतरीत गोयू." 53 पोर्‍याअ आब्हाहा दिहानोमेहें आयो के ए बोराबर तेज वेल ओती, जाहां ईसु तियाहा कोयोतो, "ताआ पोर्‍यू जिवतु रोये." एहेंकोइत तियाआ पुरा कुटूंबाअरी विश्वासी बोणीत गोयू.

54 ओ दुसरु समत्कार ओतू, जो ईसु यहुदीयाम रोत गालीलोम आवित कोइत देखाड़्यू.