1 तिहींइं फासाड़ी ईसु गालीलोम फिरतू रोयू; काहाके यहुदी तियाहा माइलाअ फासाड़ी लागाते, तियाहा काजे तो यहुदीयामेहें ने जाअहूं ओतू. 2 यहुदीइ मंडपोअ तिवार आहने आवतुतो.✝ 3 तियाहा काजे तियाआ पायहों तियाहा कोयो, "तू ओ जागू सोड़ीत कोइत यहुदीयाम जातु रो, मोन्ज्ये तू कोअहे ओं काम ताआ सेला बी देखीत सेके. 4 काहाके जियाअ नाव गाजाड़ीलाअ इश्शा ओय, तों निकाइत कोइत कामे ने कोअत्लो. जर ओं काम तू कोअहे, ताहां सोताहा आखी दुन्यापोअ प्रगट ओव."

5 काहाके तियाआ पाही बी तियापोअ विश्वास ने कोअताते.

6 ताहां ईसु तियांहां कोयो, "माआं वेल ओमेज नाहांजी आयी, पोन तुमाआं काजे आखी वेल ठीक होये. 7 दुन्या तुमाअरी दुस्मोनी नाहां कोइत सेकती, पोन ते माअरी दुस्मोनी कोअहे, काहाके आंय दुन्याअ विरुद्दाम ए साक्शी आपोहो के तियांआं कामे खाराब होये. 8 या तिवारोम तुमू जावा; आंय नाहां जातु, काहाके माआं काजे बोराबर वेल नाहांजी आयी." 9 तो तियांहां ए गोठी कोत कोइत गालीलोजमेहें थोबीत गोयू.

10 पोन जेहेलाम ईसुउ पाही तिवारोम जाता रोया, ताहां तो बी सामनेज नाहां, पोन निकाईत कोइत गोयू. 11 यहुदी आधिकारी तिवारोमेहें तियाहा ओं कोत कोइत होदा वोल्या, "तो का होये?"

12 आन माहूंमेहें तियाआ बाप्तिम निकाइ निकाईइ डाहटी गोठी ओवी: थोड़ेक कोतेते, "तो हाजू माटी होये." आन थोड़हे कोतेते, "नाहां, तो माहुंहूं ठोगेहे." 13 तेबी यहुदी आधिकार्‍योअ बिके वाअहीं कोडोज तियाआ बाप्तिम जोरे ने गोगतोतो.

14 जेहेलाम तिवारोअ आरदा दिही वितीत गोया; ताहरुउ ईसु मंदिरोम जात कोइत सिकाड़ु वोल्यू. 15 ताहरेए यहुदी बोगलाइत कोइत कोयो, "याहा विण हिक्येज विद्या का रोत आयी?"

16 ईसु तियांहां उत्तर आप्यो, "जों आंय सिकाड़ोहो तों माआं वोलेहे रोत नाहां, पोन तों शिक्शण माहूं मोकलीइनारा देवोअहीं रोत होय. 17 जर एखो देवोअ ईश्शापोअ सालीइलाअ इश्शा कोअतोय, ताहां तो यी हिकवणोअ बाप्तिमेहें जाईंत लेये के ए देवोअहें रोत होय के आंय माआं मोनोअ कोहो. 18 जों सोताआ आधिकारो वाअहीं गोगेहे, तों सोताआ काजे महिमा मेलवुहूं होदेहे; पोन जो तियाहा मोकीलनाराहा महिमा आपुहूं होदेहे, तोज माहुंउं खोरो होये, तियामेहें कोड्लीज खाराबी कायनाहां. 19 केहें मोशे तुमुहूं कायदु नाहां आप्यू? तेबी तुमामेर्‍योअ कोडोज कायदापोअ नाहां सालतो. तुमू काहा माहूं माईंलाअ कोशित कोअताहा?"

20 गर्दी उत्तर आप्यो, "तामेहें सैतान होय, कोडो ताहूं माईलाअ कोशित कोअहे?"

21 ईसु तियांहां उत्तर आप्यो, "आंय एक काम कोअयो, आन तुमू आखे बोगलाअतेहे. 22 तियाहा काजे मोशे तुमुहूं खतना कोइलोअ आदेश आप्युहू, तो मोशेए वोगेहे रोत नाहां, पोन तुमाआं वेगाअ डायहांअहें रोत सालित आयुहू, आन तुमू आरामोअ दिही पोर्‍याआं खतना कोअताहा. 23 जाहां आरामोअ दिही माहुंउं खतना कोअतेहे, काहाके मोशेए कायदाअ आदेश टोलीत ने जाअहूं जोवे, ताहां तुमू मापोअ काहा याअकाजे खोत कोअताहा के आंय आरामोअ दिही एका माहुंउं पुरो हुदारी देदो? 24 सोब पालित न्याय मा कोअहा, पोन खोरु न्याय कोआ."

25 तेहेलाम थोड़ेक येरुसालेमवाले कोने वोल्ये, "जियाहा यहुदी आधिकारी माईंत टाकीइलोअ कोशित कोअताहा तो ओज ना? 26 पोन पाला, तो आखा माहुंउं विसमेहें गोगेहे आन तें माअहें कीज नाहां कोते, केहें यहुदी पुढाऱ्यों खोरीज जाईंत लेदोहो के ओज ख्रिस्त होय? 27 याहा तोम आपू ओलखीइतेहे के ओ काआ होये; पोन ख्रिस्त जेहेलाम आवे ताहां तियाहा कोडोज ने ओलखे के तो का रोत आयुहू."

28 ताहां ईसु मंदिरोमेहें सिकाड़त्लू तेहेलाम आअड़ीत कोयो, "तुमू माहूं ओलखीइतेहे, आन ओ बी जांअतेहे के आंय काआ होये, पोन माहूं मोकलीइनारु खोरु होय, तियाहा तुमू नाहां ओलखीइते. 29 आंय तियाहा ओलखोहो काहाके आंय तियाअहींज रोत होय आन तियेज माहूं मोकल्युहू."

30 ताहरेए ते तियाहा तोइत बांदीइलोअ कोशित कोए वोल्ये, पोन कोडोज बी तियापोअ आथ ने टाकीत सेको, काहाके तियाआ वेल ओमेज ने आवयीते. 31 तेबी गर्दीमेर्‍येए वारुज माअहें तियापोअ विश्वास कोअयू, आन कोने वोल्‍ये, "ख्रिस्त जेहेलाम आवे ताहां केहें यापरोत वादार समत्कार देखाड़े जे ये देखाड़्या?"

32 तें माअहें की गोठी ईसुउ बाप्तिमेहें कोअतेहे, ए फरिसी उनाअया: आन ते आन डाया पुंजारहां नेहें तियाहा तोइत बांदीइलुउ काजे सिपायड़ाहां मोकल्या. 33 ईसु कोयो, "आंय थोड़ीक वाआ जाआं फाशुउ तुमाअरी होये, आन तिहीं रोत वापिस तियाआ जागे जातु रोनारु जिये माहूं मोकल्युहू. 34 तुमू माहूं होदहा, पोन आंय तुमुहूं ने जोड़ो; आन जिहीं आंय होय तिहीं तुमू ने आवित सेकहा."

35 ताहरेए यहुदी तियां तियांआंज कोने वोल्ये, "ओ का जानारु होये के आपू याहा ने होदीत सेको? केहें ओ तियांआं जागे जानारु होये, जे युनानीमेहें आपाआ माअहें वेरासेर ओत कोइत रोतेहे, आन ग्रीक बाशामेहें बी सिकाड़े? 36 ए की गोठ होय जे तिये कोयी, के ‘तुमू माहूं होदहा, पोन आंय ने जोड़ो; आन जिहीं आंय होय, तुमू तिहीं ने आवित सेकहा?’"

37 तिवारोअ आखरीइ दिही, जो मुख्य दिही होय, ईसु उबू रोयू आन आअड़ीत कोइत कोयो, "जर एखू तिहील्यो ओय तो माआं जागे आवुहूं जोवे आन पीइहूं जोवे.✝ 38 जो मापोअ विश्वास मिके, जेहलोहो वसनोमेहें कोयोहो, ‘तियाम रोत जिवनोअ पांअयोंअ खाड्यी वोहीत निहे.’"✝ 39 ईसु ओं आत्माआं बाप्तिमेहें कोयो, जो तियापोअ विश्वास कोअनाराहां जोड़नारु ओतू; काहाके आत्मा ओमे जाआं ने उतर्‍युतो, काहाके ओमे जाआं तियाआ महिमा ने ओवीते.

40 ताहरेए गर्दीमेहें रोत कोडे तेबी ए गोठ्यी उनाइत कोइत कोयो, "हुदाअलीज ओ माटी तो भविश्यवक्तू होये."

41 थोड़ेक माअहें कोयो, "ओज ख्रिस्त होये."

पोन थोड़ाक जोओं कोयो, "गालीलोम रोत ख्रिस्त केहें कोइत आवित सेकेहे? 42 केहें वसनोमेहें ओं नाहां आयो के ख्रिस्त दाविदोअ पारवाडीम रोते आन बेथलेहेम गावोंम रोत आवनारु, जिहीं दाविद रोतुतो?"✝ 43 ताहरोअ या वाअहीं माअहूंमेहें टोला पोड़्या. 44 तियांमेर्‍येए थोड़ेक तियाहा तोइलाअ कोशित कोअतेते, पोन कोडेज तियापोअ आथ ने टाक्यु.

45 ताहराअ मंदिरोअ सिपायी मुख्य पुंजाराआं आन फरिसीइं जागे वोलीत आया; तियां तियांहां कोयो, "तुमू तियाहा काहा नाहां लेताया?"

46 सिपायडां उत्तर आप्यो, "कोड्लेज माहें एहेलिही गोठी नाहां कोअयी, जेहलीही ये कोयी."

47 या वाअहीं फरिसी तियांहां उत्तर आप्यो, "केहें तिये तुमुहूं बी फोगा बोणावयाहा के? 48 केहें आधिकारी नेत फरिसीमेहें रोत एखे तिया पोअ विश्वास कोअयुहू के जियाहा तुमू ओलखीइताहा? 49 पोन एं गर्दी जे कायदाहा नाहां जांअती, तियाहा काजे ए हारापोम होये."

50 फरिसी मेर्‍युउ निकुदेमुस✝ नावोअ एक जोउं ओतू, जो पेल ईसुउ जागे आयुतो, तिये तियांहां कोयो, 51 "आपाआ कायदाअ पुरमाणे आपू एखा माहुंहूं ताअहूं जाआं दोशी ठरवीत ने सेकत्ला, के जाअहूं जाआं पेल तियाआ उनाइत कोइत जाईंत ने लेय के तिये की कोअयोहो."

52 तियां तियाहा उत्तर आप्यो, "केहें तू बी गालीलोअ होय? वसनोअ आभ्यास कोअ आन ताहूं देखाय के गालीलोम रोत कोड्लूज भविश्यवक्तू नाहां आवनारु." 53 ताहराआ तिहीं रोत आक्खा जिव जिवोअ कोअ जाता रोया.