1 सालता सालतामेहें तिये एका माहुंहूं देख्यो, जो जल्मार्‍योओज आंद्लो ओतो. 2 तियाआ सेला तियाहा फुशो, "गुरु, कोडे पाप कोअयुतो के ओं आंद्लो उबज्यो, ये के याअ आयहीन आब्हे?"

3 ईसु उत्तर आप्यो, "ये नाहां पाप कोअयू, नाहां याअ आयहीन आब्हू; पोन ओं याअकाजे ओवोहो के देवोअ काम यामेहें रोत देखाअहूं जोवे. 4 जिये माहूं मोकल्युहू, आपुहूं तियाआ काम दिही होय ताअहूं कोइलाआ जरुरी होय; ते रात आवनारी होये, जियीमेहें कोडोज काम ने कोइत सेकनारो. 5 जाअहूं जाआं आंय दुन्यामेहें होय, ताअहूं जाआं आंय दुन्याअ उजालो होय."

6 ओं कोत कोइत तिये पुयींपोअ थुप्यो, आन तिया थुपोवाअहीं कादुउ केलव्यू, आन तो कादुउ तिया आंद्लाआ डोआपोअ लागाड़ीत कोइते, 7 तियाहा कोयो, "जा, सिलोहोअ कुंडीमेहें तुवीत ले." सिलोहोअ अर्थ होय "मोकलीइल्यू." तिये जात कोइत डोआ तुव्या आन पालतूज वोलीत आवयू.

8 ताहां आहने रोनारें आन जियां पेल तियाहा बिख मागत्लू पाल्युतो, तें कोने वोल्ये, "केहें ओ तोज नाहां के, जो बोठ बोठू बिख मांग्या कोअतुतो?"

9 थोड़हे माअहें कोयो, "ओ तोज होय," बिहीरे कोयो, "नाहां पोन तियाआ सारकुज होये."

तिये कोयो, "आंय तोज माटी होये."

10 ताहरेए ते तियाहा फुसे वोल्ये, "ताआ डोआ कि कोइत उगड़्या?"

11 तिये उत्तर आप्यो, "ईसु नावोअ एक माहुंउं कादुउ केलवीइल्यू, आन माआं डोआपोअ लागाड़ीत कोइत कोल्यो, ‘सिलोहोमेहें जात कोइत तुवीत ले,’ ताहरुउ आंय गोयू आन तुवया ताहां देखाओ वोल्यो."

12 तियां तियाहा फुशो, "तो का होये?"

तिये कोयो, "माहूं ने मुंदू."

13 एक माहुंउं जों पेल आंद्लो ओतो, तियाहा माहें फरिसीइ जागे लेत गोये. 14 जेदिहीं ईसु कादुउ पिगवीत हाऱ्यु आन तियाआ डोआ उगाड़्याते, तो आरामोअ दिही ओतू. 15 ताहराअ फरिसी फाश्याआ एकवारी तियाहा फुशो के, "ताआ डोआ कि कोइत उगड़ीत गोया?" तिये तियांहां उत्तर आप्यो, "तिये माआं डोआपोअ कादुउ पिगवीत लागाड़्यु, ताहरुउ आंय तुवीत लेदो, आन ओमे देखोहो."

16 यापोअ थोड़ाक फरिसी कोना वोल्या, "ओं माहुंउं देवोअहें रोत नाहां, काहाके तों आरामोअ दिही नाहां पालतो."

बिहीरा कोयो, "पापी माहुंउं एहेलाहा समत्कार कि कोइत देखाड़ीत सेकेहे?" ताहां तियांमेहें टोला पोड़ीत गोया.

17 तियां तिया आंदलाहा फाशोअ कोयो, "तिये ताआ डोआ उगाड़्याहा ठीक होय, पोन तू तियाआ बाप्तिम कि कोहे?" तिये कोयो, "तो भविश्यवक्तू होय."

18 पोन यहुद्याहां विश्वास ने बोहतुतो के तो आंदलु ओतू आन ओमे पालु वोल्युहू, ताहरोअ तियां जियाआ डोआ उगड़ीत गोया तियाआ आयहीन आब्हाहा हादीत कोइत फुशो. 19 "केहें ओ तुमाआं पोर्‍यू होये, जियाहा तुमू कोतेहे के आंदलु उबज्युतो? ताहरुउ ओमे ओ केहें कोइत देखेहे?"

20 तियाआ आयहीन आब्हे उत्तर आप्यो, "आमुहूं मुंदू होये के ओ आमाआं पोर्‍यू होये, आन आंदलु उबज्युतो; 21 पोन आमुहूं ओं ने मुंदू के ओमे ओ कि कोइत पालेहे, आन ओं बी ने मुंदू के याअ डोआ कोडे उगाड़्या. तो जांअतू होये, याहाज फुसीत ल्या; ओ याअ बाप्तिम सोताहा कोत देये." 22 ए गोठी तियाआ आयहीन आब्हे याअ कोअते कोयी काहाके तें यहुद्याहां बितेते, काहाके यहुद्याआं एकमत ओत गोयोतो के जर एखु कोये के तो ख्रिस्त होये, ताहां तियाहा यहुदी आराधनालयोमेहें रोत काडी देअलो. 23 तिहींज वाअहीं तियाआ आयहीन आब्हे कोयो, "तो जांअतू होय, तियाहाज फुसीत ल्या."

24 ताहराअ तियां तिया माहुंहूं जो आंदलो ओतो, बिहीरी वारी हादीत कोइत कोयो, "देवोअ स्तुती कोअ. आमुहूं ते मुंदू होय के तो माटी पापी होये."

25 तिये उत्तर आप्यो, "माहूं ने मुंदू के तो पापी होय के नाहां; माहूं ते एक गोठ मुंदू होये के आंय आंदलू ओतू आन ओमे माहूं देखाअहे."

26 तियां तियाहा फाशोअ फुशो, "तिये ताअरी कि कोअयो? आन कि कोइत ताआ डोआ उगाड़्या?"

27 तिये तियांहां कोयो, "आंय ते तुमुहूं कोत देदो, आन तुमू ने उनाअया; ओमे बिहीरी वारी काहा उनाइलाआ इश्शा कोअताहा? केहें तुमू बी तियाआ सेला बोणुहूं होदताहा के?"

28 ताहां तियाहा डाणवित कोयो, "तुज तियाआ सेलू होये, आमू ते मोशेए सेला होये. 29 आमुहूं मुंदू होय के देवे मोशेएरी गोठी कोअयी; पोन या माहुंहूं आमू ने ओलखीइत्ला के कावालो होये."

30 तिये तियांहां उत्तर आप्यो, "एते बोगलाअहूं हारकी गोठ होये के तुमू ने ओलखीइत्ला के तो कावालू होये, तेबी तिये माआं डोआ उगाड़ी देदा. 31 आमुहूं मुंदू होय के देव पाप्योंअ नाहां उनाअतू, जो देवोअ भक्ती कोअहे आन तियाआ इश्शा पोअ सालेहे, ताहां तो तियाआ उनाअहे. 32 कोलीइ सुरुवातिही रोते ओं केदिहींज कानोम नाहां पोड़्यो के एखू जल्मार्‍याअ आंद्लाआ डोआ उगाड़्याये. 33 जर ओं माहुंउं देवोअहें रोत ने रोतो, ताहां किज ने कोइत सेकतो."

34 तियां तियाहा उत्तर आप्यो, "तू ते निस्तू पापोमेहें उबज्युहू, तू आमुहूं कि सिकाड़त्लू?" आन तियां तियाहा बारथे काडी देदू.

35 ईसु उनाअयू के यहुदी आधिकार्‍यों तियाहा ठेपलीत बारथे काडी देदुहू, आन जेहेलाम तो तियाहा मिल्यू, ताहां कोयो, "केहें तू माहुंउं बेटाह्हापोअ विश्वास कोअहे?"

36 तिये उत्तर आप्यो, "प्रभु, तो कोडू होये माहूं को, के आंय तियापोअ विश्वास कोइत सेको?"

37 ईसु तियाहा कोयो, "तू तियाहा पाल्युहू बी, आन जो ताअरी गोठी कोअया कोअहे तो तोज होये."

38 तिये कोयो, "प्रभु, आंय विश्वास कोअहो." आन तो तियाआ पागे पोड़्यू.

39 ताहरुउ ईसु कोयो, "आंय यी दुन्यामेहें न्यायनिवाड़ाअ काजे आयुहू, काहाके जें नाहां देखते तें देखे, आन जें देखतेहे तें आंदले ओत जाय."

40 थोड़ाक जे फरिसी तियाअरी ओता, तियां ए गोठी उनाइत कोइत तियाहा कोयो, "केहें, ताहराआ आमू बी आंदला ए?"

41 ईसु तियांहां कोयो, "जर तुमू आंदला रोता ताहां पापी ने ठरता; पोन ओमे कोताहा के आमू देखताहा, तियाहा काजे तुमाआं पाप होय तेहलुज रोहे."