Lucas 15

टाकाअला मेडाआ काईं

1 आखा नाकेदार आन पापी ईसुउ गोठी उनाइलोअ काजे आया, 2 तेहेलाम फरिसी आन कायदाअ मास्तर टुटणीइताज कोना वोल्‍या, के "ओ माटी पाप्योहों आहने कोअहे आन तियांअरी खाहेन पीहे!" 3 ताहां ईसु तियांहां ए काईं कोत आप्यी:

4 "समजीत ल्या तुमामेहें एखापोअ होव मेडे ओय, तिहींमेहें रोत एक टाकात जाय, ताहां तो नवह्यान्नव मेडाहां रानम सोड़ीत देत तिया टाकाअला मेडाहा जोड़े ताअहूं जाआं ने होदीत जाय के? 5 आन जेहेलाम तों जोड़ीत जाहे तेहेलाम तो खुब खुसी वाअहीं खांदोपोअ आखलीत लेहे. 6 आन कोअ आवित तियाआ दोस्तीहीं आन जागेवालाहां कोहे, ‘माअरी खुसी कोआ, काहाके माआं टाकाअलो मेडो फाशोअ जोड़ीत गोयोहो.’ 7 आंय तुमुहूं कोहो के एहेंज कोइत एका मोन फिरावनारा पाप्योअ बाप्तिमेहें बी होरगाआ राजोम खुसी ओवे, एतीही खुसी तोम बाकी रोल्‍या नवह्यान्नव धर्मी माअहोंअ बाप्तिम नाहां ओवती जियांहां मोन फिरावीलोअ गरज कायनाहां."

टाकाअला सांदीइ दोस्क्याअ काईं

8 "समजीत ल्या, एकी बायीपोअ सांदीइ दोह दोस्क्ये होये. जर तियीइ एक दोस्क्य टाकात गोयो, ताहां ते दिवू पेटाड़ीत कोइत जाअहूं जाआं तों ने जोड़े ताअहूं जाआं कोअ वारुहूं बाइत-फासटीत ने होदे के? 9 आन जेहेलाम तों जोड़ीत जाहे तेहेलाम ते तियीइ दोस्ती आन जागेवालाहां हादीत कोइत कोहे के, ‘माअरी खुसी कोआ, काहाके माआं टाकाअलो दोस्क्य जोड़ीत गोयोहो!’ 10 एहेंज कोइत एका मोन फिरावनारा पापीइ वोतीइ होरगा मेहें देवदुतोंअ सामने खुसी ओवेहे ओं आंय तुमुहूं कोहो."

ऊगार पोर्‍यू

11 फाशुउ ईसु कोयो, "एका माहुंउं बेन बेटाह्हा ओता. 12 तिहींमेएं हानीइलू बेटुह्हू कोनु वोल्यू, ‘बा, मालधनो मेर्‍युउ माआं इसु माहूं आपी दे,’ ताहां तियाआ बाह्हे तियाआ मालमिलकत बेनू बेटाह्हांहां वाटीत आपी देदी. 13 तिहीं रोत थोड़ाक दिहोमेहें तो हानीइलु पोर्‍यू तियाआ आखु इसु एक्ठू कोइत एखा दुर मुलखोम निहींत गोयू. तिहीं तो तियाआ आखा पोशा मोज्‍यादान वालित खर्सी देदा. 14 जेहेलाम तिये आखा पोशा खर्सी देदा तेहेलाम तिया देसोम वोडू काल पोड़्यु, आन तो निरह्‍युज कांगाल ओत गोयू. 15 ताहरुउ तो तिया मुलखोमेर्‍याआ एका जोओंअहीं काम होदीत गोयू, तिये माहें तियाहा भुंडड़े सारीइलोअ काम होप्यो. 16 तिये विसार कोअयू के भुंडड़े खातेहे तियां हेंग्या वाअहीं तेंव ताराओ; पोन तियाहा कोडो किज ने आपतोतो. 17 जेहेलाम तो सुद्दीपोअ आयू तेहेलाम कोनु वोल्यू, ‘माआं आब्हाअ जागे केताहा तेबी मोजर्‍याहां रोटू खात कोइत उगरीत जाहे आन आंय का इंहीं फुके मोअहों! 18 आंय इंहीं रोत ओमे उठीत कोइत माआं आब्हाअ जागे जाहीं आन तियाहा कोहीं के "बा रा, आंय होरगाआ विरुद्ध आन ताआ विरुद्दाम गुनू कोअयुहू. 19 आंय ताआ पोर्‍यू एहें कोवाड़ीइलोअ बी लायक कायनाहां रोयू; ओमे माहूं ताआ एखा पावरोअ होस तेंव मिकीत ले."’ 20 ताहां तो उठ्यू आन तियाआ आब्हाअ जागे जानु वोल्यू:

"तो सेटेज ओतू तेहेंज तियाआ आब्हे तियाहा देखीत लेदू, आन तियाहा किव आयी, आन गुगदीइतुज जात कोइत तियाहा सातीइरी लागाड़ीत लेदू आन गुऊँ देदू. 21 बेटेह्हे कोयो, ‘बा, आंय ताआ विरुद्दाम आन होरगाआ विरुद्धामेहें गुनू कोअयुहू. ओमें ताआ बेटुह्हू कोत कोवाड़ीइलोअ बी लायक नाहां रोयू.’ 22 पोन आब्हे पावरोहो कोयो, ‘उतवालेहे! याहा हाजाम हाजो आंगड़ो पेवाड़ा आन याअ आथोम मुंदी आन गुडाम बुटे पेवाड़ा, 23 आन बियाराआ बोकड़ु लेतावीत माआ, खावा आन मोज्‍यादान कोआ! 24 काहाके ओ माआं बेटुह्हू मोइत गोयूतो पोन फाशुउ जिवित गोयुहू: टाकाइत गोयूतो, पोन ओमे फाशुउ जोड़ीत गोयुहू.’ आन तें खुसी कोए वोल्‍ये."

25 "पोन तियाआ डायु बेटुह्हू खेतोम गोयूतो, आन तो जेहेलाम कोओअ आहने पोतू, तेहेलाम वाजे-गाजे आन नासीइलाअ आवाज उनाअयू. 26 ताहां तिये एका पावरोहो हादीत कोइत फुशो, ‘ओं बादो कि सालु होय?’ 27 तिये पावरे कोयो, ‘ताआ हानीइलु पाही आयुहू, आन तो हाजी-हुतेहे कोअ पोतू तियाहा काजे ताआ आब्हे बियाराअ बोकड़ु माअड़्युहू.’ 28 ओं उनाइत कोइत तो कोअमेहें बी ने जातुतो, पोन तियाआ आब्हू बारथे आवित कोइत तियाहा समजाड़ु वोल्‍यु. 29 तिये आब्हाहा उत्तर आप्यो, ‘पाल, मी एते वोरह्ये ओत गोये ताआ सेवा कोअया कोअहो, आन केदिहीं ताआ गोठ ने टाल्‍यी, तेबी तुमे माहूं माआं दोस्तीइरी मोज्या कोइलोअ काजे एक बोकड़ीइ गिद्लो बी ने आप्यो. 30 पोन ओ ताआ बेटुह्हू, जो ताआ आखा पोशा सिनालोअ बोईंइरी वाया खर्स कोई देदान ताहरुउ आयुहू, ताहां कांय तु तियाआ काजे बियाराआ बोकड़ु माअयू.’ 31 आब्हे तियाहा कोयो, ‘बेटा, तु माअरी कायम रोहे; आन जों किबी माआं होय तों आखो ताआज होय. 32 पोन ओमे खुस ओवीत तिवार कोअहूं जोवे, काहाके ओ ताआ पाही मोइत गोयुतो, फाशुउ जिवित गोयुहू; टाकाइत गोयुतो पोन फाशुउ जोड़ीत गोयुहू.’"