1 जेहेलाम ते येरुसालेम होयरोअ आहने, जेयतुन डोगो पोअ बेथफागे आन बेथानीयाआ जागे आया ताहां तिये तियाआ सेला मेर्‍याआ बेन जोओंहों ओं कोत कोइत मोकल्या, 2 आन तियांहां ओ आदेश आपित मोकल्‍या, "हुंबर्‍याआ गांवोंमेहें जावा, आन तिहीं पोत्ताज वाआ एक गोदडीइ बासो, जिया पोअ कोडोज नाहां बोठो, बांदीत मिकल्यो तुमुहूं मिले. तियाहा सोड़ीत कोइत लेतावा. 3 जर तुमुहूं एखो फुसे, ‘ओं काहा कोअताहा?’ ताहां कोजा, मालख्योहो याअ गरज होय, आन तो तियाहा मामार इंहीं लेत मोकली देये."

4 ते जात कोइत तिया गोदडीइ बासाहा बारथे बाओअ सामने खोली मेहें बांदीत मिकल्यो देख्यो, आन सोड़ा वोल्या. 5 तिहीं ऊबा रोनारा मेर्‍याअमेहें रोत थोड़ेक कोने वोल्ये, "ओं कि कोअताहा, गोदडीइ बासाहा काहा सोडताहा?"

6 जेहलोहो ईसु कोयोतो, तेहेंज कोइत तियांहां कोत देदो; ताहरेए माअहें तियांहां जाअहूं देदा. 7 ते गोदडीइ बासाहा ईसुउ जागे लेतावीत कोइत तिया पोअ तियांआं आंगड़े आथर्‍ये, आन तो तिया पोअ बोहीत गोयू. 8 ताहरेए जाअखीलेहे माअहें तियांआं आंगड़े वाटे पोअ आथर्‍ये आन बिहरे माअहें खेतोमेहें जात कोइत डाले वाडी वाडीइ वाटे पोअ आथरी देदे. 9 आन जे तियाआ आगाड़ी आगाड़ी सालते आन फासाड़ी फासाड़ी सालित आवतेते, आअड़ी आअड़ीइ कोतेज जातेते, "होसान्ना! धन्य होय जो मालख्योअ नावसे आवेहे.* 10 आपाअ बाह्हा दाविदोअ राज जो आवेहे; धन्य होय! होरगा मेहें होसान्ना!"

11 ईसु येरुसालेमोमेहें पोतीत कोइत मंदिरो मेहें आयू, आन शारु खुणा आखो बिडारो पालीत कोइत बारा सेलाअरी बेथानी गोयू, काहाके वेल पोड़ीत गोयीते.

12 बिहरे दिहे जेहेलाम ईसु आन तियाआ सेला बेथानी रोत आवताते, ताहां ईसुहू फुक लागी. 13 ताहां तिये सेटेज रोत एक अंजिरोअ साड़ निलो निलोज देखीत कोइत आहने गोयू: पोन तिहीं तियाहा पालाआ सिवाय किज नाहां जोड़्यो; काहाके ते वेल फलवाआ कायने ओती. 14 ईसु तिया साड़ोहो कोयो, "आज रोत ताआ फल कोडोज केदिहीं ने खाय!"

आन तियाआ सेला ओं उनाअताते.

15 ताहरुउ ईसु आन तियाआ सेला येरुसालेम मेहें आया. आन तो मंदिरोम गोयू; आन जे लेएलो-वेसीइलो वेवारो कोअया कोअताते तियांहां बारथे काडू वोल्‍यू, आन पोशा बोदलीत कोइत आपनारा आन पेरवे वेसनाराआ कुर्सी उलटावित टाक्यी. 16 आन मंदिरोम रोत कोडाहाज सामान लेत कोइत आवुहूं जाअहूं ने देदे. 17 आन ईसु तियांहां सिकाडू वोल्यू, "माआं कोअ आखी कोलीइ माअहुंउं काजे प्रार्थना कोओ कोवाय, एहेलोह वसनोमेहें नाहां लेख्यो के? पोन तुमू तियाहा बांडोअ कुपू बोणावी देदू."

18 ओं उनाइत कोइत मुख्य पुंजारु आन कायदाअ मास्तरहों तियाहा माईलाआ कोअते कदर काडा वोल्या; काहाके ते तियाहा बिताते याअ काजे के आखे माअहें तियाआ हिकवणो वाअहीं खुस ओवतेते.

19 सिंजिवड़ो पोड़ताज ईसु आन तियाआ सेला सेहरोअ बारथे जाता रोया.

20 ताहराअ बिहरे दिहे वेगीइ ईसु आन तियाआ सेला तियीज वाटे रोत जाताते, ताहां तियां तिया अंजिरोअ साड़ोहो मुलम रोत ऊगाअलो देख्यो. 21 पेत्राहा ते गोठ ओर आयी, तिये ईसुहू कोयो, "गुरु, पाल! ओं अंजिरोअ साड़ जियाहा तुमे हाराप आप्यू तों उगात गोयोहो."

22 ईसु तियांहां उत्तर आप्यो, "देवो पोअ विश्वास मिका. 23 आंय तुमुहूं खोरीज कोहो के जो कोडो या डोगोहो कोये, ‘तू उपटित जा, आन दोर्‍या मेहें जात पोड़,’ आन तियाआ मोनो मेहें सौंसू ने कोए, पोन भरिवसू कोए के जो कोहो तो ओत जाय, ताहां तियाआ काजे तोज ओवे.* 24 तियाहा काजे आंय तुमुहूं कोहो, के जो किबी तुमू प्रार्थना कोइत मागहा, ताहां विश्वास कोइत लेजा के तुमुहूं जोड़ीत गोयो, आन तुमुहूं जोड़ीत जाय. 25 आन जेहेलाम तुमू प्रार्थनाआं कोअते उबे रोहा, ताहां तुमाआं मोनो मेहें काविंहीं विरोध जर एकदाआ बाप्तिमेहें ओय, ताहां माफ कोआ: याअकाजे के तुमाआं होरगामेर्‍युउ देव बाह्हू बी तुमाआं पाप माफ कोए. 26 आन जर तुमू माफ ने कोअहा ताहां तुमाआं देव बाह्हू बी जो होरगामेहें होय, तुमाआं पाप माफ ने कोए."*

27 ते फाश्याआ येरुसालेम मेहें आया, आन ईसु मंदिरोम फिर्‍या कोअतुतो ताहां मुख्य पुंजारु आन कायदाअ मास्तरहों आन डायहां तियाआ जागे आवित कोइत फुसा वोल्या, 28 "तू एं कामे कोड्ला आधिकार वाअहीं कोअहे? आन ओ आधिकार ताहूं कोडे आपल्यु के तू एं कामे कोए?"

29 ईसु तियांहां कोयो, "आंय तुमुहूं एक गोठ फुसोहो; माहूं उत्तर आपा, ताहरुउ आंय तुमुहूं कोहीं के एं कामे कोड्ला आधिकार वाअहीं कोअहो. 30 योहानोअ बाप्तिस्मा कांय होरगाम रोत ओतू के माअहूंअहें रोत ओतू? माहूं उत्तर आपा."

31 ताहराअ ते तियां तियांआंज गोठी कोआ वोल्या के "जर आपू कोहूं ‘होरगाअहें रोते,’ ताहां तो कोये, ‘ताहराअ तुमू तिया पोअ भरिवसू काहा नाहां मिक्यू?’ 32 आन जर आपू कोहूं, ‘माअहूंअहें रोते’ ताहां माअहुंउं बिक होय, काहाके आखाहा मुंदू होय के योहान खोराखर भविश्यवक्ता ओतू." 33 ताहां तियां ईसुहू कोयो, "आमुहूं ने मुंदू."

ईसु तियांहां कोयो, "आंय बी तुमुहूं ने कोनारु के एं कामे कोड्ला आधिकारो वाअहीं कोअहो."