1 जेहेलाम ईसु आन तियाआ सेला येरुसालेमोअ आहने पोता, आन जेयतुन डोगोपोअ बेथफागेए जागे आया, ताहरुउ ईसु बेन सेलाहा ओं कोत कोइत मोकल्या, 2 "हुंबर्‍याआ गांवोंमेहें जावा. तिहीं पोत्ताज वाआ एक बांदल्यी गोदड़ी आन तियीइरी बासो तुमुहूं देखाय. तियाहा सोड़ीत कोइत माआं जागे लेतावा. 3 आन एकदो काविंहीं कोये, ताहां कोजा, ‘प्रभुहू याआ गरज होय;’ ताहां तों तुमुहूं ताबुड़तुड़ मोकले." 4 ओं याअ काजे ओवो काहाके, भविश्यवक्ता जों कोयो तों पुरो ओवुहूं जोवे; तों एहें कोइते:

5 ✝ 21:5 जख 9:9 "‘सियोनोअ पोर्‍यीही कोवा,

पाल, ताआ राजा नम्र ओत कोइत,

तो गोदड़ीइ बासापोअ बोहीत

ताआ जागे आवेहे.’"

6 सेला जात कोइत, जेहेंकोइत ईसु तियांहां कोयो, तेहेंज कोइत कोअयो. 7 आन गोदड़ी आन तियीइ बासो लेतावीत तियापोअ तियांआं आंगड़े टाक्ये आन ईसु तियापोअ बोहीत गोयू. 8 ताहां वारुज माअहें तियांआं आंगड़े वाटेपोअ आथर्‍ये, थोड़हे माअहें साड़ोअ डाली वाडीत वाटेपोअ आथर्‍यी. 9 जे गर्दी तियाआ आगाड़ी जातीते आन फाटी आवतीते ते आअड़ी आअड़ीइ कोतीते, "दाविदोअ पोर्‍याहा होसान्ना!*21:9 होसान्ना मोन्ज्ये, जय हो! आशिर्वादीत होय तो, जो देवोअ नावसे आवेहे! उसे जुगोमेहें होसान्ना!"

10 जाहां ईसु येरुसालेमोमेहें आयू ताहां आखो होयर गुजुगुजु कोओ वोल्यो, आन तें माअहें कोने वोल्ये, "ओ कोडू होये?"

11 गर्दीमेर्‍याअ माअहूं कोयो, "ओ गालीलोअ नासरेथ होयरोमेर्‍युउ भविश्यवक्ता ईसु होये."

12 ईसु देवोअ मंदिरोमेहें जात कोइत तियां आखाहा जे मंदिरोमेहें वेवारो कोअताते, काडी देदा, आन पोशाअ वेवारो कोअनाराआं टेबल आन पेरवे वेसनाराआ कुर्सी उलटावी देदी. 13 ✝21:13 यश 56:7; यिर्म 7:11 आन तियांहां कोयो, "वसनोमेहें एहें कोइत लेख्योहो के, ‘माआं कोअ प्रार्थनाअ कोअ एहें कोये.’ पोन तुमू याहा बांडोअ कुपा कोइत रोयाहा!"

14 ताहां आंद्ले आन लेंगड़े तियाआ जागे मंदिरोमेहें आये, तियांहां तिये हुदार्‍ये. 15 ताहां तिये कोअल्ये समत्कारोअ कामे पालीत "दाविदोअ पोर्‍याहा होसान्ना!" एहें कोत मंदिरोमेहें आअड़ीनारा पोर्‍याहां पालीत मुख्य पुंजारु आन कायदाआ मास्तर याहां खोत लागी. 16 ✝21:16 भजन 8:2 आन ते ईसुहू कोना वोल्या, "तू उनाअहे के एं कि कोतेहे?"

ईसु तियांहां कोयो, "होव; केहें तुमू ओं केदिहींज नाहां वाश्यो, के ‘पोर्‍याहा आन बुजी खानारा पोर्‍याआं सोबी वाअहीं तुमे खुब स्तुती कोआड़्यी?’"

17 ताहां ईसु तिया सेहरोहो सोड़ीत बेथानी नावोअ गाँवोम गोयू आन तिहींज रात काड्यी.

18 वेगीइ वेले जाहां तो होयरोअहें वोलीत आवत्लू, तेहलाम तियाहा फुख लागी. 19 सडकेए मेरे एक अंजिरोअ साड़ देखीत तो तियाआ जागे गोयू, आन पानोवासी तियामेहें बिहीरो किज ने जोड़्यो, तिये तिया साड़ोहो कोयो, "ओमें रोत ताहूं फाशोअ फिरीत केदिहीं फल ने लागे." आन अंजिरोअ साड़ ताब्बुड़ उगाईत गोयो.

20 ओं देखीत सेला पोंगलाईत गोया आन तियां कोयो, "ओं अंजिरोअ साड़ ताब्बुड़ कि कोइत उगाईत गोयोहो?"

21 ✝ 21:21 मत्तय 17:20; लुक 17:6; 1 करिन्थ 13:2 ईसु तियांहां कोयो, "आंय तुमुहूं खोरो कोहो, जर तुमू विश्वास मिकहा आन सौंसू ने कोअहा, ताहां एतोज ने कोअहा जो या अंजिरोअ साड़ोअरी कोअयोहो, पोन जर या डोगोहो बी कोहा, ‘उपटित जा, आन दोर्‍यामेहें जात पोड़,’ ताहां ओं ओत जाये. 22 आन जो किबी तुमू प्रार्थनामेहें विश्वासो वाअहीं मागहा तो आखो तुमुहूं मिले."

23 ईसु फाशुउ मंदिरोमेहें जात कोइत हिकवोण आपतुतो, ताहां मुख्य पुंजारु आन डाया तियाआ जागे आवित फुशो, "तु ओं काम कोड्ला आधिकारो वाअहीं कोअत्लू? आन ताहूं ओं आधिकार कोडे आप्युहू?"

24 ईसु तियांहां उत्तर आप्यो, "आंय बी तुमुहूं एक गोठ फुसोहो; जर ते माहूं कोत आपहा, ताहां आंय बी तुमुहूं कोहीं के ओं काम कोड्ला आधिकारो वाअहीं कोअहो. 25 योहानोअ बाप्तिस्मा का रोत ओतू? होरगामेहें रोत के माअहूं पोअ रोत?"

ताहां ते तियां तियांआंज बिबड़ा वोल्या, "जर आपू कोहूं ‘होरगामेहें रोत,’ ताहां तो आपुहूं कोये, ‘ताहराआ तुमू तियापोअ विश्वास काहा नाहां कोअयू?’ 26 आन जर कोहूं ‘माअहूं पोअ रोत,’ ताहां आपुहूं माअहूं गर्दीइ बिक होय, काहाके तें आखे योहानोहो भविश्यवक्ता कोत मानत्ले." 27 ताहां तियां ईसुहू उत्तर आप्यो, "आमुहूं ने मुंदू."

तिये बी तियाहा कोयो के, "आंय बी तुमुहूं नाहां कोतू के ओं काम कोड्ला आधिकारो वाअहीं कोअहो."

28 "ओमे तुमुहूं कि लागेहे तो कोवा? एका माट्योओ बेन पोर्‍या ओता; ताहां तो डाया पोर्‍याआ जागे गोयू आन कोयो, ‘पोर्‍या, जा आन आजे दाराक्शाआ मोलामेहें काम कोअजी.’ 29 तिये कोयो ‘होव बा, आंय जाहो,’ पोन तो ने गोयू. 30 ताहां बाह्हू हानीइला पोर्‍याआ जागे गोयू आन तियाहा बी पेहला पोर्‍याहा कोयो तेहेंज कोइत कोयो. ताहां तिये कोयो, ‘आंय नाहां जातू बा’ पोन तो सेलवाआ मोन वालित कोइत गोयू. 31 यां बेनुमेहें रोत कोडे बाह्हाआ इश्शा पुरी कोअयी?"

तियां कोयो, "हानीइले पोर्‍ये."

ताहां ईसु तियांहां कोयो, "आंय तुमुहूं कोहो के, फालू लेनारे आन रांडे देवोअ राजोमेहें तुमारोत आगाड़ी जातेहे. 32 ✝21:32 लुक 3:12; 7:29-30 काहाके योहान धर्मीइ वाट देखाड़तुज तुमाआं जागे आयू, आन तुमू तियापोअ विश्वास ने कोअयू; पोन नाकेदारों आन रांडे यां तियापोअ विश्वास कोअयू. तुमू ओं देख्यो तेबी तुमाआं मोन वालित तियापोअ भरिवसू ने कोअयू."

33 ✝ 21:33 यश 5:1-2 ईसु कोयो, "फाशीइ एक बिहीरी काईं उनाइत ल्या, एक माहुंउं ओतो तिये दाराक्शाआ मोलू लागाड़्यु. तियाआ सोमकीर वाड़ बांद्यी, तियाआ मांयते दाराक्शाआ रोहोअ काजे कुंडे बोणाये, आन राखीत बोहीइलाआ काजे मालू बोणायू. आन जागल्याहां होपी देत तो परदेसोमेहें जातु रोयू. 34 जाहां दाराक्शे तोडीइलोअ वेल आयी, ताहां तियाआ पावरोहो तियाआ मोलाअ राखवाली जागल्याआं जागे फल आना मोकल्या. 35 पोन जागल्यां तियां पावरोहो तोइत कोइत, कोडाहा मार देदू, आन कोडाहा माइत टाक्या, एखाहा का डोणाट्या. 36 फाशाआ तिये पेलरोत वादार पावर मोकल्या, आन तियांअरी बी तियां तेहेंज कोइत कोअयो. 37 सेलेसेलवाआ तिये तियाआ पोर्‍याहा तियांआं जागे एहेलुहू विसार कोइत मोकल्यू के, ‘ते माआं पोर्‍याआ तेबी मानपान कोए.’ 38 पोन जागल्यां तिया पोर्‍याहा देखीत कोयो, ‘ओ ते मालख्योअ पोर्‍यू होये, आवा, याहा माईंत टाकता आन याआ जागू लेत लेता.’ 39 ताहां तियां तियाहा तोअयु आन दाराक्शाआ मोलामेहें रोत बाअथे काडीत माईंत टाक्यु."

40 ताहरोअ ईसु फुशो, "जाहां दाराक्शाआ मोलाआ मालिख आवे, ताहां तियां जागल्यांअरी कि कोए?"

41 तियां तियांहां कोयो, "तो तियां खाराब जागल्याहां माअतीज टाके; आन दाराक्शाआ मोलाआ ठेकू बिहीरा जागल्याहां आपी देय, जे वेलेपोअ तियाहा पाक आप्या कोए."

42 ईसु तियांहां कोयो, "केहें तुमू देवोअ वसनोमेहें ओं केदिहींज नाहां वाश्यो के?

"‘जिया डोणोहो राजमिस्तर्‍यां बिगरकामोंअ ठरव्यू,

तोज कोपराआ डोण ओत गोयू?✝21:42 प्रेशित 4:11; 1 पेत्र 2:7

ओं प्रभुउ वोगेहे रोत ओवो,

आन आमाआं नजरेमेहें बोगलाय एहलोहो होय.’✝21:42 भजन 118:22-23

43 "याआ काजे आंय तुमुहूं कोहो के, देवोअ राज तुमापोअ रोत मागीत लेय आन एहेला माअहुंहूं आपी देये, जें तियाहा फल आपित सेके. 44 *21:44 थोड़हा लेख्यामेहें ओं वसन नाहां जोड़तोजो कोडो याआ डोणोपोअ पोड़े, तियाआ पुकरान पुकरा ओत जाय; आन जियापोअ ओ डोण पोड़े, तियाहा तो पिइड़ीत टाके.✝21:44 लुक 2:34"

45 मुख्य पुंजारा आन फरिसी तियाआ काईं उनाइत समजीत गोया के तो तियांआं बाप्तिमेहें कोहे. 46 ताहां तियाअ ईसुहू तोइलोअ कोशित ओती. पोने ते माअहुंहूं बिया, काहाके तें तियाहा देवोअ जागेहे रोत आवनारु भविश्यवक्ता मानतेते.✝21:46 मत्तय 21:11; लुक 7:16; योहान 7:40