1 जेहेलाम ईसु मंदिरोम रोत निहींत कोइत आवतुतो, तेहेलाम तियाआ सेलामेर्‍येए एके जोएं कोयो, "गुरुजी, पाल, केहेलाहा वोडा बी डोण आन केतीही वोडी आवाली होय!"

2 ईसु तियाहा कोयो, "तुमू ए वोडी वोडी आवाली हेएताहा के? इंहीं डोणोपोअ डोण बी ने रोय, आखो ओदालित टाके."

3 जाहां ईसु जेयतुनोअ डोगोपोअ मंदिरोअ सामने बोठुतो, ताहां पेत्र, याकोब, योहान आन आंद्रियानेहें आंगेज जात कोइत तियाहा फुशो, 4 "आमुहूं को के ए गोठी कोयों ओवे? आन जेहेलाम ए आखी गोठी पुरी ओवुहूंज कोए तेहेलाम कि निशाणी रोय?"

5 ईसु तियांहां कोनु वोल्यू, "तुमुहूं कोडो ठोगुहूं ने जोवे, तियाहा काजे सांबालित रोवा. 6 जाअखीलेहे माअहें माआं नावो वाअहीं आवित कोइत कोय, ‘आंय तोज होय!’ आन ते जाअखीला माअहोंहों ठोगी देय. 7 आन जेहेलाम तुमू लड़ाय आन लड़ायीइ गोठी उनाअहा, तेहेलाम काबरात मा जाहा; काहाके ए गोठी ओवनारीज होय, पोन तेहेलाम सेवट ने ओवे. 8 काहाके देसोपोअ देस आन राज्यापोअ राज्य लोड़ाय कोए. जागजागे भुकंप ओवे आन काल पोड़े. ओं ते पिड़ाआ सुरुवात रोय.✝

9 "पोन तुमू सांबालित रोवा. काहाके माअहें तुमुहूं कोर्ठोम तोइत लेत जाय, आन तुमुहूं आराधनालयोअ सामने देय, आन माआं वाखरी तुमुहूं आधिकार्‍योअ आन राजहांआं सामने उबे कोए, एताआ काजे के तियांआं काजे साक्शी बोणुहूं जोवे. 10 पोन आखरी ओवीइलोअ पेल पुरी दुन्‍यामेहें हाजी बातमीइं परसार ओवुहूं जोवे. 11 जेहेलाम तें तुमुहूं लेत जात तोइत आपी देय, ताहां पेलूज रोत सिंता मा कोअहा के आमू कि कोहूं; पोन जों किबी तुमुहूं कोअलो ओय, तों तियीज वेले सुसना जोड़े तोंज कोजा; काहाके गोगनारे तुमू कायनाहां, पोन पवित्र आत्मा होय.✝ 12 पायहोहो पाही माईं देवाड़े, आन आब्हाहा बेटुह्हू माईंलाअ काजे तियाआ विरुद्दाम जाय, आन पोर्‍ये आयहीन-आब्हाअ विरुद्दाम उठीत कोइत तियांहां माआड़ी देय. 13 आन माआं नावसे तुमुहूं आखे माअहें निंदा कोए; पोन जो आखरी जाआं खेटीत रोय, तोज वासाय.✝

14 "कापारु सुटे एहेलिही खाराब वस्तु जिहीं ने जोवे तिहीं उबी रोल्‍यी तुमू पालहा, ‘वासनारो याअ अर्थ कि ओय तो समजीत लेअहूं जोवे,’✝ ताहां जो यहुदीयामेहें ओय तो डोगो पोअ जातो रोअहूं जोवे. 15 जो कोओपोअ ओय, तो तियाआ उसे रोत काविंहीं आनो निसे ने उतरुहूं जोवे आन ने कोअमेहें जाअहूं जोवे; 16 आन जो खेतोम ओय, तो तियाआ साअकाआ काजे कोअ ने जाअहूं जोवे.✝ 17 तियां दिहोम जे उंगलित रोल्यी बायी आन बुजी खावाड़ती ओय, तियींइं काजे दुखोअ गोठ होय! 18 आन देवोहो प्रार्थना कोआ के, ओं हियालाम ने ओवुहूं जोवे. 19 काहाके ते दिही एहेलाहा तारासोअ रोय के कोलीइ सुरवाती रोत, जे देवे बोणावयीही, तोयोंअ रोत ते ओमे जाआं नाहां ओवो आन ने केदिहीं ओवे.✝ 20 जर मालिख तियां दिहोहो ने कमी कोअतू, ताहां कोडोज ने वासाअतो; पोन तियां निवड़ीइल्या माअहोंअ काजे जियांहां तिये निवड़्येहे, तियां दिहोहो कमी कोअयाहा.

21 "तियां दिहोमेहें जर एखू तुमुहूं कोय, ‘पाला, ख्रिस्त इंहीं होय!’ नेते ‘पाला, तिहीं होय,’ ताहां भरिवसू मा कोअहा; 22 काहाके ख्रिस्तविरोधी आन ठोग भविश्यवक्ता उठे, आन निशाणी आन वोडे वोडे कामे कोइत देखाड़े के जर ओत सेके ताहां निवड़ीइल्याहां बी भटकाड़ी देय. 23 पोन तुमू सांबालित रोजा; पाला, आंय तुमुहूं आखी गोठी पेलूज रोत कोतापी देदीही.

24 "तियां दिहोमेहें, तिया तारासोअ फासाड़ी दिही आंदारावालू ओत जाय, आन सांद उजवड़ ने आपे;✝ 25 आन जुगोम रोत तारा निसे टुटीत पोड़े; आन जुगोमेर्‍यीइ सेक्ती आलवाईत जाय.✝ 26 ताहरेए माअहें माहुंउं बेटाह्हाहा वोडी सेक्ती आन महिमाआं आरी वाद्लामेहें आवत्लुज पाले.✝ 27 तियी होमसे तो तियाआ देवदुतोंहों मोकलीत कोइत, धरतीइ ये जोड़पे रोत जुगोअ तिये जोड़पे जाआं, शारी ओरी रोत देवोअ निवड़ीइल्या माअहुंहूं टोलू कोए.

28 "अंजिरोअ साड़ोप रोत ओं सिकाआ: जेहेलाम तियाआ डालीही डिरा फुटताहा आन पालो निहीत्लो देखतेहे, तेहेलाम तुमुहूं उनालू आहने आयू एहेलोह समजाअहे. 29 तेहेंज कोइत जेहेलाम ए गोठी ओवत्ली देखाय, ताहां जाईंत लेहा के ते वेल आहनेज होय नेताहां बाअणाज पोअ होय. 30 आंय तुमुहूं खोरीज कोहो के जाअहूं जाआं ए गोठी ने पुरी ओवे ताअहूं जाआं ए पिढ़ी ने आरवाय. 31 जुग आन धरती टोलीत जाय, पोन माआं गोठी केदिहींज ने टोले.✝

32 "तिया दिहोअ नेताहां तियी वेलेए बाप्तिम कोडाहाज नाहां मुंदू, ने होरगाआ देवदुतोंहों के ने बेटाह्हाहा; पोन आब्हाहा एतूज मुंदू होय. 33 पाला, जागते रोवा आन प्रार्थना कोअते रोवा; काहाके तुमुहूं नाहां मुंदू के ते वेल कोयों आवे. 34 ते वेल एहेलिही होय के, एखू माहुंउं दुर पोरदेस जाअली वेले कोअ सोड़ीत जाय आन तियाआ पावरोहो आधिकार आपे: आन आखाहा तियां तियांआं कामे वाटीत आपी देय, आन जागल्‍याहा जागतू रोय तेहें काजे आदेश आपे. 35 तियाहा काजे जागते रोवा, काहाके तुमुहूं नाहां मुंदू के कोओअ मालिख केती वेले आवे, हांजे पोअ, नेत पोरापोर रातीही, नेत कुकड़ाआ वांहेंअरी, नेत वेगीइ. 36 जर तो उसकाहीज आवे ताहां एहेलोह ने ओवुहूं जोवे के तुमू हुवत्लेज सापड़े. 37 आन जो आंय तुमुहूं कोहो, तोज आखाहा कोहो: जागते रोवा!"