1 ए कुनब्यों, उनाइत ते ल्या, तुमापोअ आवनारी पिड़ाआ वाखरी तुमू आअड़ी-आअड़ीइ रोड़ा. 2 तुमाअ धन बिगड़ीत गोयोहो, आन साअके ओदायो खात गोयोहो, 3 तुमाअ होनो-सांदी किट लागीत गोयोहो, आन ते किटे तुमाअ विरुद्दाम साक्शी आपे, आन आगीइ होस तुमाअ माहां खात जाय. तुमू यां सेलवार्‍याअ दिहोमेहें धन हेंगाल्योहो. 4 पाला! जियां मोजऱ्यां तुमाअ खेतोम काम कोअयो, तियांआं मोजरी जे तुमू रुकीत मिक्यीही, ते आअड़ीत रोड़ेहे; आन वाड्नाराआं रोड़ीइलोअ आवाज सेनाधीश प्रभुउ कानोम पोतीत गोयुहू. 5 तुमू धरतीपोअ मोज्यादान कोइत रोये आन वोडी मोज्या कोअयी; मांइलोअ काजे एखा बोकड़ाहा दाण आपीत पोहतेहे, तेहलेहे तुमू यां दिहोम सोताहा पोहाअयेहे. 6 धर्मीहीं तुमू दोशी ठरवित माइत टाक्यु, तो तुमाआं विरोद नाहां कोअतू.

7 तिहींवाईं माआं पाव्हीइलाआ, प्रभु आवे ताअहूं जाआं धिर खेटा. खेतोम काम कोअनाराहां पाला, तें जास्ती महत्वाआ ओन पाके ताअहूं जाआं सरुवातीइ आन सेलवाऱ्या वोऱ्हातोअ केहेलेहे वाट जोवित रोतेहे. 8 तुमू धिर खेटीत रोवा, आन सोताआ मोन मजबुत कोआ, काहाके प्रभु वेगु आवनारु होय.

9 पाव्हीइला, तुमू दोशी ने ठरुहूं जोवे काजे एकमेकाआ रोवा मा कोअहा. पाला, न्यायनिवाड़ु कोअनारु बाअणाआं जागे उबू होय. 10 माआं पाव्हीइला, जे भविश्यवक्ता प्रभुउ नावोवाईं गोग्या तियां तारास वेठ्यु आन तियां धिर खेट्यु याआ बाप्तिम तुमू नमुनू ल्या. 11 पाला, जियां दुख वेठ्यो तियांहां आपू हाजे मानतेहे. तुमू इयोबे केहेलुहू धिर खेट्यू तों उनाअयेहे, आन तियाआ बाप्तिमेऱ्युउ प्रभुउ उद्देश तुमू देख्युहू; यापोअ रोत प्रभु जाअखीलुहू मेरालू आन दयालू होय ओं तुमू समजीत लेदो.

12 माआं पाव्हीइला, आखाम रोत खास गोठ ए होय के, तुमू शप्पत मा खाहा; होरगाआ, धरतीइ नेताहां बिहीरा किहाआज बी शप्पत मा खाहा. तुमू होव ताहां होवजे आन नाहां ताहां नाहांज कोवा.

13 तुमामेहें एखु अड़सनीम होय के? ताहां तों प्रार्थना कोअहूं जोवे. एखु खुसीम ओय के? ताहां तो स्तुती गिते गावुहूं जोवे. 14 तुमामेहें एखु मांदवाड़्यो होय के? ताहां तों मंडड़ीइ सेवकोहो हादुहूं जोवे, आन ते सेवक प्रभुउ नावम तियाहा तेल लागाड़ुहूं जोवे आन प्रार्थना कोअहूं जोवे. 15 विश्वासो वाईं कोअल्यी प्रार्थना मांदवाड़्याहा हुदारी देय आन प्रभु तियाहा उठाड़े, आन तिये पाप कोअयुय, तेबी तियाहा माफी जोड़ीत जाय. 16 तियाहा काजे तुमू हुदरुहूं जोवे काजे जिवज्योअ पाप एकमेकाआ सामने कबुल कोइत एकमेकाआ काजे प्रार्थना कोआ. धर्मी माहुंउं प्रार्थना वाईं जास्ती वोडो काम ओवेहे. 17 एलिया बी आपाआ सारकोहो माहुंउं ओतो. तिये वोऱ्हात ने पोड़ुहूं जोवे कोत प्रार्थना कोअयी आन हाड़ा तिन वोरह्ये जाआं धरती पाईं ने पोड़्यो. 18 फाशीइ तिये प्रार्थना कोअयी. ताहां जुगोम रोत पाईं पोड़्यू आन धरतीपोअ ओन उबज्यो.

19 माआ पाव्हीइला, जर तुमामेहें एखु सत्यआ वाट सुकवात भटकीत जाये आन एखु तियाहा फेरवीत लेतावे, 20 ताहां तों एका जिवोहो मोतोम रोत वासाड़ीत लेये आन वारुज पाप टापाइत जाय.