1 माअहोंहों आधिकार्‍योंअ निसे रोयतेहें काजे सुसना कोई दे, आन तियांआं गोठी मानित सालुहूं जोवे, आन आखा हाजा कामोंअ कोअते तियार रोअहूं जोवे. 2 कोडाहा बदनाम ने कोअहूं जोवे, राड़गाट्ये ने जोवे; पोन ओलवा सोभावोअ रोअहूं जोवे, आन आखा माअहोंअरी वारुहूं हानाले रोअहूं जोवे. 3 काहाके आपू बी पेल विणहान्ये आन आदेश ने माननारे, आन सकरात रोनारे, आन आखी लालसोअ आन लोभोअ गुलामीम ओते, आपू आपाआ जिवन सीस आन जलन कोअतेज जिवतेते; बिहीरे आपुहूं सीस कोअतेते, आन एकमेकाआ विरोद कोअतेते. 4 पोन जेहेलाम आपाअ तारण कोअनारा देवोअ मेरवानी आन मेर मोनवीपोअ प्रगट ओवी, 5 तेहेलाम तिये आपुहूं वासाड़्या; आन ओं आपू कोअल्या हाजा कामोंअ वाअहीं नाहां, पोन तिये सोताआ दया वाअहीं पवित्र आत्मामेहें नविन जल्म आन नविन जिवनो वाअहीं ओवो. 6 देवे आपाआ तारनारा ईसु ख्रिस्ता वाअहीं आपापोअ पवित्र आत्मा जाअखीलुहू ओली देदू.✝3:6 योएल 2:28 7 जिया वाअहीं आपू तियाआ मेरवानी वाअहीं धर्मी ठरीत कोइते, अमर जिवनोअ आशावाअहीं वारिस बोणे.

8 ए गोठ खोरीज *3:8 मानुहूं जोगिहीहोय, आन माआं इश्शा होय के तू यीं गोठीइ बाप्तिमेहें वारुहूं गोगुहूं जोवे, काहाके जियां जियां देवोपोअ विश्वास मिक्युहू, तें हाजा-हाजा कामोम लागीत रोअलोअ ध्यान मिकुहूं जोवे. ए गोठी हाजी आन माहुंउं हाजाआ काजे होय. 9 पोन फालतु तोणाइलोअ, आन जुनीपुरानी राड़ आन भान्गड़्यी जे कायदाआ बाप्तिमेर्‍यीइ ओय, तियीं रोत सेटे रो; काहाके ते गोठी बिगर कामोंअ आन वायेज होय. 10 तुमामेहें फाटाफुट कोअनारा माहुंहूं एक नेत बेन वारी जाआं समजाड़ीत देखाड़, तिहीं रोत सेटेज रो. 11 ताहूं मुंदू होय के एहेलेहे माहें भटकीत गोयेहे, आन सोताहा दोशी ठरीत कोइत पाप कोअते रोतेहे.

12 जेहेलाम आंय ताआ जागे अरतिमासोहो नेताहां तुखिकुसोहो✝3:12 प्रेशित 20:4; इफिस 6:2,22; कलस्से 4:7,8; 2 तिम 4:12 मोकलिहीं, ताहां तु माआं जागे निकोपलीस आविइलोअ कोशित कोअजी, काहाके आंय तिहींज हियालू काडीइलाअ ठरव्योहो. 13 जेनास वकील आन अपुल्लोसोहो जारिक आगाड़ी जाआं पोताड़ीइलोअ कोअजा, आन पाल, तियांहां कीज कमी ने पोड़ुहूं जोवे. 14 आपाआ माहें बी गरज पुरी कोइलोअ काजेहे हाजा कामोम लागीत रोअलोअ टेवाअहूं जोवे, ताहां तें ठाल्ले ने रोनारे.

15 माआं आखा हाती ताहूं सलाम कोताहा. जे विश्वासो वाअहीं आमापोअ मेर कोअतेहें, तियांहां सलाम कोजी.

तुमा आखापोअ देवोअ मेरवानी ओवती रोअहूं जोवे.