Mateus 4

Yesu agezigwa

1 Muye ywa Mnungu niyo amwigalaga Yesu kwe dijangwa vileke akagezigwe nu Mwavu. 2 Eze ekale mazuwa milongo mine kilo na msi haheina kudya chochose, akeivaga sala. 3 Mgezi amwiiziilaga niyo amgamba, "Uneva kindedi weye ywi Mwana Mnungu, yagambe maiwe aya yande nk’hande."

4 Mna Yesu niyo amgamba, "Iwandikwa kugamba, Mnt’hu haaikwe ni kudya nk’hande du, mna naaikwe ni kiya akulonga Mnungu. "

5 Naho Mwavu niyo amwigala Yesu uko Yelusalemu, mzi ukukile, niyo amkweza kwo lunenengwa lwe Nyumba ya Mnungu, 6 Niyo amgamba, "Uneva ywi Mwana Mnungu, keduule hasi, kwaviya iwandikwa kugamba,

Mnungu naawagambe watumigwa wa kwe mbingu

wakupoele mwe mikono yawe,

vileke use kukakobadisa ikiga chako mwe diiwe. "

7 Yesu niyo amgamba, "Iwandikwa kugamba, Use kumgeza Zumbe Mnungu ywako. "

8 Mwavu niyo amwigala Yesu kwo mnima mtali, no kumlagisa useuta wose umwe isi hamwenga no uwedi wakwe utendedse. 9 Mwavu niyo amgamba, "Nohwink’he ivi vose," "uneva unanifikila madi na kunivika."

10 Yesu niyo amgamba, "Halawe aha, weye Mwavu! Iwandikwa kugamba, Umfikile madi Zumbe Mnungu ekedu, naho umdamanyile ndima yehe du! "

11 Niyo Mwavu amleka Yesu, watumigwa wa kwe mbingu wamwizilaga Yesu, niyo wamwambiza.