1 Pena kandahi mwangota mwakibha handa ntekujomokanga ligongo lya kulemwa na mabohu ginunji. 2 Gonigola muuda nkatamanga kwa kukagula hikubho hibohu ya bhandu bha chilambo chenjeni, na ntendita kwajoanikia atabhala abohu jwa mahoka jwa machili jwa kunani, lihoka jwaatawala bhandu bhangaajeketela Annoongo. 3 Twenga twabhoa kabhele tukatama handa bhenaangota, tukatama kwa kukagula kulokolila kwitu kwa pachilambo na kupangana hikubho yela hiikaibhajila mimele na luunda lwitu. Twenga tukapalikwa kulagiwa na Annoongo.

4 Nambo Annoongo jwabhii na kiha muno. Akatupala kwa upaliho nkolongwa muno, 5 hata handa tukibha handa tutekujomoka ligongo lya mabohu gitu, akatutenda tubhee akaamomi pamo na Akilisito. Kwa umbone gwa Annoongo mwangota ntekuokolewanga. 6 Kwa kulondanika na Akilisto Ayesu, Annoongo akatuyoa pamo na jonojwe ili tukatawale pamo na jonojwe kunani kwa Annoongo, 7 henela nga chibhakapala kulangia kwa bhandu machobha gagahika ukolo gwa umbone gwabhe jwabhakatupekea kwa ntima gwammbone mu kulondekana kwitu na Akilisito Yesu. 8 Maana kwa umbone gwabhe Annoongo ntekombolewanga kwa ndela ja kwahobhalela Akilisito, ngabha kwa hikubho yinu yammbone. Jenjeni nga ngwahupa kubhoka kwa Annoongo. 9 Wala ngabhokana na hikubho yinu mwaachinabhene, henela akotokubhee mundu jwa kuchilumbalila. 10 Maana Annoongo akatuhalakia twenga mu kulondekana na Akilisito Yesu, kupala tutame kwa kupangana hikubho yammbone, gabhatupanganikie kubhokela lolo ili tukombole kutama mu kutenda genago.

11 Bahi nkombokelange pena lolo mwa bhandu bhanga Bhayahudi, Bhayahudi bhakankemanga mwa bhandu, "Bhangahinwanga" Nambo bhenaangota bhabhachikemanga, "Bhandu bhabhatekuhinwa" Ligongo lya chenichela chibhatenditinge mu mimele jabhenji. 12 Machobha gala mwangota nkatamanga pangali kwaamanya Akilisito, nkibha mmekitwe kutali kubhoka kwa malubhalo ga Bhaisilaeli bhabhakibha bhandu bha Annoongo, nkibhanga akaageni mu genigala malagano gabhakalobhola Annoongo kubhee apakutenda. Nkatamanga pangali kulupalila na handa bhandu bhabhangaamanya Annoongo pachilambo pani. 13 Nambo nangocheni, kwa kulondanika na Kilisito Ayesu, mwangota mwakibhanga kutali na Annoongo pena kandai, nangocheni mmandikile kupetela ndela ja mihai ja Akilisito. 14 Kwa kubhee Akilisito mweene nga jwaatuletile kuhengwa kwitu, kwa kwaatendanga Bhayahudi na bhandu bhanga Bhayahudi bhabhee chilebhe chimo. Kwa kugubhoa mmele gwabhe akabhoa mpwato gugukatulekania handa likukumba. 15 Akagabhoa genigala Malagilo ga Amusa pamo na genigala goha gabhagakalagia ili abhatendange Bhayahudi na bhandu bhanga Bhayahudi bhabhee chilebhe chimo mu kulondekana na Akilisito, na kwa kutenda henela akatuletela kuhengwa. 16 Akagubhoa mmele gwabhe kubhee handa mbeeko, Akilisito akagubhoa upwati gwabhenji kwa ndela ja kujomoka kwabhe panchalaba, henela kwaatenda bhakamulane mabhako na Annoongo na kugatenda gena mabhoga gabhele na kubhee chilebhe chimo. 17 Bahi, Akilisto akahika na kutangacha Ngani Jammbone ja kuhengwa kwinunji mwa bhandu bhanga Bhayahudi bha bhammilinge kutali na Annoongo, na kabhele kwa Bhayahudi bhabhabhandikile na Annoongo. 18 Henela, kupetela Akilisito, twenga twabhoa Akayahudi na bhandu bhanga Bhayahudi, tutendakombola kwaajendela Atati kupetela Mboomo jwa Annoongo.

19 Bahi, mwangota mwa bhandu bhanga Bhayahudi ngabha akaageni na wala ngabha bhandu bha kupeta. Mwangota nga akaakola chilambo pamo na bhandu bha Annoongo, hela hela nga bhandu bha ulongo gwa Annoongo. 20 Mwangota hela hela ntekuchengwanga panani ja nchingi gugubhekitwe na akaandundame na akaalondohi, na bhena Akilisito bheene alandana na liganga likolongwa lilikamulila nyuumba. 21 Jonojwe nga jwalondanika nyuumba joha na kujitenda jibhee ngolongwa handa Nyuumba ja Annoongo mweene ligongo lya Hangwana. 22 Mu kulondanika na Akilisito, mwangota kabhele ntekuchengwangwa pamo na bhandu bhangi bhoa, mmangange nyuumba jibhatama Annoongo kupetela Mboomo jwabhe.