1 Nenga Apaulo junakatabhwa ligongo lya kwaatumikila Ayesu Kilisito na ligongo linunji mwangota mwa bhandu bhanga Bhayahudi, ndendakunnyopelanga kwa Annoongo. 2 Panga lipamba ntekujoanga kubhee Annoongo kwa umbone gwabhe atekumbekea lihengo hele lya kuntangachianga mwangota Ngani Jammbone. 3 Annoongo atekuhunukulila nigamanye gagachihite kwa kuhunukulilwa. Handa chinakalongolela kujandika kwa malobhe kachoko, 4 mwangota pampakuchoma malobhe gangu mpakombola kumanya henela chindendakumanya genigala gagatekuchiiya mu Akilisito. 5 Lolo bhandu bhangakongolelwa hikubho yeneyo hiitekuchiiya, nambo ngocheni Annoongo atekwahunukulila genago gagachihite akaandundame na akaalondohi bhakwe kupetela Mboomo jwabhe. 6 Genigala gagatekuchiiya nga gangani, kupetela Ngani Jammbone, Bhandu bhanga Bhayahudi bhapatitinge genigala gabhakalobhola Annoongo kubhee apakwapekea Bhayahudi, bhena bhandu nga yeega ya mmele gumo, na bhenaangota bhapakupokelanga genigala gabhakalobholelwa na Annoongo kubhee apakwapekeanga kupetela Ayesu Kilisito.

7 Ndekubhee antumichi jwa Ngani Jammbone kwa ndela ja umbone gubhatekumbekea Annoongo kupetela uwecho gwabhe nkolo. 8 Nenga naachokochoko kupeta bhandu bhoa bha Annoongo, nambo atekumbekea nenga umbone gwabhe, gwa kutangachanga Ngani Jammbone ja Akilisito kwa bhandu bhanga Bhayahudi umbone gwabhe Akilisito gwangalobholekwa, 9 na kwaatangachia bhandu bhoa bhalolange mpango gwa Annoongo gugutekuchiiya chikutendwa. Annoongo jwaatekuhalakia hilebhe yoa akahiiya yeniyela yangamanyikana kubhokela kandai, 10 ili ngocheni kupetela libhoga lya bhandu bhabhahobhalela Akilisito, akaamwenye na akaakola machili bha kunani kwa Annoongo bhamanyange malango ga Annoongo mu hikubho yoa, 11 Annoongo atendite chikubho hecho kwa ndela ja Akilisito Ayesu Hangwana bhitu, handa chibhakapala mweene machobha goa pangali kupela. 12 Bahi, kwa kulondanika na Akilisito na kwahobhalela, twenga tukombola kwaajendela Annoongo kwa kuhobhalela. 13 Henela, ndendakunyopanga nkotokuwee ntima kubhokana na chindendakulaga ligongo linu, kwa kubhee genago nga ligongo lya ukolo gwinu.

14 Ligongo helyo, ndendakwaajopa Atati Annoongo kwa kwaatindibhalila majugwa, 15 jonojwe nga ndaando ja hilebhe yoa ya kunani kwa Annoongo na pachilambo. 16 Ndendakwaajopa Annoongo akombole kunnekelanga machili mumitima jinunji kupetela Mboomo jwabhe, kubhokana na ukola hilebhe na ukolo gwabhe, 17 na ndendakwaajopa Akilisito atame mumitima jinunji kwa ndela ja kunhobhalela. Ndendakunnyopelanga kwa Annoongo goagola gantendanga gabhokele mu upalio gwa kweli, 18 ili mwangota pamo na bhandu bha Annoongo, muhimanyange henela Akilisito chibhatupala muno kwa upalio gwangapela. 19 Kweli, nkombolange kugumanya upaliho gwa Akilisito kupeta chibhamanya bhandu bhoa, ili bhoa nkombolange kutendangwa bhakukamilikanga muno kwa Annoongo.

20 Annoongo akombola kupangana hikubho yakangachika muno kupeta yeniyela hiitujoine na kuganikia, kwa ndela ja uwecho gwabhe gugupangana mahengo nkati jitu. 21 Alumbalilwe Annoongo kwa ndela ja kwahobhalela Akilisito na ndela ja Ayesu mweene kwa hibhelei yoa na machobha goa pangali kupela! Na jibhee henela.