1 Bahi, nenga jwandekubhee ntabhikwa ligongo lya kwaatumikila Hangwana, ndendakumpembeleanga ntamange handa chintekemwanga na Annoongo. 2 Mmangange mwabhandu bha kutongamanika, akaapole, nhimbalilanange na mpalanange mwangota kwa mwangota. 3 Nchimilange muno kubhee chilebhe chimo chichiletwa na Mboomo jwa Annoongo, mu kutama kwa kuhengwa kukuntendanga mmangange pamo. 4 Gubhile mmele gumo na Mboomo jimo, handa henela chintekemwanga mu kulupalila kumo. 5 Kabhele abhile Hangwana jumo, kuhobhalela kumo na kubatichwa kumo, 6 Abhile Annoongo jumo yakubhee nga Atati jwa bhoa, jwaatawala hilebhe yoa, mu yoa na nkati ya yoa.

7 Kila jumo jwitu atekupekewa umbone handa chibhapaalite Akilisito kumpekea. 8 Nga maana Majaandiko ga Annoongo galobhola,

"Pabhakajenda kunani muno,

akatola libhoga lya bhandu bhala bhabhatabhitwe na kwabhoa kubhee ngwahupa kwa bhandu."

9 Bahi, chiilobholekwa, "Akajaula kunani," jibhii na maana niki? Maana gakwe nga kubhee, akajemeka kutuluka mpaka pahi pachilambo. 10 Bahi, jonojwe jwaatekutuluka nga jwaakajaula kunani muno kupeta kunani koha ili akombole kubhee poha. 11 Nga jwaatekwaapekeanga bhandu ngwahupa, bhangi akabhatenda kubhee akaandundame na bhangi akaalondohi, bhangi bhabhangange bhabhatangachanga Ngani Jammbone na bhangi bhabhaatandaanga bhandu bha Annoongo na bhabhajigananga. 12 Akatenda henela akombole kwaabhekanga maha bhandu bhoa bha Annoongo ligongo lya lihengo lya kwaatumikila Akilisito ili bhakombole bhakamilika handa chigubhile mmele gwa Akilisito. 13 Henela, twabhoa tubhee chilebhe chimo mu kuhobhalela na kwaamanya muno Mwana jwa Annoongo, na tubhee bhandu tututekomala mu kuhobhalela na kuhikila kamilika kwa Akilisito mweene. 14 Bahi, tupakubheehopo handa bhaana hilemba, tubhikunokolwa kono na kono na kuhutwa na majigano ga namuna hijingi ga kwaatembanga bhandu, kwa kupenya na kwa kukagula ndela yabhenji ya kwaatembanga bhandu. 15 Nambo handa tupakugukagula ukweli kwa ntima gwa upaliho, tupakola mu Mboomo mu kwahikila Akilisito jwaabhile mutwe gwa mabhoga ga bhandu bhabhatekwahobhalela jonojwe. 16 Kwa kutandahikwa na Akilisito, yeega yoha ya mmele hitendakamulana pamo kwa linaanga, na mmele goha gukulupalila kujangatilwa na yeega yabhe. Bahi, kila cheega chibhikupangana lihengo lyabhe handa chiipalikwa, mmele goha gutendakola na kuchichenga mu upaliho.

17 Bahi, kwa ukolo gumbekiwe na Hangwana ndendakunkelebhuanga, nkotokutamanga kabhele handa bandu bhangaamanya Annoongo, bhabhatamanga kongo bhabhikuganikia hikubho yabhe hibohu. 18 Bhena bhandu luunda lwabhenji lutekubhee mulubhendu. Bhabhile kutali na umomi gwa Annoongo ligongo lya upumbavu kwabhenji kukubhile nkati jabhenji na kutauka kwabhenji. 19 Bhatekuhobhanga na bhanga honi, bhatekuchibheka mu hikubho hibohu, na kupangana hikubho hiyakwa, pangali kuleka.

20 Nambo mwangota mwangachijigana henela, kwa ngani ja Akilisito. 21 Kweli ntekujoanga maha kwa ngani ja Ayesu na mwangota nga bhabhachijigana bhabhe, nkajiganwanga majigano kwa ngani ja Akilisito. 22 Nkajiganwanga nnekange ganigela gabohu gantenditinge lolo handa mundu chibhuahula ngobho, hikubho yela hiitendita kuhabiliwa na kulokolila kwa unami. 23 Mitima na malango ginunji gagalambuke kubhee gayono. 24 Bahi mmangange na umomi guyono, handa henela Annoonga chibhammombitinge nnandane nabho, mmi bhammbone muno nnoongi jabhe na kutama chiipalikwa.

25 Henela nnekange kulongela unami! Kila mundu annobholele nnyakwe ukweli, maana kila jumo jwitu nga chiega cha mmele gwa Akilisito. 26 Handa mpakuchimwanga, nkotokoonda lilaka linu lintendange mpangane mabohu, ngapena nkotokutama na lilaka kwa lichobha lyoa. 27 Kutumbala kumpekea Lichetani upenyo gwa kunchindanga. 28 Jonijola mundu jwaakibha abhwii, akaotokujibha kabhele, nambo ajemeke kupangana lihengo lyammbone kwa mabhoko gabhe, akombole kupata chilebhe cha kunnyangatila mundu jwaabhile ahocho. 29 Nkotokulongelanga malobhe gabohu, nambo nnongelange malobhe gammbone ga kwajangatila bhangi, kulandana na henela chibhapalanga, ili gabhajangatile bhangi bhabhanyohanikianga. 30 Nkotokunhumalia Mboomo jwa Annoongo, kwa kubhee Mboomo jonojwe nga amana ja Annoongo kwaachinunji kubhee mwangota nga bhandu bhabhe, na kulangia kubhee lichobha lipakuhika lya Annoongo kunkomboanga mwangota. 31 Bahi, nnekanange na mpwato na kutumbala na lilaka na nyenye na maligo. Nnekanange na kila ubohu. 32 Mmangange na ntima gwammbone na gwa kukolelana kiha, kila mundu na annekelele nnyakwe handa Annoongo chibhatekunnekelelanga mwangota, kupetela Akilisito.