1 Mwangota nga Annoongo bhaana bhabhe jwaampalanga muno, henela nchimilange handa jonojwe. 2 Ntamange kwa kupalana, handa henela Akilisito chibhatekutupala twenga akachibhoa ligongo litu kubhee mbeeko ja kunungila muno na mbeeko jijaabhajila Annoongo.

3 Mwangota nga mwabhandu bha Annoongo, henela ngongola na hikubho hibohu yoayela na kulokolila kupanga hikubho hibohu hikotokubhee pakati jinunji. 4 Kabhele pakotokubhee na malobhe gaakwa ga honi, au malobhe ga upuuzi au malobhe ga kutaukana yakubhee ngabhali gammbone, nambo mulongelenge malobhe ga kwaachukulu Annoongo nga gagapalikwa. 5 Kwa ngani ja hikubho heye muimanyange kweli kubhee, mundu joajola jwaapangana ngongola, au mundu ahakwa au mundu abohu au mundu joajola jwaabhii jwa kulokolila, mundu jwaalokolila alandana na mundu jwaachalila chidimu, ngapata ng'o choachela mu umwenye gwa Akilisito na gwa Annoongo.

6 Mundu joajola akatokuntembanga kwa malobhe gangali kweli, kwa kubhee lilaka lya Annoongo litendakwaahikila ligongo lya hikubho handa yenjeni kwa bhenibhala bhandu bhabhangaajeketela Annoongo. 7 Henela, nkotokuchikichana na bhandu bhabhapangana hikubho handa yeneyo. 8 Pena lolo mkiibha mulubhendu kwa kubhee mkibhanga mwangaamanya Annoongo, nambo nangocheni mwangota mmi munhana ligongo mummanyanga Annoongo kwa kulondekana na Hangwana. Mtamange henela chibhapala Annoongo. 9 Kwa kubhee kutama munhana kutenda kuleta umbone ukweli na kutama kwa kupangana hikubho hiikondekwa nnoongi ja Annoongo. 10 Nchimilange kugamanya genigala gabhaabhajila Hangwana. 11 Nkotokupangananga hikubho yela ya mulubhendu yangapalikwa, nambo mugabhekange palundwanje. 12 Kwa kubhee gagapanganwa mulubhendu, nga honi hata kugalobhola. 13 Nambo kila chilebhe chichibhekitwe palundwaje hitendakubhonekana pandaa, 14 kwa kubhee kila chilebhe chichitekuhunykylilwa chibheenga gutenda kila chilebhe chibhonekane. Nga maana hilobholekwa,

"Nnyimuke mwenga mwang'olwike,

nhyoke kubhoka kukujomoka,

pena Akilisito apakummulikila."

15 Bahi mmangange maha henela chintamanga. Nkotokutamanga handa bhandu bhanga malango, nambo handa bhandu bhabhabhilinge na malango. 16 Ntumilange maha muuda gumupatite kwa kupangana hikubho yammbone, kwa maana machobha gangani nga gabohu. 17 Henela nkotokubhee akaajinga, nambo nnyigange kugamanya genigala gabhapala Hangwana. 18 Kabhele nkotokolelwa ugembe kwa kubhee ugembe gonogwe gupakuntendanga mpanganange hikubho ya honi, ila ntandaikwange na Mboomo jwa Annoongo. 19 Nnyembange minyembo ya Zabuli, minyembo ja kulumbalila na minyembo jeengi jijitandahikwa na Mboomo jwa Annoongo. Munnyembelange na kwaalumbalila Hangwana kwa mitima jinunji joa. 20 Mwaachukulu Annoongo Atati machokobha mu kila chilebhe kupetela lihina lya Hangwana bhitu Ayesu Kilisito.

21 Kila mundu antopee nnyakwe, ligongo ntendakwaatopea Akilisito.

22 Mwangota akaahanu mwaajeketelange akaanalome bhinu handa chimwaajeketela Hangwana Ayesu. 23 Kwa kubhee mwanalome nga nachilongola kwa hanu bhabhe handa henela Akilisito chibhatekubhee nachilongola mu libhoga lya bhandu bhabhahobhalela, yakubhee nga mmele gwabhe, na jono Akilisito nga Akombohi jwa mmele gwabhe. 24 Handa henela libhoga lya bhandu bhabhahobhalela Akilisito chilitendakwaajeketela Akilisito, hela hela akaahanu bhabhaajeketelanga akanalome bhabhenji mu hikubho yoa.

25 Mwangota akaanalome, mwaapalange akahanu bhinu handa henela Akilisito chibhatekulipala libhoga lya bhandu bhabhahobhalela jonojwe kwa kuchibhoa mweene mmele gwabhe. 26 akatenda henela ili kwa lilobhe lyabhe, kwaatendanga kubhee bhandu bha jika mu libhoga lya bhandu bhabhahobhalela Akilisito kubhee lya kuhalala kwa kulijelejea lilobhe lyabhe kwa machi, 27 ili akombole kuchipatila lilubhalo lya bhandu bhabhahobhalela Akilisito lilibhekitwe ligongo lya Annoongo, lyanga kulemwa kohakola, na chilebhe choachela chichilandana na genago. 28 Bahi, akanalome bhabhapalange akahanu bhabhe handa chibhahipalanga mimele jabhenji akaachinabhene. Jaapala hanu bhabhe achipala mweene. 29 Kwa maana jwaakwa mundu joajola jwaatendakuguchimwa mmele gwabhe, nambo bhatendakugulia na kuguweka ngobho. Henela nga Akilisito chibhalitendela lilubhalo lya bhandu lilyaahobhalela jonojwe, 30 kwa kubhee twenga jika nga yeega ya mmele gwabhe, 31 Handa chiitekujandikwa mu Majandiko ga Annoongo, "Ligongo helyo mwanalome apakwaaleka atati mundu na anyongo mundu bhabhe, na jonojwe apakulondanika na hanu bhabhe, na bhena bhabhele bhapakubhee mmele gumo." 32 Gagatekuchiiya nga makolongwa, nambo nenga ndendakulongela kwa ngani ja Akilisito na libhoga lya bhandu lilyaahobhalela jonojwe. 33 Nambo ganga Majandiko nga ligongo linunji kabhele, kila mwanalome apalikwa kwaapala hanu bhabhe handa chibhatendakuchipala mweene, na jonojwe hanumundu apalikwa kwaajeketela hangwana bhabhe.