1 Pagakapeta machobha gajingi Ayohana ambatichaji bhakapitila, bhakajemeka kutangacha lilobhe lya Annoongo mu likonja lya kuchilambo cha Yudea bhakatangacha bhabhi kulobhola, 2 "Mutendebhukange na kugalekanga mabohu ginunji, kwa kubhee Umwenye gwa Annoongo gutekubhandikila." 3 Habha nga Ayohana nga bhenibhala yakubhee Alondohi Aisaya bhakalobhola nnani jabhe pabhakalobhola,

"Mundu atenda kema kubhoka kulikonja,

‘Nhalakihange ndela ligongo lya Hangwana,

nchibhekange maha kwaapokela Hangwana.’"

4 Ayohana akawala ngobho jijikatotwa kwa manjoja ga chinyama jwakemitwa ngamia, na akachitabha nkanda gwa limbendela mu chibhuno chabhe. Chakulya chabhe chikabhee mapalale na bhuchi. 5 Bahi, bhandu kubhoka mu chilambo cha Yelusalemu, na kubhoka kuchilambo cha Yudea, na hilambo yoha kubhandikila na loochi lwa Yoludani, bhakaajabhulila, 6 na jonojwe bhakagalekanga mabohu gabhenji na kwabhujila Annoongo, na jonojwe Ayohana akabhabatichanga mu loochi lwa Yoludani.

7 Nambo Ayohana pabhakabhabhonanga Mafalisayo na Masadukayo bhajingi, bhabhikuhikanga ligongo lya kubatichwa, akabhakonyanga, "Mwangota chibhelei cha lijoka, Nga aganiki jwannobholile mujibhutuke hukumulo ja Annoongo jijihika? 8 Ntendange kwa hikubho kulangia yakubhee ntekugalekanga mabohu ginu. 9 Nkotokuganikiha na kuchilobholelanga, mu mitima jinunji yakubhee, ‘Atati bhitu nga Aaibulahimu!’ Ndekunnobholelanga kweli, Annoongo akombola kugatendebhua maganga haga kubhee bhaana bha Aaibulahimu. 10 Bahi libhago libhekitwe maha mu mikega ja mikongo, henela kila nkongo gwangaogola mbeju jammbone gupakuheketwa na kugujeha pa mooto. 11 Nenga ndenda kumbatichanga kwa machi na kulangia kubhee ntekugalekanga mabohu ginu. Nambo jwaapakuhika baada ya nenga atekubhee na machili kupunda nenga, na nenga ngakombola hata kuipetula hilatu yabhe. Jonojwe apakumbatichanga kwa Mboomo jwa Annoongo na kwa mooto. 12 Jonojwe akamwile mmabhoko gabhe chipalo ligongo lya kupetela mapemba gabhe, na jono apakupyagila lubhagala lwabhe lwa kupetela mapemba, apakuumba na kubheka mapemba mu ngokwe, na mapoi agajoche kwa mooto gwangahimika."

13 Gono muda Ayesu akabhoka kuchilambo cha Galilaya na akahika mu loochi lwa Yoludani, ligongo lya kupala kubatichwa na Ayohana, 14 Nambo Ayohana akajiga kwaahibhila abhi kwaalobholela, "Mwenga nhika kwaachangu kupala nimbatiche?" Nenga mbala kubatichwa na mwenga.

15 Nambo Ayesu akajangula, "Nneke tu nangocheni jibhee henela, maana nga chijipalikwa kwa jenje ndela kutama nago genigala goha Annoongo chibhagapala." Penapo Ayohana akakoonda.

16 Popopo Ayesu paakabatichwa, akabhoka mmachi, penapo kunani kwa Annoongo kukajogoka, na jono akajibhona Mboomo ja Annoongo chijitenda kutuluka kubhoka kunani handa nguunda na kutoola nnani jabhe. 17 Lilobhe kubhoka kunani kwa Annoongo likajohanika libhi kulobhola, "Hojo nga mwana jwangu junampala, ndekubhajilwa nabho."