1 Ayesu paakatuluka kubhoka palitombi, lilubhalo likolongwa lya bhandu bhajingi likaakagula. 2 Bahi, akahika mundu jumo atamwa mambujupuju, akaatindibhalila majugwa na kwaalobholela, "Hangwana, handa mpalite, nkombola kulamia nenga!"

3 Ayesu akanyulula lubhoko lwabhe na kunkwaa na kulobhola, "Ndenda kupala! Nname." palapala jono mundu akalama mambujupuju gabhe. 4 Ngapena Ayesu akaalobholela, "Nnole nkoto kunnobholela mundu joajola, nambo nnyaule kwa akaakung'i na kubhoa ngwahupa jijikahukumulikwa na Amusa ili kwaalangia yakubhee ntekulama."

5 Ayesu paakahika pannyini ku Kafalanaumu, akolo jumo bha manyemba ga ku Lumi akaajendelela na kwaapembelela anyangatile. 6 Kongo abhi kulobhola, "Hangwana, antumichi jwangu atekugoloka kaaja atamwa muno na atekupola."

7 Ayesu akaalobholela, "Mbakuhika kwaalamia."

8 Jonojwe akolo bha manyemba ga ku Lumi akaalobholela Ayesu, "Hangwana, ngapalikwa mwenga nnyingile mu nyuumba jangu. Nambo nlagie tu lilobhole limo na antumichi jwangu apakulama. 9 Kwa kubhee nenga na mwene nga mundu nibhekitwe pahi ja mamulaka, ngweti manyemba pahi jangu. Handa mbakwaalobholela hojojo, ‘Nnyaule,’ na jonojwe apakujaula. Na jongi handa naalobholile, ‘Nhike,’ jonojwe atenda kuhika. Na handa mbakwaalobholela antumichi jwangu, ‘Npangane henela,’ na jonojwe apakungana."

10 Ayesu paakajoha genago, akakangacha muno, akabhalobholelanga bhandu bhabhakibha bhaakagula, "Ndendakunnobholelanga kweli, nangapata kummona mundu joa jola mu chilambo cha ku Isilaeli jwakuhobhalela muno handa jonojwe. 11 Bahi ndendakunnobholelanga yakubhee bhandu bhajingi bhapakuhika kubhoka kuulabho na kuuwelo, na bhenaangota bhapakutamanga ili bhalyee pamo na Aaibulahimu, na Aisaka, na Ayakobo mu Umwenye gwa kunani kwa Annoongo. 12 Nambo jonijola yakubhee Umwenye gonogwe gwa Annoongo nga gwabhenji bhapakwaajeha panja, palubhendu, konokwe bhapakugutanga na kuyaga mino." 13 Kubhoka penapo Ayesu akaalobholela jonojwe akolo bha manyemba ga ku Lumi, "Nnyaule kwaachinu na ibhee handa chinhobhalile."

Na antumichi bhabhe akalama muda gogogo.

14 Ayesu akahika kwaachabhe Apetulo, akaakolela akibhabhe haikege agolwike pachindanda, atenda kulwala muno. 15 Bahi, Ayesu akaakamula lubhoko jonjijola haikege, na akalama akajema na kujemeka kwabhekela tayali chakulya.

16 Pajikahika kimuho, bhakaaletela bhandu bhajingi bhabhakibha na mahoka, na jonojwe Ayesu akaakulumikihanga mahoka gabhoke kwa bhandu. Kabhele akaalamia bhandu bhoa bhabhakibha akaatamwa. 17 Akatenda henela kupala genigala malobhe gaakalongela alondoi jwa Annoongo jwakeemitwa Aisaya galenganile, "Jonojwe mweene atekutupetula na kupongokewa kwitu, na atekuhipetula itamwa yitu."

18 Ayesu paakalibhona lilubhalo likolongwa lya bhandu litekwaatindila, nga akaakulumikia bhabhachijigina bhabhe bhajombokange kujenda kuntundu ja litanda. 19 Bhabhajigana jumo bha Malagilo ga Amusa akaajendelela Ayesu na kwaalobholela, "Bhannyigana, nenga mbakunkagula koha kola kumpakujenda."

20 Ayesu akaajangula, "Mabwea gakweti macheembo, na hijuni hikweti hiyua, nambo mwana jwa mundu akwetihopo chehemu ja kupomolelela."

21 Ngapena mundu jumo nkati ja bhabhachijigana bhabhe bhakaalobholela Ayesu, "Hangwana, naanjinu nneke oti ngaachike Atati bhangu."

22 Nambo Ayesu akaalobholela, "Nkagule nenga! Nneke bhandu bhabhabhilinge handa bhajomwike bhachikane na bhabhawilinge akaajabhe."

23 Ayesu akakwela mu meeli, na bhabhachijigana bhabhe bhakaakagula. 24 Mala mboongo ngolongwa jikabhokela mulitanda, na mawimbi gakajemeka kujipukunyapukunya meeli. Na muda gonogwe Ayesu abhi tangu agolwike lugono. 25 Bhabhachijigana bhakaajendelela na kwaajimua, bhabhi kulobhola, "Hangwana ntuchobhole." "Tutendakujomoka!"

26 Ayesu akaajangulanga, "Mwe mwangota mmilinge na kuhobhalela kuchoko!" "Mboni ntenda kujogopanga?" Bahi, akajinuka na akajikalipila mboongo na mawimbi, na mboongo jikakotoka.

27 Bhandu bhoa bhakakangachanga, bhabhi kulobhola, "Nga mundu jwa namuna niki hojojo?" "Hata mawimbi na mboongo jitendakwaajohanikia!"

28 Ayesu paakahika ku chilambo cha bha ku Gadala, kuntundu ja litanda, na konokwe bhandu bhabhele bhabhakapoganikwa na mahoka gabohu bhakakongana nabho bhabhi kubhokanga kumakabuli. Bhandu habha bhakibhanga bhakalipa muno, hata pangabhee na mundu jwakajiga kupeta mu ndela jenejo. 29 Bhenaangota bhakajemeka kupotanga nyenye, "Mmi na niki na tweenga, mwe Mwana jwa Annoongo? Bholi, ntekuhika kutulagia tangu muda gwangahika?"

30 Kubhandikila na penapo pakibha na magolobhe gajingi bhatendita kugaliyanga. 31 Bahi, genago mahoka gabohu gakaapembelela Ayesu, "Handa mpakutubhoa, bahi ntuluke tukagajingile magolobhe gala."

32 Ayesu akaalobholelanga, "Nnyaulange, penapo bhakabhokanga kwa bhenibhala bhandu, na kujingila mumagolobhe gala. Lilubhalo lyoa lya magolobhe likabhutukila mu chihelelo chikolongwa, likajingila mu bahali, magolobhe goa gakawee na machi."

33 Bhenibhala bhandu bhabhalanga genigala magolobhe bhakabhutukanga na bhakajaula kunnyini, konokwe bhakakongolela ngani joha jijikapetela kwa bhenibhala bhandu bhabhi na mahoka. 34 Kubhoka penapo bhandu bhoa bha pannyini bhakabhoka na kwaajendelela Ayesu, na pabhakaabhona bhakaapembelela bhabhoke pachilambo chabhe.