1 "Nkotokwaahukumulanga bhandu bhangi, na mwangota mpakuhukumulwa na Annoongo, 2 maana chimpakunhukumula nnyinu na mwangota chimpakuhukumulwa, na chipemelo chela chela chimpakupemela bhandu nga chochocho Annoongo nga chibhapakunpemelanga mwangota. 3 Kwaniki muchibhona chipande chichoko chichibhile mu lio lya anung'una jwinu, na kongo chipalapata chichibhile nkati ja lio linu ngachilola? 4 Nkombola bholi, kunnobholela anung'una jwinu, ‘Anung'una bhangu, nnende nimmoe chipande chichoko mu lio linu na kongo mwabhene nkweti chipalapata mu lio linu? 5 Mwe andendemundu! Nnyemeke kubhoa chipalapata chichibhile mu lio linu, penapo nga pampakombola kulola kweli chimpakwaabhoa chipande chichibhile nkati ja lio lya anung'una bhinu.’"

6 "Nkoto kwaapekeanga bhandu hilebhe yammbone ya Annoongo, wala nkoto kwaajelea magolobhe hilebhe yammbone kwa kubhee bhapakuilebhatanga."

7 "Nnyopange, mwangota mpakupatanga, nnoleange na mwangota mpakupatanga, nng'ombange pannyango, na mwangota mpakujogolelwa. 8 Kwa maana mundu joa jola paajopa atendakwaapekea, na joa jola jwalolekea apekewa, na joajola jwagomba pannyango ajogolelwa. 9 Bholi, abhi mundu nkati jinu handa mwana jwabhe jwaajopite nkate, apakwaapekea liganga? 10 Handa aajopite litobhi, apakwaapekea lijoka? 11 Mwangota bhammilinge mwaabohu, nambo mmanyanga kwaapekea bhana bhinu hilebhe yammbone, nga henela Atati bhinu bhaabhile kunani kwa Annoongo apakumpekeanga yammbone muno bhenibhala bhabhaajopa."

12 "Mwatendelange bhandu bhangi handa chimpalanga bhantendelange mwangota. Hejeje nga maana ja Malagilo ga Amusa na majigano ga Akaalondoi bha Annoongo."

13 "Nnyingilange kupetela nnyango gwa kunying'inyala, ligongo ndela jijijaula kwahobheanga bhandu nga jitekupanuka, na nnyango gwa kujingila monomwe nga gutekupanuka, bhabhajaula mu ndela ejo nga bhajingi. 14 Nambo ndela jijijaula mu umomi nga jakunying'inyala, na nnyango gwa kujingila monomwe nga gwakunying'inyala, nga bhandu kachoko bhakombola kujimanya jene ndela."

15 "Nchibhekange kutali na akaalondoi bha unami. Bhenaangota bhaikanga kwaachinunji bhabhi kubhonekana panja handa ngondolo, nambo nkati jabhe nga mamei gagahika kunhulaanga. 16 Mpakubhamanyanga kwa hikubho yabhe. Bholi, bhandu bhakabhanga zabibu mu nkongo gwa miibha, au mbendembe mumkongo gwa mpengo? Ngabha! 17 Bahi, nkongo gwammbone guogola matunda gammbone, na nkongo mbohu guogola matunda mabohu. 18 Nkongo gwammbone ngakombola kuogola matunda gabohu, wala nkongo mmohu ngakombola kuogola matunda gammbone." 19 Kila nkongo gwangaogola matunda gammbone gupakueketwa na kulekelwa pamooto. 20 Henela, mpakubhamanyanga akaalondoi bha unami kwa hikubho yabhenji.

21 "Ngabha kila mundu jwaangema nenga, ‘Hangwana, Hangwana,’ apakujingilanga mu Umwenye gwa kunani kwa Annoongo, nambo jonijola jwapakupangananga chibhapala Atati bhangu jwabhile kunani kwa Annoongo. 22 Bhandu bhajingi bhapakunobholela nenga lichobha lyela lya kuhukumula, ‘Hangwana, Hangwana! Kwa lihina linu tukatangacha ngani jinu kwa bhandu, na kupetela lihina linu tukaabhoanga bhandu mahoka na kupangananga gajingi gakangachika!’ 23 Penapo mbakunnobholelanga, ‘Nimmanyanga hopo mwangota, mmokange kwaachangu, mwenga mwaangota akaabohu!’"

24 "Henela, kila mundu jwajoha malobhe gangu na kugakamula, alandana na mundu jwaabhile na luunda, jwaachengite nyuumba panani ja liganga. 25 Handa hula jipakoma na loochi lukatweelela machi, na handa mboongo ngolongwa jipakuhika na kujipota jela nyuumba. Nambo jangagwee kwa kubhee jikachengwa panani pa liganga."

26 "Nambo mundu joa jola jwajoha malobhe gangu na kugaleka, atenda kulandana na mundu jwapoganike jwakachenga nyuumba jabhe panani ja mihanga. 27 Hula jikakoma, machi gakatweelela mu loochi, na mboongo ngolongwa jikapoga na kujipota nyuumba ejo, nga jikagwee, na nhindo gwakwe gukibha nkolongwa muno."

28 Ayesu paakajomola kulobhola malobhe genago, lilubhalo likolongwa lya bhandu likakangachanga kwa genigala majigano gabhe kwa bhandu. 29 Kwa kubhee akajigana handa mundu jwabhile na uwecho, wala ngabha handa bhabhajigana Malagilo ga Amusa.