1 Ayesu paakagabhona malubhalo ga bhandu, akakweela nnani ja litombi akatama konokwe. Bhabhachijigana bhabhe bhakaajendela, 2 penapo akajemeka kwaajigananga,

3 "Bhapakuachukanga bhenibhala bhabhaalolea Annoongo,

kwa kubhee umwenye gwa Annoongo nga gwabhenji.

4 Bhapakuachukanga bhenibhala bhabhaumalanga nangocheni

kwa kubhee Annoongo bhapakwaapembelea.

5 Bhapakuachukanga bhabhabhii bhakutongamanika

kwa kubhee bhapakwapekeanga chilambo chibhee chabhenji.

6 Bhapakuachukanga bhabhapalanga muno kutenda gabhagapala Annoongo,

ligongo Annoongo bhapakwajangatilanga kutenda henela.

7 Bhapakuachukanga bhenibhala bhabhakolela kia bhangi,

kwa kubhee Annoongo bhapakwaabhonela kia.

8 Bhapakuachukanga bhabhabhilinge na ntima gwa kualala,

kwa kubhee bhapakwaabhona Annoongo.

9 Bhapakuachukanga bhenibhala bhabhakamuanga bhandu,

kwa kubhee jonojwe bhapakemwa bhaana bha Annoongo.

10 Bhapakuachukanga bhabhapotekwa ligongo lya kutenda gagapalikwa na Annoongo,

kwa kubhee umwenye gwa kunani kwa Annoongo nga gwabhenji."

11 "Ntekuachukanga mwangota handa bhandu bhapakuntukananga, kongo bhabhi kunnagianga na kumkopokeanga kila namuna ja ubohu ligongo lya nenga. 12 Nhachukange na kuhangalala kwa kubhee ngwahupa jinunji nga ngolongwa kunani kwa Annoongo. Henela nga chibhakaatendelanga akaalondoi bha Annoongo jwakibha tangu ja mwangota."

13 "Mwangota nga ngeleka pakati ja bhandu pachilambo. Nambo ngeleka handa jihobhite kunong'a kwabhe jipakunong'ea niki? Ngapalikwa kabhele, nambo kujijea panja na kulebhatikwa na bhandu."

14 "Mwangota nga lumuli lwa chilambo. Mwangota nga handa nyuumba jijichengikwe nnani ja litombi ngakomboleka kuchiiya. 15 Na bhandu ngajaakiha taa na kujibheka pachitombenga. Badala jabhe bhakalubheka lumuli kunani kundepela, na jenejo jikamulikila kwa bhandu bhoa mu nyuumba jela. 16 Hela hela, lumuli lwinu lugumulikile nnoongi ja bhandu, ili bhapate kugabhona mahengo ginu gammbone, bhaalumbalile Atati bhinu jwabhii kunani kwa Annoongo."

17 "Nkoto kuganikiha ndekuhika kubhoa malagilo ga Amusa gabhapatite kubhoka kwa Annoongo na majigano ga akaalondoi bha Annoongo, ila ndekuhika kunnangianga genago malagilo nga ga kweli. 18 Ndendakunnobholelanga kweli, mpaka penapo lihunde na chilambo pachipakupeta, chaakwa hata chipande chichokochoko cha malagilo ga Amusa chichipakuhutwa mpaka goha gateendeke. 19 Bahi, mundu joajola jwangajeketela hata lilagilo limo lichoko, na kwaajigana bhangi bhatendange henela, jonojwe apakubhee achoko muno mu umwenye gwa kunani kwa Annoongo. Nambo jonijola jwapakujeketela malagilo ga Annoongo na kwaajigana bhajingi jonojwe apakubhee akolo mu umwenye gwa kunani kwa Annoongo." 20 Ndenda kunnobholelanga kweli, handa ngatenda maha hikubho hiyaabhajila Annoongo handa chibhatendanga bhabhajigananga malagilo ga Amusa na Mafalisayo, ng'o ngajingilanga mu umwenye gwa Annoongo.

21 "Ntekujohanikia yakubhehe bhandu bha lolo bhakalobholelwanga, ‘Nkotokoma!’ Joajola jwapakoma apakuhukumulwa. 22 Nambo nenga ndendakunnobholelanga, joajola jwapakwaachimwa anung'una jwabhe apakuhukumulwa. Na joajola jwapakwaabhelua anung'una jwabhe na kwabhona ngabha chilebhe apakuchitakiwa kwa annyumbe. Na jwapakwaakema anung'una jwabhe, ‘Apumbavu,’ apalikwa kujingila mu lihembo lya moto gwangahimika machobha goha. 23 Bahi, handa mpeleka mabhokeo ginu nnoongi ja Annoongo, ngapena nkombokela anung'una bhinu abhi na bulwa na mwenga, 24 mmoe mbeeko jinu nnongi ja Annoongo, mmuje nkwelekane na anung'una bhinu, ngapena mmuje nnoongi ja Annoongo kubhoa mabhokeo ginu."

25 "Nkwelekane na apwati bhinu muda mmi nndela pamo na jonojwe kujaula kwa annyumbe. Apwati bhinu bhapakunpeleka kwa annyumbe, na jonojwe annyumbe bhapakunpeleka kwa linyemba, na mwenga mpakutabhikwa mu nyuumba ja kutabhila bhandu. 26 Ndendakunnobholela kweli, mmokahopo monomwe mpaka nnyomole kulepa ulohi gwoha."

27 Ayesu akapunda kulongela, "Ntekujohanikianga yakubhehe bhandu bhatekulobholelwa, ‘Nkotokutendanga ngoongola!’" 28 Nambo nenga ndendakunnobholelanga, joajola jwakunnola mwikege kwa kunnokolila, bahi atekutenda ngongola na jonojwe mwikege muntima gwabhe. 29 Bahi, handa lio linu lya kunnelo linyambukie kutenda mabohu, mulibhoe na mulijee kutali. Mbaya muno kwaachinu kuchihobha chiungo chinu cha mmele gwinu, kuliko mmele gwinu goa kulekelekwa mu litanda lya mooto gwangahimika machobha goa. 30 Handa lubhoko lwinu lwa kunnnelo lunyambwie kutenda mabohu, muluhekete na kulujea kutali. Mbaya kwaachinu kuhobha chiungo chimo cha mmele gwinu, kuliko mmele gwinu goa kujingila mu lihembo lyangapela.

31 "Jijaandikwe mu majaandiko ga Annoongo, ‘Mundu joajola jwaapala kwaaleka hanu bhabhe, apalikwa kwaajandikila talaka.’" 32 Nambo nenga ndendakunnobholelanga, "Mundu handa apala kwaaleka hanu bhabhe ligongo lya lyohalela na ngabha ligongo lya ngoongola, atendakwatenda mwikege jonojwe kubhee jwa ngoongola, na jonojwe jwaapakwaalombela mwikege jonojwe jwaalekitwe na jono atenda ngoongola."

33 "Ntekujohanikianga yakubhee bhandu bha lolo pabhakalobholelwa, ‘Nkotokuleka kutenda chinnongile, nambo hipalikwa kutenda yoha hintekuhaidi kwa Hangwana.’ 34 Nambo nenga ndendakunnobholelanga, nkotokulapilanga choachela pantendakuhaidi, wala nkotokulapilanga kwa kunani kwa Annoongo, kwa kubhee chenecho nga chitengu cha umwenye cha Annoongo, 35 Nkotokulapilanga kwa chilambo, kwakubhee nga mahali pakwe pa kubheka makongono, au ku Yelusalemu, wala nkotokulapilanga ku Yelusalemu kubhee nga chilambo cha Amwenye akolo. 36 Na mwangota nkotokulapilanga kwa mutwe gwinu, maana ngakombola kulitenda hata lijunju linu limo kubhee lihuu au lipili. 37 Handa mpakulobhola, ‘Elo,’ bahi jibhee, ‘Elo.’ Na handa mpakulobhola, ‘Ngabha’ bahi jibhee, ‘Ngabha,’ choha chela chipakupunda genago kubhoka kwa bheni bhala Abohu."

38 Ayesu akapunda kulongela, "Ntekujohanga yakubhee jikalobholekwa, ‘Lio kwa lio, na lino kwa lino.’ 39 Nambo nenga ndendakunnobholelanga, nkotokummujikia chikubho amundu abohu. Mundu handa ampotite lijegwa lya kunnelo, mumtendebhukie kabhele lijegwa linu lya kunchiji. 40 Handa mundu ampelike kuchebule kupala apetule lichati linu, mwaaleke apetule kabhele na likoti linu. 41 Mundu handa apakunkulumikia kupetula nhigo gwinu maili jimo, mgupetule maili jibhele. 42 Jwapakunnyopa chilebhe mwapekee, nkotokwaajima jwapakuhika kunnyahika chilebhe choachela mwapekee."

43 "Ntekujohanikianga yakubhee jitekulobholekwa, ‘Mwaapale andami ajinu, na kwaachimwa apwati bhinu.’ 44 Nambo nenga ndendakunnobholelanga, mwaapalange akaapwati bhinu na kwaajopelanga kwa Annoongo bhabhampokonyolanga hilebhe mwangota, 45 kupala mmangange bhaana bha Atati bhinu jwabhii kunani kwa Annoongo. Kwa kubhee jonojwe atendakwamulikila lyobha lyabhe bhandu akaabohu na bhammbone, na kwaakomelekea hula bhandu bhammbone na akaabohu. 46 Jakwa ngwahupa joajela jimpakupatanga handa mpakwapalanga bhenibhala bhabhampalanga mwangota? Kwa kubhee hata bhabhatochanga kodi bhatendanga hela hela! 47 Hela hela handa mpakwapekeanga chalamu akaanung'una bhinu jikajabhe, bholi, ntekutendanga chilebhe changa yobheleka? Hata bhandu bhangaamanya Annoongo na bhenabho bhatendanga hela hela. 48 Bahi, mmangange bhandu mwangalemwa handa Atati bhinu bha kunani kwa Annoongo chibhabhile jwakukamilika!"