1 Poolo ni Timoseo, atumiki a Yesu muomboli

Kwa anyiimwe wandhu a Amnungu a ku Filipi kupitila Yesu Kilisito, pamojhi ni achogoleli agulu la wandhu amkhulupila Kilisito ni anyiyawo waatangatila.

2 Ubwino wa Amnungu ni mtendele uchokela kwa Atate ni Ambuye Yesu Muomboli.

3 Niyamika Mnungu wanga kila ndhawi nikakukumbukilani, 4 kila ndhawi mmapembhelo yanga yonjhe nikupembhelani kwa kukondwa 5 ndande ya kuthangatila kwanu kulalikila Uthenga Wabwino kuyambila siku loyamba mbaka lelo. 6 Nikhulupila kuti Mnungu waiyamba njhito ii ya bwino mmitima mwanu siwaiendeleze mbaka ikwanile musiku ijha ya Kilisito Yesu. 7 Chimwecho ndeumo nifunikila kukuganizilani mumtima mwanga, ndande pa kumangidwa kwanga kwa njhito yo lalikila Uthenga Wabwino mwaonjhe mwatangatilana niine. 8 Mnungu wajhiwa kuti nifuna kupunda kukuonani nikukondani mwaonjhe kwa chikondi cha Kilisito Yesu.

9 Iili nde pembhelo langa kuti chikondi chanu chichuluke kupunda nikupundichicha, mwanjelu ni kujhiwa konjhe, 10 ili mukhoze kusanghula vindhu vabwino, mkhale bwino, popande lawama mbhaka siku la Muomboli. 11 Umoyo wanu siujhale vindhu vabwino ivo Yesu Muomboli mwene siwakupacheni kwa ulemelelo ni matamando ya Mnungu.

12 Okhulupila achanjanga, nifuna mujhiwe kuti vindhu vonjhe vanipata uzene vanitangatila kulalikila Uthenga Wabwino. 13 Kuchokana ni yamenyo, alonda onjhe anyumba ya Ufumu pamojhi ni wina, ajhiwa nalimndende ndande nimtumikila Kilisito. 14 Ndande ya kumangidwa kwanga kwa achita Okhulupilila ambili akhale ni chikhulupi kwa Ambuye, ata apata mbhavu yolalikila uthenga wa Mnungu popande mandha.

15 zene kuti akumojhi amulalikila Kilisito ndande ali ninjhanje ni ndewo, nambho wina amulalikila Kilisito kwa ubwino. 16 Anyiyawa amulalikila kwa chikondi, ndande ajhiwa nalimuno mndende ndande yokhengelela Uthenga Wabwino, 17 nambho wina amulalikila Kilisito ndande afuna kujhikweza achina wene, chimwecho, aganizila sachuluche mavuto yanga mndende.

18 Nambho sivinibwela ine, nikondwa ikakhalape wandhu amulalikila Kilisito kwa kila mtundu, ikhale kwa ubwino kapina kwa kuipa. Ni siniendekele kukondwa, 19 pakuti, nijhiwa kwa kupembha kwanu, ni kutangatilidwa ni Mzimu wa Yesu Kilisito, yajha yadanipata ine siyang'anamuke kukhala uomboli. 20 hamu yanga yaikulu ni nichikhulupi changa nikuti, sinilenga mwano, niliniuhakika siniyendekele kukhala niujhasili wa kulalikila Uthenga Wabwino, kwa ufulu ngati umo nili, ni Kilisito siwatamandidwe kwaumo nichitila muthupu langa ikhale nilame kapina sinimwalile. 21 Kwanga kulama Nikilisito ni nikamwalila sinipate kupunda. 22 Nambho ngati nikaendekela kukhala wamoyo kwa thupi, kwanga ili nindande ya kwachitila njhito Ambuye, basi sinijhiwa icho sinichisanghe. 23 Nazingilidwa ni vindhu viwili vilingana, nikhumbila kusiya kukhala niumoyo uwu nikhale pamojhi Nikilisito, pakuti nichindhu chabwino kupunda, 24 nambho nichindhu chamate kupunda kwanu ngati nikaendekela kukhala wamoyo. 25 Nipakuti nikhulupila ili, nijhiwa niyendekele kukhala pamojhi namwe mwaonjhe ili mpate kukula ni kukhala ni kukhala ni chimwemwe muchikhulupi chanu, 26 ili kuti, chimwemwe chanu chikhale chambili mwa Kilisito Yesu, kwandande yanga kwa kujha kwanganjho kwanu.

27 Kupitilila yonjhe, lalilonjhe silichokele, muchite ngati umo yali mafuno ya Uthenga Wabwino wa Yesu Kilisito, ili kuti nikajha kapina nikasiya nivele yaya kuti mwaima nganganga mu mzimu mmojhi, maganizo, ni mugwililila chikhulupi chimojhi ndande ya Uthenga Wabwino. 28 Msadaaopa adani wanu, nambho chikhulupi chanu chazene sichikhale ngati chizindikilo kwa anyiiwo kuti sayomwe nambho anyiimwe simulamichidwe ni Mnungu. 29 Kwanu mwapachidwa mwawi ndande ya kumtumikila Kilisito, osati kwa kukhulupililape nambho kuvutika ndande ya Kilisito. 30 Pakuti chipano, mgwilizana niine pakubula nghondo, nghondo izi ndezijha mudaziona ndinibulana pajha poyamba, ndiizo nikali kubulana chipano ngati umo muvelela.