1 येशु सनर आ सिइयाङ बै ओलसंज नलन पलिईस्यु आनङ्गरलै वलस्यु रांवाङ। 2 शबाथ छिम्क ओले आराधना झिमल सिक्छ्या यांऔ तअसिऊ। थएन्या वालाङ अचम्म ताइवाङ, ओटन ऐलेवाङ, "इकाले काङन सोगलै ग्यान आडोटौ? इकाजन यांसिन्या ईका ग्यान कैताइन्या रैस? इकाल कुईले आढान्या कामयाङ ख्वाए सक्तिशाली लेवाङ? 3 नैति ईका नकाई कुर्मि माङडीका? आका मरियमलं ज़ा, ओटन याकूब, योसेफ, यहूदा सनर सिमोनयाङ रांदाज्यू माङडीका? नैति आल बैनाङ गेसकाए मालिज्यावाङ्का?" ओटन येशुजन नकाङै बिस्वास रांमाढोव।

4 येशुले नकाङजन ऐआढोवाङ, "अगमबक्ताजन आझिमल सनर आदेसल ओटन आनाटागोटाङ्ङन बाहेक अपुर काङै अपमान माताइदी।"✝

5 ओटन येशुले नङं काङ्का-काङ्का नाएबोरन्याङ यर्त आकुई नाएस्यु सक्तिशाली कामङन नकाङजन आसबेल्वाङ, अपुर नैज ढाऔ माढोदुडा। 6 नकाङल अबिस्वास रङस्यु येशु छक्कै परिऊ। ओटन हुङआङा नङ्गर जिऊल हिनस्यु सिक्छ्या यांऔयन हिनौ।

7 येशुले बारं सिइयाङजन आल्योङ आखुल्वाङ, ओटन नकाङजन नें-नेंलोअ जाएस्यु आपरिङवाङ। ओटन नकाङजन दुस्टआत्माङ यर्त अढिकार बै आयोवाङ। 8 नकाङजन ऐटाइन्या आग्या आयोवाङ, "यमल नाल्ट जेस नैज बै तावुरच्यो, न त भरेई, न जन, न खल्तीइल रुप्या, तर जेस जम्मा तोलोअ झुई याएज छेनच्यो।✝ 9 जुता जाएसिच्यो, तर अपुर भ्या क्वा तावुरच्यो।" 10 ओले नकाङजन ऐआढोवाङ, "जब काङ्काङल झिमल पसिच्यो, ना नङ्गरलन बिदा जेमानीऊ समन, नलै चुङज्याचिते। 11 यदि जो पोल जेमि स्वागत माताह, सनर रुयाङै जे बचन थएन्या यिङ ऐज माढोरकन, ना पोलन जेपलिहौक नकाङल बिरोदत साचील नाल्ट जेपाइटलाला धुलो हरस्योचिरते, जो कि ना नकाङ नाल्ट चेताउनी ग्याताइत्या ओटन परमेस्वरले नकाङल निया ग्याढोउत्या।"✝

12 ओटन नकाङ पलिईस्यु हिन्वाङ, ओटन अपुर रुयाङजन पापङन पस्चातापल नाल्ट प्रचार ढाऔ तअसिवाङ। 13 नकाङै तबर दुस्टआत्माजन रापलिइवाङ, ओटन भ्याई नाएबोरन्याङजन तीइ ठिइस्यु रा:सबेल्वाङ।✝

14 हेरोद रयले येशुल बाए थएस्यु लेऊ, दानाङभन्या ओलं मिन भ्याई प्रचार ताइस्यु लेऊ, ख्वाएले ऐलेवाङ, "बप्तिस्मा यांन्या वाला यहुन्ना सिस्यु जिङदा ताइदा रैस, नैताइस्यु ता नकाङ्ङन ऐटाइन्या सक्तिला कामयाङ ताइज्याया।"✝ 15 काङ्काङै ऐलेवाङ, "ईका एलिया ज्या।" ओटन फरि अपुऱ्याङै ऐलेवाङ "ईकाता हाका बेलाका अगमबक्ताङ्ङन तोलोअ अगमबक्ता ज्या।" 16 जब हेरोदले ईका आठटौ, तब नकाले ऐलेऊ, "यहुन्ना, ङा जोल ङए पलौ ङापरिङ्ङु, नकाई जिङदा ताइदा रैस।" 17 दानाङभन्या हेरोदले आभाई फिलिपल मेएमा हेरोदियासल नाल्ट यहुन्नाजन कोलोकौ परिङस्यु नाजन पोअस्यु झ्यालखानाल झोअस्यु आनाटौ, दानाङभन्या नाले हेरोदियासजन ब्याहा ढास्यु लेऊ।✝ 18 दानाङभन्या यहुन्नाले हेरोदजन ऐढास्यु लेऊ, "न भाईल मेएमाजन ब्याहा ढास्यु नाएना नङ ईका नढान्या काम नियानिसापस मेल माज्योडा।" 19 नैताइस्यु हेरोदियासले नकाल यर्त आयिङल इक नाएस्यु आनाटौ, ओटन नाजन सटौ आरोकौ, तर ओलजै सटौ माढुदुज्यादी। 20 दानाङभन्या हेरोदले यहुन्नाजन तोलोअ धर्मात्मा सनर पबित्र रु यिङस्यु नकाजन रङस्यु छ्याएस्यु, नकाजन जोगाइस्यु नाएस्यु लेऊ। यहुन्नाल सिक्छ्या आथटौक नका भ्याईज आतिस्यु हलाअ ताहा, ओटन बै भ्याई हेसाङसिस्यु थएज्याया। 21 तर नका बेला रांऔ, जब हेरोदले आजर्मिऊ दिन छिम्क आमि मुख्या मन्त्रीयाङ, अढिकारीयाङ सनर गालील प्रदेसला खास-खास रुयाङजन घिन्याई भोस आयोवाङ। 22 नवाए बेला जब हेरोदियासल मेएमाज़ा भितर रा:स्यु स्याऔ, तब नाले हेरोद सनर नकाल खास पाहुनाङजन स्यास्यु खुशी आजाएवाङ। ओटन रयले ना किटीजन ऐआढोव, "नङ जो नीङानल्नु ओइज नीन्ते ङा नङजन ऐयाना।" 23 फरि हेरोदले किऱ्या ज्यास्यु ना किटीजन ऐआढोव "नङ ङा ल्योङ जो नीन ङा तपाअ राज्य समन बै यांन्या।" 24 ओटन पाखाल हिनस्यु आअमाजन आगिनौ, "ङा नैति नीङ?" तब आअमाले ऐआढोव, "बप्तिस्मा यांन्या यहुन्नाल ङए।" 25 नका ओचोएटै भितरलं रय ल्योङ हिनौ, ओटन ऐलेस्यु नीऊ, "ङा इच्छ्या ईका लेऊ कि नङ आकैज ङाजन बप्तिस्मा यांन्या यहुन्नाल ङए थालल यांङते।" 26 ओटन रय भ्याईज दुखी ताहौ, तर नकाले भोसलं आखुलन्या खास आपाहुनाङ लेऊक बाचा आढाऔकाले नका किटीजन आयांन्या बचन सतेहौ आमाढुदुऊ। 27 रयले ओचोएटै तोलोअ सिपाइजन परिङस्यु यहुन्नाल ङए पलस्यु होनन्या हुकुम आयोव। ओटन नकाले झ्यालखानाल हिनस्यु यहुन्नाल ङए आपलौ, 28 ओटन थालल हिनस्यु किटीजन आयोव, किटीले आअमाजन आयोव। 29 यहुन्नाल आसिइयाङै जब ईका छेन राथटौ तब नकाङ रा:स्यु यहुन्नाल सिन्या बुलजन छेन्स्यु ऊईल लाङस्यु रारीनौ।

30 ओटन जब येशुल प्रेरितयाङ नङ्गरलन वलस्यु रांवाङ, तब ओलसं डोएसिवाङ ओटन जो-जो रांढोव, सनर ह्युउसिवाङ ना ओलजन सोगल रापानस्यौ। 31 येशुले नकाङजन ऐआढोवाङ, "जे ङा सकाए अलक्कै पोल रांचिते, ओटन तचिइ थाकिस्युलेच्या नानसिचिते।" दानाङभन्या नल रांऔयन हिनौयन ढान्या रुयाङ तबर लेवाङ, ओटन नकाङजन ज्यान्या नाम बै माल्दी। 32 ओटन ओयाङ डोङ्गाल चरिस्यु, बाठए शान्त पोल अलक्कै हिन्वाङ।

33 ओटन भ्याई रुयाङै ओयाङजन राहिनज्यान्या रङस्यु रांशहौ, ओटन सोगल बजारङन दुउसिस्यु पाइदल चोएवाङ ओटन ओजन बनाएस्यु जन हादेएजै नकाङ तापवाङ। 34 जब रां समुन्दर वङल लाइवाङ तब येशुले तोलोअ घिन्या हुलजन आरङौ, ओटन ओले नकाङजन यीङताए आमानिवाङ। दानाङभन्या नकाङ ग्वाला बिनाला भेडाङ मनताइन्या लेवाङ। ओटन येशुले नकाङजन तबर छेनयाङ ह्युउकौ तअसिऊ।✝ 35 ओटन जब भ्याई अदलाअ ताहौ, तब आ सिइयाङ आल्योङ रा:स्यु ऐलेऊ तअसिवाङ, "ईका अलक्कै पो लेया, ओटन आब ओइ ताइदा। 36 नकाङजन बिदा योंवरते ओटन नकाङै चारवरङा नङ्गर जिऊल सनर डेराबाराल हिनस्यु रांनाल्ट कोबाअ ज्यान्या ग्यालङरत्या।" 37 तर येशुले जबाक आयोवाङ, "जेईज नकाङजन कोबाअ ज्यान्या योंचिरते।" नकाङै ओजन ऐराढोव "नैति गे हिनस्यु नें सय चान्दील ध्याअले* भरेई लाङस्यु नकाङजन ज्यान्या यांन्याङ?" 38 येशुले नकाङजन आढोवाङ, "जे सकाए ख्वाए गोटा भरेई लेऊ? हिनस्यु ब्याएचिते।" ओटन ब्याएबिई ढास्यु ऐलेवाङ, "पास गोटा भरेई सनर नेंलोअ ङा:स्या।"

39 ओटन येशुले सोगलैजन बाङला पिङन्या छील यर्ल बगाल बगाल ताइस्यु चुङन्या हुकुम आयोवाङ। 40 नकाङ सय-सय सनर पचास-पचासला बगाल ताइस्यु चुङवाङ। 41 येशुले ना पास गोटा भरेई सनर नेंलोअ ङा:स्या आहोनौ, ओटन नमदेए खिमस्यु धन्याबाद आयोव, ओटन ना भरेई कलाएस्यु आ सिइयाङ आयोवाङ, ओटन सिइयाङै नकाङजन राभाअस्योवाङ, ओटन ना नेंलोअ ङा:स्या बै राभाअस्योवाङ। 42 ओटन सोगलैले रांकयौ ओटन पटिपन्न ताइवाङ। 43 ओटन रांकयौ छिन्ङ आसिइयाङै रा:सयलन्या भरेईल कलाए सनर ख्वाए ङा:स्या बारं घोन फाङ रादुकौ। 44 भरेई कैन्या ल्हेपाङ पास हजार लेवाङ।

45 ओटन येशुले आ सिइयाङजन डोङ्गाल चराइस्यु हुदिफन बेथसेदालं ङा तन हादेए हिन्चिते लेस्यु आपरिङवाङ, ओटन नवाए बेला ओलं रुयाङ हुलजन बिदा आयोवाङ।

46 नकाङ सकाए भाअसिया पाइनाई ओलं डान्डाल प्रार्थना धानाव। 47 जब ओइ आताहौक डोङ्गा, समुन्दरल यिङल लिज्याऔ, नवाए बेला येशु आबाठए पाखालै लिज्याऔ। 48 आसिइयाङै डोङ्गा राचलाइज्याऔक भ्याई दुख राडोएज्यान्या येशुले आरङौ, दानाङभन्या घूईका नकाङल उलत्यादेए ढाज्याव। छकाल्या ताहौ भन्या हादेए रिउला तिन बजे नका समुन्दरल यर्तन बास्यु नेराक रांऔ, ओटन नकाङजन बनाएस्यु हादेए हिन्ङा लेऊ, 49 नकाङै ओलजन समुन्दरल यर्त आबाज्यान्या रङस्यु आका ता भूत दी कान्देए, ऐलेस्यु नकाङ चिचच्याइवाङ। 50 दानाङभन्या ओलजन रङस्यु सोगलै छ्याएस्यु लेवाङ। तब ओचोएटै येशुले नकाङजन ऐआढोवाङ, "गाएगुइ ताछ्याएच्यो ङा दी।" 51 ओटन येशु नकाङ रांलन्या डोङ्गाल चरिस्यु भितरलं रांऔ, ओटन घूईका शान्त ताहौ। ओटन नकाङ भ्याई अचम्म ताइवाङ, 52 दानाङभन्या नकाङै पास हजार रुयाङल भरेईल बारेङन छेन रामाबुजिऊ, तर नकाङल यिङ कठोर ताइस्यु लेऊ।

53 येशु सनर आ सिइयाङ समुन्दरल हुदिफन उतरिस्यु गनेसरेतलं तापवाङ, ओटन नकाङै डोङ्गा आवङल रांपोकौ।

54 जब डोङ्गातन पलिइवाङ तब ओबजाक्कै रुयाङै येशुजन रांशहौ, 55 ओटन नावङजिऊला सोगलै नङ्गरलन ताइस्यु चोएस्यु हिन्वाङ, ओटन जोङ येशु लिज्याऔ, लेस्यु राथटौ नङाई पोल रुयाङै रानाएबोरन्याङजन रा:तानसै होनौ तअसिवाङ। 56 ओटन जोङ-जोङ ना नङ्गर, बजार, या डेराबारा ज्युउल हिन, रुयाङै नाएबोरन्याङजन बजार ज्युउल रानाएवाङ, ओटन येशुल क्वाल वङ याएज छुऊ ग्याडोएसित्या लेस्यु नकाङै बिन्ति ढाज्यावाङ, ओटन ज्वाएले ओलजन रांछुऊ नकाङ सोगलै बेल्वाङ।