1 पावलले महासभादेए एखौऱ्या आखिमौ, ओटन ऐलेऊ, "भाईयाङ, आछिमका दिन समन परमेस्वरलं नजरत ङा चोखा बिबेकले जिबन कटाइस्यु लेङा।" 2 ईका छेनल प्रधान पुजाउरो हननियाले नकाल लेऊक च्याङन्याङजन हाल टुपन्या आग्या आयोवाङ। 3 तब पावलले नकाजन ऐआढोव, "औ ऱ्हाए सेप्सिन्या भिठाअस! नङजन बै परमेस्वरले राइस्यान्वा ब्यबस्था अनुसार ङा निया ढान्या चुङस्यु नैति ब्यबस्थालं उलत्या ङाजन टुपन्या आग्या नयोनु?" ✝

4 ओटन पावलल आनावङल च्याङज्यान्याङै ऐलेवाङ, "नैति नङ परमेस्वरलं प्रधान पुजाउरोल अपमान ढोना?" 5 तब पावलले ऐलेऊ, "इस्राएल भाईयाङ, ओ प्रधान पुजाउरो लेया ऐलेन्या ङा मासहङदी। दानाङभन्या पबित्र शास्त्रल सरसिस्यु लेया, ‘नङ नमी जनताल शासकलं नाल्ट माचान्या ताछ्योङन।’"✝

6 तर महासभालं तबगाल सदुकीयाङ सनर छुट्टै बगाल फरिसीयाङ रैस ऐलेन्या सनस्यु पावलले घिन्या ग़ा ले ऐलेऊ, "इस्राएली भाईयाङ, ङा ता फरिसीयाङलं ल्हेपाज़ा ज्या। सिन्याङल आस सनर पुनरुत्थानल कारन ङामि मुद्दा चलिज्याऔ।"✝

7 नकाले ऐढोवरा पाइनाई फरिसीयाङ सनर सदुकीयाङल यिसीइ ताहौ तअसिऊ, ओटन बैठअल रांछेन मामिलिस्यु भाअसिवाङ। 8 दानाङभन्या सदुकीयाङ ऐलेरा कि रुयाङल पुनरुत्थान, स्वर्गदुत, आत्मा ऐढासिन्या नैज बै माल्दी। तर फरिसीयाङ ना सोगलै मानिरा।✝ 9 नङ घिन्या होहल्ला मच्चिऊ, ओटन फरिसी दलला काङ्का शास्त्रीयाङ च्याङस्यु ऐलेस्यु गनज्याइस्यु लागिवाङ, "ईका रुल गे नैज माचान्या माडोटैदी। यदि आत्मा या स्वर्गदुतले इकाजन ऐआढान्या ताहकन कै वन?"

10 नङं घिन्या यिसीइ आताहौ छिन्ट नकाङल कुईलन पावलजन लक्कनझिक्क जाएरा ऐलेन्या छ्याइले सेनापतिले सिपाइयाङजन वान्ल हिनस्यु नकाजन नकाङल खार्लन जबरजस्तिसकाए हिनस्यु अड्डा भितरलं लाङचिते ऐलेस्यु आग्या आयोवाङ।

11 छिन्का छिम्क रिउ प्रभुले नकाल लेऊक च्याङस्यु ऐआढोव, "साहस ढोते, पावल, दानाङभन्या जोमनलेस्यु नङ यरुशलेमल ङा बिसयलं बयन नयोनु, नैलेस्युजै नङ रोमल बै बयन यांऔपरिया।"

12 छकाल्या आताहौ छिन्ट यहूदीयाङै रारांल अपङ्गी पोअसिस्यु पावलजन मासटौ समन नैज माज्यान्या ओटन माओन्या बाचा रांढोव। 13 ईका सड्यन्त्र ढान्या रुयाङ चालिसतन बै भ्याई रुयाङ लेवाङ। 14 इकाङै मुख्या पुजाउरोयाङ सनर मुख्याङ ल्योङ हिनस्यु ऐलेवाङ, "पावलजन गेमासटौ समन गे नैज माज्यान्या ऐलेस्यु पक्का बाचा ज्यास्यु लेया। 15 नैताइस्यु जे सनर महासभा मिलिस्यु सेनापतिङन कर लाइचिते, ओटन नकाल मुद्दाल खअ अझ चान्या सकाए ढान्याताहा ऐलेन्या बाहाना जाएस्यु नकाजन पलिइचिते। ओटन नका इल आरांऔ चोएटै नकाजन सएन्या ठिक्कै ताइज्याया।"

16 आब पावलल आदिदील ज़ा आभान्जले ईका सड्यन्त्र सनस्यु अड्डा भितर हिनस्यु पावलजन आसथटौ। 17 तब पावलले कप्तानयाङ मध्य तोलोअजन खुल्स्यु ऐआढोव, "ईका धापाजन सेनापति ल्योङ लाङते, दानाङभन्या इकाल ओसकाए कोबाअ छेन पानन्या लेया।" 18 नैताइस्यु नकाले नाजन हिनस्यु सेनापति ल्योङ सतापस्यु बिन्ति आढोव, "बन्दी पावलले ङाजन खुल्स्यु ईका धापाजन न ल्योङ लाङ ऐढास्यु नाटङवा, नङजन कोबाअ छेन पानन्या लेया, तो।"

19 सेनापतिले नकाल कुई कोलोअस्यु तपोईदेए लाङस्यु काङ्काई मालन्या पोल आगिनौ, "नङ ङाजन नैति छेन पानस्याङा नढाङनु?"

20 नकाले ऐआढोव, "यहूदीयाङै पावलल बिसयलं अझै चान्यासकाए गिनौ जाएसिस्यु छिन्का छिम्क नकाजन महासभालं होनस्यासिन्ते ऐलेस्यु नङसं अनुरोद ढान्या सल्ला ढास्यु लेरा। 21 तर नङ नकाङल छेन तामानि, दानाङभन्या नकाङ मध्य चालिसतन बै भ्याई रुयाङै नकाजन रामासटौ समन नैज माज्यान्या किऱ्या ज्यास्यु नकाजन सएन्याल नाल्ट वुइस्यु चुङज्यारा, ओटन आब नकाङ नमी बचनल आस ढास्यु तयार ताइस्यु लेरा।"

22 नैताइस्यु सेनापतिले ना धापाजन ऐढास्यु आग्या यांस्यु आपरिङौ, "नङ ङाजन ईका छेनल थाई नयांन्या काङ्काईजन तापान।"

23 नकाल छिन्ट पावलले कप्तानयाङ मध्य नेंलोअनेंजन खुल्स्यु ऐआढोव, "आछिमका रिउ नौ बजेदेए नेसय सिपाइयाङ, सहत्तर घोराचरिन्याङ सनर नेसय भालाबर्छा वालाङजन कैसरिया समन हिनन्या ठिक्कै जाएस्यु नाएचिन्ते। 24 ओटन पावलल नाल्ट बै घोराल बन्दबस्त ढोचिन्ते, ओटन नकाजन जोगाइस्यु हाकिम फेलिक्स ल्योङ सतापचिन्ते।" 25 नकाले ईका किसिमला चिठी बै आसरौ, 26 "मानिसिन्या हाकिम फेलिक्सजन, क्लौडियस लुसियसलं अभिबादन! 27 ईका रुजन यहूदीयाङै कोलोअस्यु सएङा लिज्यावाङ, तर ईका रोमी नागरिक रैस ऐलेन्या ङा सनस्यु फौजसकाए ओङ ताप्स्यु नकाजन ङाछुटाइङु। 28 नैति कारनले नकाङै इकाजन दोस रांलाहौ रैस, ऐलेस्यु सनन्या इच्छ्याले ङा नकाजन नकाङल महासभालं ङाहोन्ङु। 29 नकाङै ब्यबस्थाला गिन्सिइलबारे इकाजन दोस रांलाहौ रैस। तर सएन्या सजाय अथाबा कैदी जाटौपरिन्या डवलला नैज दोस ङा ङामाडोएङु। 30 ईका रुल बिरोदल सड्यन्त्र ताइज्याऔ ऐलेन्या छेनल थाई ङाजन यांसिऊ, ओटन इकाजन ओचोएटै नलेऊक ङापरिङ्ङु, ओटन इकाल बिरोदल दोस लाइन्याङजन बै नलेऊक साची योंचिते ऐलेस्यु आदेस यांस्यु लेङा।"

31 ओल्योङन आग्या आडोएन्या अनुसार सिपाइयाङै पावलजन रिउलै एन्टिपाट्रिसलं रासटापौ। 32 घोराचरिन्याङजन नका सकाए नङै बनाएस्यु छिन्का छिम्क नकाङ अड्डा वल्वाङ। 33 कैसरियाल तापराया पाइनाई नकाङै शासकजन थाई बुजाइस्यु पावलजन बै नकाल लेऊक रालाङौ। 34 फिलेक्सले चिठी परिया पाइना नका काङ्का प्रदेसला ऐलेस्यु आगिनौ। नका किलिकियाला ऐलेन्या सनस्यु नकाले ऐआढोव, 35 "नङजन दोस लाइन्याङ रांरकन नमी मुद्दा थएन्या लेङा।" ओटन नकाले पावलजन हेरोदले आजाएन्या दरबारल नाएचिते ऐढास्यु हुकुम आयोवाङ।