1 अग्रिपासले पावलजन ऐआढोव, "नङ नपक्छ्यल छ्योङन्या अनुमति ऐलेया।" तब आकुई छेन्स्यु पावलले ओलं बचिऊ नाल्ट छ्योङौ तअसिऊ

2 "खिम्ते रय अग्रिपास, यहूदीयाङै ङाजन रांलाइन्या सोगलै दोसलं बारेल आछिम नलेऊक बचिऊ नाल्ट छ्योङौ ङाडोएन्यात ङा ङाईझन्ज भागिइवाला यिङ्ङा। 3 यहूदीयाङल सोगलै चलन सनर रांछ्योङन्या छेनल नङ खासतं नशईसिऊकाले, ङा चर्चा धैर्यतासं थएते ऐलेस्यु ङा बिन्ति ढोङा।"

4 "ङा जातिल खार्ल सनर ङा देस यरुशलेमल सुरुकन बितिस्यु रांन्या ङा धापा बेलाकन्ज ङा जिबन तरिका यहूदीयाङजन थाह ऐलेया। 5 ल्होन्या समायकन ईका छेन नकाङजन थाह ऐलेया, कि गेमि धर्मल सोगलैतन कट्टर पन्थी दल भितरलं ङा तोलोअ फरिसी ताइस्यु ङा जिबन बिताइस्यु लेङा। नकाङै चाहिरकन ईका छेनल बयन यांऔ ढुदुरा।✝ 6 परमेस्वरले गे पुर्खाङजन आढान्या बाचाल ङा आस ङानाटौकाले आछिम ङा ईका मुद्दाल च्याङस्यु लेङा। 7 गेमि बारं कुल गे रुयाङै आका आस डोटौ नाल्ट लाअरिऊ तयिङले परमेस्वरलं आराधना ढोरा, ओटन ईकाइ आसलं नाल्ट, ऐ रय, यहूदीयाङै ङाजन दोस लाइस्यु नाएरा। 8 परमेस्वरले सिन्याजन जिङदा जाएवा ऐलेन्या छेनत दानाङ जे काङ्काईले बिस्वास ढान्या निर्नय माढोच्यो?"

9 "ङा बै ङायिङ्ङु कि नासरत येशुल मिनता बिरोदत घिन्या कारबाइ ढान्याई ताहा, ऐलेन्या ङा ङाझन्ज बै बिस्वास लेऊ। 10 ङा यरुशलेमल बै ऐज ङालेङु, ओटन मुख्या पुजाउरोयाङ ल्योङन अढिकार डोएस्यु भ्याई परमेस्वरलं रुयाङजन ङा झ्यालखानाल ङाझोअन्या याएज माङडी, तर नकाङजन सटौक नकाङलै बिरोदल ङा सहमति बै लेऊ।✝ 11 ओटन सोगलै आराधना झिमयाङल नकाङजन पालै पाला सजाय यांस्युकने नकाङजन बिस्वास राहौपरिङन्या जोर ङाढोङु। नकाङल बिरोदल भ्याईज यिङचोस्यु सहर बाहेरल बै ङा नकाङजन हलाअ ङाजाटौवाङ।"

12 "ऐलेस्यु मुख्या पुजाउरोयाङ ल्योङन अढिकार डोएस्यु सनर आग्या चिठी हिनस्यु ङा दमस्कसदेए ङाहिन्ङु। 13 ऐ रय अग्रिपास, तकलाएलाअका बेला यमल ङा नमतन नम्युउतन बै चम्किन्या ज्योति ङारङ्ङु, जो ङा सनर ङासकाए लिज्यान्याङ चारैवरदेए चम्किज्याऔ। 14 जब गे सोगलै नामल पाइस्यु गेलेयिउ, तब हिब्रू छेनल ङाजन ऐआढाज्यान्या ग़ा ङा ङा थएङु, ‘शाऊल, शाऊल, नङ दानाङ ङाजन दुख यांङ?’ बैसाकीत लाट्टी नटुपौक नङजन जै हूरा।" 15 "ओटन ङा ऐङाढोङु, ‘औ प्रभु, नङ काङ्का?’ प्रभुले ङाजन ऐआढोव, ‘ङा येशु ज्या, जोजन नङ दुख यांज्याना। 16 तर सोन्ते ओटन नखङले च्याङनते, दानाङभन्या ङात नङ नरङन्या सनर ङा नङजन ठन्स्याऔ परिन्या छेनल नाल्ट सेबक सनर साची खटाइन्या यिङले नङजन छेलन्या ङा नल्योङ ङारंन्ङु हो।✝ 17 ङा नङजन नमी इस्राएलीयाङ सनर गैरयहूदीयाङ ल्योङन छुटकारा यांना, जोल्योङ ङा नङजन परिङना,✝ 18 कि नङ नकाङल म्युउ फएस्योर, ओटन नकाङ च्युऊन्याङन ज्योतिदेए, ओटन सैतानल अढिकारङन परमेस्वर लेऊदेए ग्यावलरते। ऐलेस्यु नकाङै पापल छेमा डोएरा ओटन ङायर्ता बिस्वासलन पबित्र ताइन्याङै नका पो रङौ डोएरा।’✝

19 "नैताइस्यु, ऐ रय अग्रिपास, स्वर्गङन्ता दर्शनत ङा अनाग्याकारी माताहङदी। 20 तर हादेए दमस्कसलं, तब यरुशलेमल ओटन सोगल यहूदियाला देसभरि लिज्यान्याङजन, ओटन गैरयहूदीयाङजन बै पापतन पस्चाताप ढास्यु परमेस्वर लेऊदेए वल्चिते ओटन जे पस्चातापल लायकला काम ढोचिते ऐलेस्यु ङा प्रचार ङाढोङु। 21 ईका छेनल कारन ख्वाए यहूदीयाङै जब ङा मन्दिरलं ङालज्याङु नकाङै ङाजन कोलोअस्यु सएन्या कोशिस राढाङु। 22 आछिमका दिन समन परमेस्वरले ङाजन व्एस्युई लेया। ओल्योङन्ज इङन्या घिन्या नेंलोअनेंझन्ज गवाइ यांऔयन ङा इल च्याङस्यु लेङा। अगमबक्ताङै सनर मोशाले आछ्योङन्या बचन निस्सिबै पुरा ताइरा ऐलेन्या छेन बाहेक अपुर नैज पानस्यु माल्दी। 23 नकाङै ऐलेवाङ कि ख्रीस्टले दुख भोघिऊजपरिया, ओटन सिन्यातन जिङदा ताइन्या हादेए ओले आमि आरुयाङ सनर गैरयहूदीयाङजन उद्दारल सनर ज्योतिल मुइवा।"✝

24 पावलले ओलजै आबचाउल नाल्ट ईका छेन आछ्योङज्याऔक फेस्तसले घिन्या ग़ाले ऐआढोव, "ऐ पावल, नङ भ्याई नपरीऊकाले नङ बौलाहा नताइनु।"

25 तर पावलले ऐआढोव, "भ्याई आदरला फेस्तस, ङा बौलाहा माङडी, तर सत्य सनर सहि छेन छ्योङज्याङा। 26 दानाङभन्या ङा रयल लेऊक बै ढूक्‌कैसं छ्योङज्याङा। ओलं लेऊक ईका नैज छेन मामोअसिडी ङाजन बिस्वास ऐलेया, कि नाले ईका छेन ऐसनज्याया, दानाङभन्या नका घटना ता गोप्यल माताइदा। 27 रय अग्रिपास, नैति नङ अगमबक्ताङत बिस्वास माढोनच्यो? ङा ऐसन्ङा, नङ बिस्वास ऐढोना।"

28 अग्रिपासले पावलजन ऐआढोव, "आवाए छिटै नङ ङाजन बिस्वासी जाटौ नरोअनु?"

29 पावलले जबाक आयोव, "थोरै बेलाल ग्याताइत्या या भ्याईलं ईका पोअसिन्या बन्दनयाङ राइस्यु, नङ याएज माङडी, तर आछिम ङाछेन थएन्याङ ज्वाए जेल्चिऊ सोगलै ङामन ग्याताइरत्या ऐलेस्यु ङा परमेस्वरलं प्रार्थना ढोङा।"

30 तब रय, हाकिम बरनिकी सनर नङं चुङन्याङ ज्वाएलेवाङ सोगलै च्याङवाङ। 31 तब नकाङ पलिईस्यु रारांल ऐलेस्यु छ्योङवाङ, "ईका रुले परान सजाय डोएन्या अथाबा कैदी हिनन्या डवलला नैज काम ढास्यु माल्दी।" 32 अग्रिपासले फेस्तसजन ऐआढोव, "इकाले कैसर ल्योङ निबेदन माढासिन्या ताहकन ईका रुजन राइसिकन बै ताइन्या।"