1 नका बेलाक हेरोद रयले मन्डलीला ख्वाए जनाङयर्त भ्याई अत्याचार ढाऔ लागिऊ। 2 ओले यहुन्नाल दाज्यू याकूबजन तरवालले आसटौ। 3 ना काम रङस्यु यहूदीयाङ खुशी ताइवाङ ओटन पत्रुसजन बै कोलोअन्या जोर आढोव। ईका घटना मासोदाला भरेईल पर्बल बेलाक ताइस्यु लेऊ। 4 हेरोदले पत्रुसजन कोलोअस्यु झ्यालखानाल आझोकौ, ओटन निस्तार पर्बल छिन्ट नाजन जनताङल सामन्दी होनन्या बिचार ढास्यु नकाजन वुइन्याल नाल्ट सिपाइयाङल चार टोलील जिम्मा आलाइस्योवाङ। 5 ऐलेस्यु पत्रुसजन झ्यालखानाल झोअसिऊ तर नकाल नाल्ट मन्डलीले परमेस्वरलं लेऊक भ्याई जोससं प्रार्थना ढाज्यावाङ।

6 हेरोदले पत्रुसजन पाखाल पलिईस्यु होनौ आरोकौ रिउल, ओलजन नेंलोअ साङ्गलले पोअन्याईज नेंलोअ सिपाइनेल खार्ल रुउज्याऔ। ओलं सिपाइयाङ बै झलाप हाक च्याङस्यु झ्यालखानाल वुइज्यावाङ। 7 झुकाउन्या प्रभुल तोलोअ स्वर्गदुत नल रंनौ, ओटन कोठाल ज्योति चम्किऊ। स्वर्गदुतले पत्रुसजन हल्लाइस्यु "छिटो सोन्ते" ऐढास्यु नकाल कुईतन साङ्गलयाङ फिरसिस्यु तेइवाङ। 8 स्वर्गदुतले नकाजन ऐआढोव, "क्वा क्वाएसिन्ते, ओटन जुता जाएसिन्ते।" तब नकाले नैज लेऊ। ओले नकाजन ऐआढोव, "खाइटो खुप्सिस्यु ङा छिनछिन लागिन्ते।" 9 ओटन नका पलिईस्यु नकाल छिनछिन लागिऊ। स्वर्गदुतङन ढासिन्या छेन मछ्युजै ज्या ऐलेन्या नाजन थाईज माताइदा। तर दर्शन ङारङज्याङु ऐलेस्यु नकाले आयिङौ। 10 जब हादेएङा सनर दोस्रा वुइन्या-टोली घापस्यु सहरल पसिऊ नाल्ट झङल झलाप ल्योङ नकाने तापौने, तब नका झलाप ओलजै नकानेल नाल्ट फएसिऊ, ओटन नकाने बाहेर पलिईस्यु तोलोअ गल्लिला यम ताइस्यु हिनौने, ओटन ओचोएटै स्वर्गदुत पत्रुसजन राइस्यु हिनौ।

11 जब पत्रुसलं होस खुलिउ तब नकाले ऐलेऊ, "आब ङाजन मछ्युजै थाह ताइदा, कि प्रभुले आदुत परिङस्यु हेरोद रयल कुईतन यहूदीयाङै जो ढाऔ रारोकौ नका सोगलैतन ङाजन छुटकारा आयांङु।"

12 ईका छेन नकाले सन्वापाइनाई, नका यहुन्ना "जोजन मर्कुसं बै ऐढोरा" ओलं आअमा मरियमलं झिमल हिनौ। नल तबर जना दुउसिस्यु प्रार्थना ढाज्यावाङ। 13 पत्रुसले झलाप ध्वांध्वां आजाटौक रोदा मिनला नोक्कर्नि झलाप फएराव। 14 पत्रुसलं ग़ा शईस्यु नका हेसाङसिस्यु झलाप माफएस्युई भितर देए चोएस्यु हिनस्यु "पत्रुस झलाप त च्याङज्याऊ" ऐलेस्यु थाई आयोवाङ। 15 तर नकाङै नाजन ऐराढोव, "नङ बौलाहानी हो।" तर नकाले ङापानन्या छेन मछ्यु ज्या ऐलेस्यु नकाले आझ्योङ आजाटौ। तब नकाङै ऐलेवाङ, "ना नकाल स्वर्गदुत होला।"

16 तर पत्रुसले पालै पाला ध्वांध्वां जै जाएज्याऔ। झलाप राफटौक ओलजन रङस्यु नकाङ हलाअ ताइवाङ। 17 पत्रुसले "दिङचिते" ऐलेस्यु कुईले सयान आढोव, ओटन प्रभुले नकाजन कैलेस्यु कैदलन बाहेर आपलिटौ ना नकाङजन आपानस्योवाङ। ईका छेनल थाई याकूब सनर अपुर भाईयाङजन योंचिरते ऐलेस्यु नका बिदा नीस्यु छुट्टै पोल हिनौ।

18 नम रंनापाइनाई पत्रुसजन काङ हिनौ? ओमनलेस्यु सिपाइयाङल खार्ल घिन्या हल्ला मच्चिऊ। 19 हेरोदले पत्रुसजन रोअस्यु बै फेला आमापराहौक, सिपाइयाङल छानबिन ढास्यु नकाङजन ज्याहान सजायल हुकुम आयोव। हेरोद फरि यहूदिया प्रदेसजन राइस्यु कैसरिया हिनस्यु ओङै लिज्याऔ।

20 हेरोदल टुरोस सनर सीदोनला रुयाङस भ्याई आयिङ चोव। नकाङ त बगाल ताइस्यु आल्योङ रांवाङ, ओटन रयल भितरला कर्मचारी बलस्तसजन सभनस्यु मिलाहौ नाल्ट बिन्ति रांढोव। दानाङभन्या नकाङल देस अनल नाल्ट रयल देसलं भरपरिस्यु लेवाङ।✝

21 तोकिसिन्या दिन छिम्क राजकीय क्वा क्वाएसिस्यु हेरोद आमि सिहासनल चुङौ, ओटन रुयाङजन ओले भासन आयोवाङ। 22 ओटन रुयाङ "ईका ता देउताल ग़ा दी, रुल माङडी!" ऐलेस्यु कलिऊवाङ। 23 तर परमेस्वरजन महिमा रामाढाऔकाले नवाए बेलाई प्रभुल तोलोअ स्वर्गदुतले नकाजन आराइस्योव, ओटन बज्यां-बज्यां लुइस्यु नकाल सिइ ताहौ।✝

24 तर प्रभुल बचन बदिऊयन सनर भ्याई फैलिऊयन हिनौ।

25 बारनाबास सनर शाऊलने सेवाकाई पुरा ढास्यु यरुशलेमलन वलौने। नकाने सकाए मर्कुसं ऐढासिन्या यहुन्ना बै हिनौ।