1 पावल सनर सिलास अम्फिपोलिस सनर अपोल्लोनियाला यम ताइस्यु थेसलोनिकेलं रांऔने। नङ यहूदीयाङल तोलोअ आराधना झिम लेऊ। 2 पावल आबानि अनुसार नकाङ आराधना झिम भितरलं हिनौ, ओटन तिन साटा समन पबित्रशास्त्रङन नकाङ सकाए छ्योङज्याऔ। 3 "ख्रीस्टजन ऐजै दुख भुगिन्या सनर सिन्यातन जिङदा ताहौजै परिऊ, ओटन ईकाइ येशु, जोल चान्याथाई जेजन ङा सथएचिऊ, ओइ ज ख्रीस्ट ज्या" ऐलेन्या छेनल अर्थ खुलिस्यु पावलले प्रमानित आजाएस्योवाङ। 4 नकाङ मध्य ख्वाए जनाले पावल सनर सिलासस लागिवाङ। ओटन घिन्या बगालला ईस्वरभक्त ग्रीकयाङ सनर ख्वाएयाए मुख्या मेएमाङ बै बिस्वास ढाऔ भन्वाङ।

5 तर खिई वुरस्यु यहूदीयाङै बजारला बदमासयाङजन दुउस्यु हुल वुरस्यु सहरल खैलाबैला मच्चाहौ रापरिङवाङ, ओटन यासोनल झिमल हमला ढास्यु पावल सनर सिलासजन जनताङल सामन्दी होनौ रारोकौ। 6 नकानेजन डोटौ माढुदुस्यु, नकाङै यासोन सनर काङ्का-काङ्का भाईयाङजन सहरला शासकयाङ ल्योङ ऐढास्यु कलिकौयन घिसारस्यु राहोनौ, "सङ्सारजन उलत्या सुलत्या जाएन्या आरुयाङ इल बै ताप्‌रा:स्यु लेरा। 7 नकाने यासोनल पाहुना ताइस्यु लेऊने, ओटन नकाङ सोगलैले येशु ऐढासिन्या तोलोअ छुट्टै रय लेऊरैस ऐलेस्यु कैसरलं नियामल बिरोदत काम जेढाज्याचिऊ।" 8 ईका छेन थएस्यु रुयाङ सनर सहरला शासकयाङ आतिवाङ। 9 नकाङै यासोन सनर बाङ्की रुयाङ्ङन धरौटी रुप्या नाएस्यु नकानेजन राराहौ।

10 बिस्वासी भाईयाङै ओचोएटै पावल सनर सिलासजन रिउलै बेरिया रांपरिङौ, ओटन जब नकाने ओङ तापौने तब नकाने यहूदीयाङल आराधना झिम भितरलं हिनौने। 11 बेरियाला यहूदीयाङ थेसलोनिकेलाङतन भ्याई चान्या लेवाङ दानाङभन्या इकाङै पुरै बअ चासोसकाए बचन ग्रहन रांढोव, ओटन ना छेनयाङ ठिक नैताइन्याई ज सन् माङडी ऐलेस्यु दिनकाई पबित्रशास्त्र ब्याएस्यु छुटाइन्या रांढोव। 12 नैताइस्यु इकाङ मध्य, समुदायला मुख्या तचिइ तबर घिन्या घार बगालला ग्रीक मेएमाङ सनर ल्हेपा रुयाङै बिस्वास रांढोव। 13 तर जब परमेस्वरलं बचन पावलङन बेरियाल बै प्रचार ताइज्याऔ ऐलेन्या थेसलोनिकेला यहूदीयाङै रा:सनौ, तब ओयाङ नङ बै हुलयाङजन छेनन्या सनर मच्चाईन्या ताप्‌रावाङ। 14 तब बिस्वासी भाईयाङै ओचोएटै पावलजन समुन्दरङन रांपरिङौ। तर सिलास सनर तिमोथी बेरियालै चुङौने। 15 पावलजन नुल्नाङन्याङै ओलजन एथेन्स समन राहोनौ। सिलास सनर तिमोथीने घेनढुदुऊ समन छिटै नका ल्योङ हिनन्याई ताहा ऐलेन्या आग्या डोएस्यु नकाने बेरियाल वलौने।

16 पावलले सिलास सनर तिमोथीनेजन एथेन्सलं आवुइज्याऔक, ना सहरजन स्वरुपै स्वरुपले फाङआताइज्यान्या रङस्यु नकाल यिङ हूरौ। 17 ऐताइस्यु नकाले यहूदीयाङ सनर ईस्वरभक्त जनयाङसं आराधना झिमल, सनर राडोएसिन्या भरियाङस बजारला द्वाहाल सोगल रुयाङस दिनकाई यिसीइ रांढोव। 18 इपिक्युरी सनर स्तोइकी दार्शनिकयाङ मध्य बै ख्वाएयाएले नका सकाए छेनपान रांढोव। नकाङ ख्वाएयाएले ऐलेवाङ, "ईका गनगन्याले नै आपानौ?" "अपुऱ्याङै ऐलेवाङ, अपुर बिदेसी देबी-देउताङल प्रचार ढान्यामन ताइन्याई रंना।" दानाङभन्या पावलले येशु सनर सिन्यातन जिङदा ताइन्या छेनल प्रचार ढाज्याऔ। 19 तब नकाङै ओलजन अरियोपागसलं रालाङौ ओटन रांगिनौ, "नङ नयांन्या ईका छार सिक्छ्या नै रैस, नैति गे सनौ गेढुदुयिउ? 20 दानाङभन्या नङ गे नांल अचम्मला छेनयाङ सथएज्याना। ऐताइस्यु ईका छेनल मतलब नैति गे नका सनौ रोअया।" 21 सोगलै एथेन्स बासियाङ सनर नङ चुङन्या बिदेसीयाङ छार-छार छेन पानन्या या थएन्या बाहेक रांमि समाय अपुर नैज छेनल माबिताइरदी।

22 तब पावलले अरियोपागसलं खार्ल च्याङस्यु ऐआढोवाङ, "ऐ एथेन्सला रुयाङ, जेजन ङाजन सोगल तबर देउताङल भक्तमन्ताइन्या जेरङचिऊ। 23 दानाङभन्या ङा बाऔयन ङाढाज्याऊक सहरल जे जेपुजिन्या जन्तुयाङ ङा ङारङ्ङु। ङा तोलोअ ऐटाइन्या थान बै ङाडोएङु जोत ‘माशईसिन्या देउताल नाल्ट’ ऐटाइन्या कुरिसिन्या लेऊरैस। ऐताइस्यु जे मासनस्यु पुजिज्याच्या नाजन ङा जे खार्लैज ङापानज्याङु।" 24 परमेस्वर जोले सङ्सार सनर नकाल लेन्या सोगल जन्तु आजाटौ, ओ स्वर्ग सनर पिरथ्बील प्रभु आताहौकाले कुईले जाएसिन्या मन्दिरलं बाए माचुङडी,✝ 25 ओजन कोबाअ जन्तुल अभाब आपरिउमन लेस्यु रुल कुईतन ओलं सेवा ढाऔपरिऊ लेस्यु तायिङच्यो। दानाङभन्या ओले जै सोगलैजन जिबन परान सअ सनर सोगलै जन्तु योंवरा।✝ 26 परमेस्वरले तोलोअ रुतन सोगल पिरथ्बील बाए चुङन्या रुयाङ हरेक जाति आजाटौ। नकाङजन ठहराइसिन्या समाय सनर सिमा बै पक्का आजाएस्योवाङ,✝ 27 नकाङै परमेस्वरजन ग्यारोअरत्या, सक्या नकाङै छपछप लेस्यु ओजन रांडोटौ सन् ऐलेन्या आस त ऐलेस्यु। फिरि बै ओ गे काङ्काईतन लोए माल्दी।✝ 28 जोमनलेस्यु काङ्काङै ऐलेऊ, "गे ओलटै बान्चिया, ओटन ओङंन्जै बान्या चलिन्या ढोया सनर ओलटै गेमि अस्तित्व लेया। जे जेमिई कबिले बै पानस्यु नाएरा, ‘गे पक्का ओलै सन्तानयाङ ज्या।’"

29 "आब गे परमेस्वरलं सन्तान गेताहौकाले, परमेस्वर सुन, चान्दी या लुङमन ज्या लेस्यु गे यिङन्या माताइदी, इकाङता रुल सिप सनर यिङसिन्या प्रतिरुपयाङ याएजै ज्या।✝ 30 ऐटाइन्या अग्यानताल समायजन परमेस्वरले ध्यान माढोदा, तर आब सोगल पोल सोगल रुयाङजन पापला यमलन पस्चाताप ढान्या आग्या योंवा। 31 दानाङभन्या ओले तयोअ तुकिसिऊ नाएवा, जो छिम ओले ओलजै आखताइन्या तोलोअ ब्यक्तिङन धार्मिकताल सङ्सारलं निया ढान्यालेया। ओजन सिन्यातन जिङदा जाएसिऊ ओले सोगलै रुयाङजन इकाल प्रमान यांस्युई लेया।"✝

32 जब नकाङै पावलले सिन्यातन जिङदा ताइन्या बारेल आपानन्या राथटौ, तब काङ्का-काङ्काङै रांगिलल्याहौ। तर अपुऱ्याङै "गे तपाला बै ईका बारेल नछेन थएया" ऐलेवाङ। 33 ओलं छिन्ठक्क पावल बैठअलन हिनौ। 34 तर ख्वाएयाए रुयाङ ओलसं लागिवाङ, ओटन बिस्वास रांढोव। नकाङ तन अरियोपागसला सदस्य डियनुसियस, दामारिस मिनला तोलोअ मेएमा, सनर अपुऱ्याङ बै लेवाङ।