1 अपोल्लोस कोरिन्थी सहरल आलिज्याऔ बेलाक, पावल भितरला इलाकाङन ताइस्यु एफिससलं रांऔ। पावल काङ्का काङ्का सिइयाङस डोएसिऊ। 2 पावलले नकाङजन ऐआढोवाङ, "जब जे बिस्वास ढास्यु पबित्र आत्मा जेडोएचिऊ?" नकाङै ऐलेवाङ, "गे खकै बै पबित्र आत्मा लेया ऐलेन्या थएस्यु मालेईदी।" 3 पावलले नकाङजन ऐआढोवाङ, "तब जे कैताइन्या किसिमला बप्तिस्मा जेहोन्चिऊ?" नकाङै ऐलेवाङ, "बप्तिस्मा यांन्या यहुन्नाल बप्तिस्मा।"

4 तब पावलले ऐलेऊ, "बप्तिस्मा यांन्या यहुन्नाले आयांन्या बप्तिस्मा पापतन पस्चातापल बप्तिस्मा लेऊ। तर ङाछिन्ट रांन्या रु, अथाबा येशुत बिस्वास ढोचिते ऐलेस्यु नकाले रुयाङजन ऐआढोवाङ।"✝

5 ईका छेन थएस्यु नकाङै प्रभु येशुल मिनत बप्तिस्मा राहोनौ। 6 जब पावलले नकाङयर्त कुई आनाटौ, तब पबित्र आत्मा नकाङयर्त रांऔ, ओटन नकाङ छुटाछुट्टै छेनल छ्योङवाङ ओटन भबिस्यबानी रांढोव। 7 नकाङ छ्योअ बारं गोटा ल्हेपाङ लेवाङ।

8 पावल यहूदी आराधना झिम पसिस्यु तिन मैना समन पावलले परमेस्वरलं राज्यला बारेल नकाङसं साहस सकाए छ्योङस्यु रुयाङजन सभनज्याऔ। 9 तर जब काङ्काङ झ्योङस्यु बिस्वास रांमाढोव, ओटन ईका नङ्गरल परमेस्वरलं यमल बिरोदत बगालयाङ माचान्या छ्योङौ लागिवाङ, तब पावल नकाङल्योङन बाठए ताइवाङ, ओटन सिइयाङजन बोलोङ लाङस्यु टुरान्नसलं पाठशालाल छ्योङौ तअसिऊ। 10 ईका काम नें बर्स समन ताइज्याऔ, ओटन एशियाला प्रदेसलं लिज्यान्या सोगलै चुङन्याङ, यहूदी सनर ग्रीकयाङ नेंलोअलेईज प्रभुल बचन राथटौ।

11 परमेस्वरले पावलङन बडअचम्मला कामयाङ आढोव। 12 इङ समन कि रूमाल अथाबा खाइटो नकाल कलाङल छुऊपरिङस्यु नाएबोरन्याङ ल्योङ लाङसिरा, ओटन नकाङल रोगयाङ हिन्‌रा ओटन दुस्टआत्माङ बै पलिईस्यु हिन्वाङ। 13 तर काङ्का-काङ्का हुदेएअदेए बारिन्या यहूदी झारफुक ढान्याङै दुस्टआत्मा लागिन्याङजन प्रभु येशुल मिन पानौयन ऐलिज्यावाङ, "पावलले प्रचार आढान्या येशुल मिनङन ङा नङजन बाहेर पलिईन्या आग्या यांसिना।" 14 नङ तोलोअ स्केवास मिनला यहूदी प्रधान पुजाउरोल साट वटा ल्हेपाज़ायाङै ऐटाइन्या काम रांढोव।

15 तब दुस्टआत्माले जबाक यांस्यु नकाङजन ऐआढोवाङ, "येशुजन ङा ऐशईङा, ओटन पावलजन बै ङा ऐशईङा, तर जे काङ्काङ?"

16 ना दुस्टआत्मा लागिस्यु रु नकाङयर्त उफ्रिस्यु रांऔ, ओटन नकाङ सोगलैजन कायम जाएस्यु आपछारवाङ ओटन नका झारफुक ढान्याङजन ना झिमलन क्वा मालन्या सनर घाइत्या ताइस्यु ढोङवाङ। 17 ईका छेन एफिससला सोगल रुयाङ, यहूदी सनर ग्रीकयाङै आका छेन थएस्यु। ओटन नकाङ सोगलैलयर्त छ्याइपरिऊ, ओटन प्रभु येशुल मिनल प्रसम्सा ताहौ। 18 बिस्वास ढान्याङ रुयाङ भ्याई रांवाङ, ओटन नकाङै राढान्या रा:मी रा:मी दुस्ट कामयाङ सुइकार रांढोव ओटन ना सोगलै लेऊक रांठनौ। 19 नकाङ मध्य भ्याईयाङ, जोजोले टुनामुना रांढोव, रांमि-रांमि किटापयाङ सिमस्यु राहोनौ, ओटन सोगलैल लेऊक रांहिपौ। नकाङै नकाल येए जाटौक पचास हजार चान्दील सिक्काल हिसाप लागिऊ। 20 ऐलेस्यु प्रभुल बचन फैलिस्यु हिनौ, ओटन भ्याई प्रभाबशाली ताहौ।

21 ईका घटनाङ छिन्ट, पबित्र आत्माल प्रेरनाल पावलले माकेडोनियाङन अखैयाला यम ताइस्यु यरुशलेम हिनन्या पक्का आजाटौ। नकाले ऐलेऊ, "नङ तापङापाइनाई ङा रोम हिनौजपरिया" 22 नकाल सेवा ढान्याने नेंलोअ, तिमोथी सनर इरास्तसजन नकाले माकेडोनियाल आपरिङौने, तर नका ओलं तचिइ दिन एशिया प्रदेसलै लिज्याऔ।

23 नका बेलादेए परमेस्वरलं यमल बारेल एफिससलं भ्याई छ्याइला होहल्ला ताहौ। 24 दानाङभन्या डेमेत्रियस मिनला तोलोअ चान्दील शिल्पकारले चान्दील आर्तेमिस देबील स्वरुप सनर इङइङन्या मन्दिरयाङ जाएस्यु, कारीगरयाङजन भ्याई काम आयोवाङ, दानाङभन्या ईका धन्दातन भ्याई फाइदा ताहौ। 25 तब इकाङ सनर अपुर ऐटाइन्याई बैपार ढान्याङजन नकाले दुउस्यु ऐआढोवाङ, "भाईयाङ, जेजन थाहै लेया, कि ईका बैपारलन गेजन चान्याई काजकमाई ताहा। 26 जे ऐरङज्याच्या ओटन ऐथएज्याच्या, कि पावलले तबर रुयाङजन झुकाइस्यु अथाबा मच्चाईस्यु आलाङवाङ। तर एफिससलं याएज माङडी छ्योअछ्योअ सोगल एशियाल कुईले जाएसिन्या, दयदेउताङ काङ्काईबै ईस्वर माङडी। 27 नैताइस्यु गेमि बैपारल प्रतिस्ठा मांन्या याएज माङडी तर महान देबी आर्तेमिसलं मन्दिर समेत नस्ट ताहा, ओटन सोगल एशिया सनर सङ्सारले रापुजिन्या देबील गौरबल नैज महत्व माताइदी।"

28 ईका थएस्यु नकाङ रारिऊ चिरिऊ ताइवाङ, ओटन "एफिसीयाङलं आर्तेमिस महान ज्या।" आर्तेमिस देउताल ऐलेस्यु चिचच्याहौ तअसिवाङ। 29 सोगल सहरल होहल्ला मच्चिऊ ओटन नकाङ बोलोङ ताइस्यु पावल सकाए बान्या माकेडोनियाल चुङन्या गायस सनर अरिस्तार्खसनेजन कोलोअस्यु चौरभितरल होतऱ्याइस्यु रालाङौनें। 30 पावल रुयाङल हुलल हिनौ आरोकौ, तर सिइयाङै ओलजन हिनौ रांमायोव। 31 एशियाला ख्वाएयाए मुख्या रुयाङ पावलल न्हाए लेवाङ। नकाङै पावलजन चौरभितरल हिनस्यु जोखिम तामुलिई ऐलेस्यु बिन्ति ढास्यु रांपरिङौ। 32 तब नकाङ छुटाछुट्टै छेन छ्योङौयन कलिऊस्यु हल्ला मच्चाईज्यावाङ। दानाङभन्या ना बैठअल गडबद ताइज्याऔ, ओटन भ्याउयाए रुयाङै ता नकाङ दानाङ दुउसिस्यु लेर ओ बै मासनरदी। 33 हुलल ख्वाए रुयाङै अलेक्जेन्डरजन हादेए रा:सराहौ, जोजन यहूदीयाङै जिम्मा होनौ नाल्ट सच्यानस्यु लेवाङ। अलेक्जेन्डरले आकुईले सयान ढास्यु रुयाङजन शान्त लिज्याऔ नाल्ट कोबाअ पानन्या इच्छ्या आढोव। 34 तर नकाङै नका ता यहूदी रैस ऐलेन्या सनस्यु सोगलैले तचोएकै लगभग नेंघन्टा या "एफिसीयाङलं आर्तेमिस मानिसिन्या ज्या।" ऐलेऊयन कलिऊवाङ।

35 सहरला शासकले रुयाङजन शान्त आजाटौ छिन्ट, "ऐ एफिससला रुयाङ, एफिसीयाङलं सहरतन मानिसिन्या आर्तेमिसलं मन्दिर सनर नमतन आतेइन्या नकाल मुर्तिल रछ्यक ज्या ऐलेन्या छेन काङ्काईजन थाह मालेवका? 36 जे ऐसनच्या ईका छेन पानौ माढुदुसिन्या लेया, नैताइस्यु जे शान्त ताहौजपरिया ओटन मायिङसिस्यु नैज काम ताढोच्यो। 37 दानाङभन्या जे जेहोनन्या ईका रुयाङै मन्दिर लुटिस्यु मालेरदी ओटन गेमि देबील अपमान बै ढास्यु मालेरदी। 38 नैताइस्यु यदि डेमेत्रियस सनर नका सकाए लेन्या कारीगरयाङल काङ्काईल बिरोदल कोबाअ पानस्यु लेरकन अदालतयाङ खुल्लालिज्याऔज लिज्यारा, ओटन नियादिसयाङ बै लिज्याऔजलिज्यारा, नकाङ तोलोअले तोलोअल बिरोदत मुद्दा ग्यालरिरत्या। 39 तर ईका बाहेक अपुर नैज बारेत छेनौ रोअच्योकन्ता नकाल फैसला सदाई कचहरील ताहा, 40 दानाङभन्या आछिम ईका डोङ्गाल दोस गेयर्त रांन्या छ्याइ लेया। दानाङभन्या ईका बिना कारनल यिसिईखप्सिईल नैज इस्पस्टीकरन गे यांऔ माढुदुइदी।" 41 आवाए पानस्यु नकाले कचहरीजन आटुङग्याहौ।