प्रेरित 28

पावल माल्टा टापुल

1 गे चान्यासकाए समुन्दर वङदेए पलिईया पाइनाई टापुल मिन माल्टा रैस ऐलेन्या गेजन थाह ताहौ। 2 नल चुङन्याङै गेजन गजाबसै दया राढायिउ, नमवास्यु झिमापाइनाई नकाङै मी रा:सलकाईस्यायिउ, ओटन गे सोगलैजन स्वागत रांढोव। 3 पावलले तबीता सिङ दुउस्यु आहोनौ ओटन ना हिनस्यु मील आवोरज्याऔक, मील मुनले तोलोअ डाङ पलिईस्यु रांऔ, ओटन आकुईल मलिङसिऊ।

4 नला चुङन्याङै नकाल कुईल डाङ आमलिङसिन्या रङस्यु रारांल छ्योङौ तअसिवाङ, "ईका रु पक्का बै साइढवा जै ताहौपरिया। ईका समुन्दरलन बान्चिस्यु ता पलिहौ तर नियाले नकाजन बान्चिन्या अनुमति मायोडा।" 5 पावलले ना डाङजन मील आक्याहौ, ओटन नकाल नैज बै बिराऊ माढोदा। 6 तर नकाङै आकाल बुल वया, अथाबा आका झुकाउन्या ढलिस्यु सिया ऐलेस्यु वुटौ तअसिवाङ। तर नकाङै तबर छिन्ट समन रावुटौ ओटन बै नकाजन कैज आमाताइन्या रङस्यु राबिचार फिरिस्यु ऐलेऊ तअसिवाङ, "ईका ता देउता दी रैस।"

7 ना टापुला पब्लियस मिनला मुख्याल यिङ खेए ना पोल आनावङल लेऊ। नकाले गेजन स्वागत आढायिउ, ओटन तिन दिन समन आझिमल गे अतिथि सेवा आढोव। 8 पब्लियसलं बौ नाएबोर सनर फुहुर बेथाले आनाएबोरज्याऔ। पावल नकाजन खिम्नाऔ, ओटन नकाल नाल्ट प्रार्थना आढोव, ओटन आकुई नकाल यर्त नाएस्यु नकाजन आसबेलौ। 9 ईका घटना आताहौ छिन्ट, ना टापुला अपुर नाएबोरन्या रुयाङ बै रांवाङ, ओटन ओयाङजन आसबेल्वाङ। 10 नकाङै गेजन भ्याई आदर राढायिउ, जब गे री जहासलं गेचरियिउ, ओयाङै गेजन उपाहार यांस्यु सम्मान राढायिउ, ओटन गेजन जो जो सामानल आबस्यक लेऊ नका समान जहासलं रानाएस्यायिउ।

माल्टा टापुङन रोम समन

11 तिन मैना छिन्ट, गे अलेक्जेन्ड्रियाल जहासलं गेचरियिउ, ईका जाहस हिउदाक बै ईकाइ टापुल लेऊ, जहासलं हाङन्ता भागल जोङल्या देबल सुरुप खोपिसिन्या लेऊ। 12 सुराकुसाईल ताप्स्यु गे नङं तिन दिन गेचुङयिउ। 13 नङंन गे वङवङ ताइस्यु रेगियन सहरल गेतापरायिउ, तयोअछिन्ट दच्छिनी घूईका आढोव, ओटन फरि छिन्का छिम्क गे पटिओलील गेतापरायिउ। 14 नल गे भाईयाङजन गेडोटैवाङ, ओटन नकाङै गेजन साट दिन समन रा:सकाए बोलोङ चुङौ नाल्ट बिन्ति राढायिउ, नैलेस्यु गे रोमल गेतापरायिउ। 15 नलन गे रांन्या थाई थएस्यु रोमला भाईयाङै गेजन डोएन्या अप्पियसलं बजार सनर तिन-पाटी ऐढासिन्या पोल रा:स्यु गेलेयिउ। नकाङजन रङस्यु पावलले परमेस्वरजन धन्याबाद आयोव, ओटन साहस आडोटौ।

रोमल पावल

16 जब गे रोमल गेपसियिउ, तब पावलस तोलोअ सिपाइले आबाठएक पहरा यांस्यु चुङन्या अनुमति आडोटौ।

17 तिन दिनछिन्ट पावलले यहूदीयाङल स्थानीय अगवाङजन खुल्स्यु आपरिङवाङ। नकाङ दुउसिरा पाइनाई नकाले ओयाङजन ऐआढोवाङ, "इस्राएली भाईबैनाङ, ङा ता ङादेसला रुयाङ, अथाबा बौ-पुर्खाला रीतिथितिला बिरोदल नैज काम ढास्यु ङामालेङु। ताहकन्बै बन्दी ताइस्यु यरुशलेमङन रोमीयाङल कुईल ङाजन जिम्मा यांस्यु लेरा। 18 नकाङै छानबिन राढाऔछिन्ट, ओयाङै ङाजन सएन्या सजायल नैज कारन माडोएरापाइना ङाजन राइन्या यिङ रांढोव। 19 तर यहूदीयाङै बिरोद राढान्याले कैसर ल्योङ निबेदन यांन्या ङाजन कर रांलाइङु। ङा रुयाङ बिरोदल नैज आरोप होनन्या छेन मालेऊ।✝28:19 प्रेरित २५:११ 20 नैताइस्यु ङा जे सकाए डोएसिस्यु छ्योङन्या ऐलेस्यु ङाखुल्चिऊ। दानाङभन्या इस्राएलला आस जो हो नकाल नाल्ट ईका साङ्गलल ङा पोअसिस्यु लिज्याङा।"

21 नकाङै नकाजन ऐराढोव, "गे ता नमी बारेल यहूदिया प्रदेसलन नैज चिठी डोएस्यु मालेईदी, गे काङ्काई गे रुयाङै रा:स्यु नबिरोदल नैज माचान्या छेन बै रा:सथएन्या या रांछ्योङन्या माल्दी। 22 तर नमी बिचार नैति, नका नल्योङन्ज थटौ रोअया। दानाङभन्या ईका बगालल बारेल गेजन इवाएजाई थाह लेया, कि जोङबै रुयाङ इकाल बिरोदत छ्योङज्यारा।"

23 तब नकाङै पावलल नाल्ट तयोअ रातोकिस्योव, ओटन भ्याई बगालल रुयाङ नकाल डेराल रांवाङ। नकाले ओयाङजन छकाल्याकन ओईक समन आपानस्योवाङ, ओटन मोशाल ब्यबस्था सनर अगमबक्ताङल किटापलन परमेस्वरलं राज्यल बयन आयोव, ओटन येशुल बिसयलं नकाङजन बिस्वास ढाऔपरिङन्या चेस्टा आढोव। 24 नकाले आपानन्या छेन ख्वाएले बिस्वास रांढोव, ख्वाएले रांमाढोव। 25 ओयाङ रारांल माभन्वाङ, ओटन भाअसिङा रालज्याऔक पावलले ईका आखिरी छेन आपानस्योवाङ, "गेमि बौ-पुर्खाङजन यशैया अगमबक्ताङन पबित्र आत्माले आपानन्या बचन चान्याई लेऊ,

26 ईका रुयाङ ल्योङ हिनस्यु पान्ते,

थएन्या ता जे ऐथएच्या, तर ‘खकै माबुचिडी,

खिमन्या ता ऐखिमच्या, तर खकै मारङचिदी।’✝28:26 यशैया ६:९-१०

27 दानाङभन्या ईका रुयाङल यिङ बोधो ताइस्यु लेया,

ओटन ‘नकाङल ना भैरा ताइस्यु लेया,’

ओटन नकाङल राम्युउ बन्द जाएस्यु लेया,

मानकन्ता नकाङै म्युउले रङरा होला,

ना ले बुझिरा होला,

ओटन वल्‌राहोला,

ओटन परमेस्वरले ऐलेऊ, ङा नकाङजन सबेलङराहोला।"✝28:27 यशैया ६:९-१०

28 "नैताइस्यु जेजन थाह ग्याताइत्या, कि परमेस्वरलं आका मुक्ति गैरयहूदीयाङल नाल्ट परिङस्यास्यु लेया, ओटन नकाङै थएन्या लेरा।"✝28:28 भजनसङ्ग्रह ६७:२; भजनसङ्ग्रह ९८:३; यशैया ४०:५ 29 ओटन नकाले ईका बचन आपानौ छिन्ट, यहूदीयाङ रारांल भ्याई यिसिऊयन ढास्यु भाअसिवाङ।

30 पावल पुरा नेबर्स समन आखर्चले रोमल चुङौ, ओटन नका ल्योङ रांन्याङ सोगलैजन नकाले स्वागत आढोवाङ। 31 नकाले खुल्लमखुल्लासं मारुकिस्यु परमेस्वरलं राज्यल प्रचार आढोव, ओटन प्रभु येशु ख्रीस्टल बारेल सिक्छ्या आयोवाङ।