1 कैसरियाल कर्नेलियस मिनला तोलोअ रु लेऊ, जो रोमल इटालिया पल्टनला तोलोअ कप्तान लेऊ। 2 नका ईस्वरभक्त लेऊ, ओटन ओल सनर आमि सोगल जाहानयाङै परमेस्वरलं छ्याइ मानिरा। नकाले चाहिज्यान्याङजन उद्दारतासं दान यांस्यु परमेस्वरतं सदाई प्रार्थना ढोवा। 3 नकाले तयोअ लाअका तिन बजेदेएका दर्शनत परमेस्वरलं तोलोअ स्वर्गदुत आलेऊदेए रा:स्यु ऐआलज्यान्या आठटौ, "कर्नेलियस!"

4 नकाले छ्याहैसं ओजन दवलसं आखिमौ ओटन ऐआढोव, "प्रभु पान्ते।" ओटन स्वर्गदुतले नकाजन ऐआढोव, "न प्रार्थना सनर मायोअन्याङजन नयांन्या दान यांकाल नाल्ट परमेस्वरलं हाक ताप्स्यु लेरा। 5 ओटन पत्रुस राढान्या सिमोनजन खुलन्या रुयाङ योप्पा नङ्गरल परिङचिते। 6 नका छालाल काम ढान्या सिमोन ल्योङ चुङज्याऊ, जोल झिम समुन्दरल वङल लेऊ।"

7 जब नकासं छ्योङज्यान्या स्वर्गदुत बिदा ताहौ, तब कर्नेलियस आनोक्करयाङ मध्य नेंलोअ मध्य तोलोअजन लगातार नकाल सेवा-परिपन्जा ढान्या तोलोअ भक्त सिपाइजन आखुलौ, 8 ओटन नकानेजन सोगल छेन पानस्यु योप्पादेए आपरिङौने।

9 छिन्का छिम्क बारं बजेदेए योप्पा सहरल नेराक राटापराऔक, पत्रुस झिमल मैराअत प्रार्थना ढान्या वूमौ। 10 नका करेव ओटन नाले कोबाअ ज्यान्या यिङ आढोव, तर अपुऱ्याङै ज्यान्या रांफिनज्याऔक ओलं दर्शन रङज्याव। 11 नकाले स्वर्ग आफएसिन्या सनर नङंन चार कोनाअल पोअसिन्या क्वा मनताइन्या नैजतिअ पिरथ्बीदेए आलाइरांज्यान्या आरङौ। 12 नका तन्नाल पिरथ्बीला सोगलै किसिमला चारखुटत्या जनावर सनर घस्रिन्या परानी ओटन नमता बायाङ लेवाङ। 13 तब नकाले तोलोअ ग़ा आठटौ, "ऐ पत्रुस च्याङनते, ओटन सएस्यु कैटे।"

14 तर पत्रुसले ऐलेऊ, "माङडी प्रभु, दानाङभन्या ङा खकैज नैज अपबित्र या अशुद्द जन्तु कैस्यु मालेङदी।"✝

15 ना ग़ा फरि नेंपाला नाले आठटौ, "परमेस्वरले जो चोखा जाएस्यु ले नकाजन नङ अशुद्द तालेन।"

16 तिन पालासमन ऐज ताहौ, ओटन ओचोएटै नका तन्ना नमदेए लाङसिऊ।

17 जब पत्रुसले ओलं आरङन्या आका दर्शनल अर्थ नैति होला ऐलेस्यु आयिङ आयिङल अन्टातोल ताइज्याऔ, नाइ बेला कर्नेलियसले आपरिङन्या रुयाङ सिमोनल झिम रोअस्यु रा:स्यु झलाप वङल च्याङज्यावाङ, 18 "ओटन ओयाङ रांगिनौ, पत्रुस ऐढासिन्या सिमोन इल चुङौ?"

19 जब पत्रुस दर्शनल बारेङन बिचार ढाज्याव तब पबित्र आत्माले नकाजन ऐआढोव, "खिम्ते, तिनवटा रुयाङै नङजन रोअज्यावाङ। 20 च्याङनते, ओटन वान्ल हिनन्ते, ओटन गाएगुइ मालस्यु नकाङ सकाए लागिन्ते, दानाङभन्या नकाङजन ङा ङापरिङ्ङु।" 21 तब पत्रुस लाहौ, ओटन नका रुयाङ ल्योङ हिनस्यु ऐलेऊ, "खिम्चिते, जे जेरोअन्या रु ङाई ज्या। जे इल जेरांन्या कारन नैति?"

22 नकाङै ऐलेवाङ, "तोलोअ कप्तान कर्नेलियसले गेजन आपरिङयिउ, जो धर्मि परमेस्वरसं छ्याएन्या सनर सोगल यहूदी जातियाङ्ङन मानिसिन्या रु लेऊ, नङजन ओलं झिमल खुलौ परिङन्या सनर नल्योङन थाई थएच्यो ऐलेस्यु तोलोअ स्वर्गदुतङन ओजन आदेस यांसिऊ।" 23 तब पत्रुसले नकाङजन भितरलं खुल्स्यु नकाङजन स्वागत रांढोव। छिन्का छिम्क पत्रुस सोस्यु नकाङसं हिनौ, ओटन योप्पाला ख्वाएयाए बिस्वासी भाईयाङ नासकाए लागिवाङ।

24 तयोअका छिम्क नकाङ कैसरियाल तापवाङ। रांनालनाठा सनर नेराका न्हाएयाङजन खुल्स्यु रादुउवाङ कर्नेलियस नकाङल यम वुइज्यावाङ। 25 जब पत्रुस भितर रांऔ तब कर्नेलियसले ओलसं डोएसिस्यु नकाल खङल फलुप्सिस्यु धोक आढोव। 26 तर पत्रुसले नकाजन ऐढास्यु आसचोटौ, "सोन्ते, ङा बै ता नङमन ताइन्याई रु ज्याअसा।" 27 तब नका ओलसं छ्योङौयन झिम भितरलं हिनौ, ओटन नङ नकाले तबर जना रादुउसिन्या आडोएवाङ। 28 तब पत्रुसले नकाङजन ऐआढोवाङ, "अपुर जातियाङसं न्हाए ढोच्यो, अथाबा नकाङसं डोएसिऊयन ढान्या तोलोअ यहूदीयाङ नाल्ट ख्वाए माचान्या हो ऐलेन्या छेन जेजन थाह लेया, ताहकन बै परमेस्वरले ङाजन काङ्काई रुजन अशुद्द अथाबा माचान्या तायिङ ऐलेस्यु थनस्यु लेऊ। 29 नैताइस्यु खुलौ चोएटै नैज दुख मामानिस्यु ङा जेल्योङ ङारांङु। जे ङाजन दानाङ खुलङच्यो? आब पान्चिते।"

30 तब कर्नेलियसले आपानौ, "चार दिन छिम्क, छ्योअ ईकाइ बेला झिमल ङा तिन बजेला प्रार्थना ङाढाज्याङु, तब चम्किन्या क्वा क्वाएसिज्यान्या तोलोअ रु ङा सामन्दी च्याङौ, 31 ओटन ऐलेऊ, ‘कर्नेलियस, परमेस्वरलं सामन्दी न प्रार्थना थएस्यु लेया, ओटन ओङ गरिबयाङजन नयांन्या दानल यांका ताइस्यु लेया। 32 नैताइस्यु योप्पाल रुयाङ परिङस्यु पत्रुस ऐराढान्या सिमोनजन खुल्स्यु परिङचिते। नका समुन्दरल वङल छालाल काम ढान्या सिमोनल झिमल चुङज्याऊ।’ 33 तब ङा ओचोएटै न ल्योङ रुयाङ ङापरिङवाङ, ओटन नङ भलाढास्यु नरानु। आब प्रभुङन नङजन आग्या आताइन्या सोगलै छेनयाङ पान्ते गे थएया।"

34 तब पत्रुस छ्योङौ तअसिऊ, "मछ्युजै ङा ङारङ्ङु, कि परमेस्वरले पक्छेबाद माढोवदी।✝ 35 तर सोगलै जातिलन जो ओलसं छ्यात, सनर ठिक काम ढोव, नका ओलं सामन्दी ग्रहन ढान्या लायकला ताहा।" 36 परमेस्वरले इस्राएलीयाङजन आपरिङन्या चान्याथाई, अथाबा ख्रीस्टङन प्रचार ढासिन्या शान्तिल चान्याथाई जेजन थाहै लेया। (येशु जै सोगलैल प्रभु ज्या।)✝ 37 बप्तिस्मा यांन्या यहुन्नाले प्रचार आढाऔ छिन्ट, गालीलला प्रदेसङन सुरु ढास्यु सोगल यहूदिया भरि प्रचार ढासिन्या बचन ईकाइ ज्या, 38 कि परमेस्वरले नासरतला येशुजन पबित्र आत्मा सनर सक्तिले अबिसेक आढोव। ओले चान्या काम ढाऔयन सनर दियाबलसङन दुख डोएज्यान्याङजन सबेलौयन बाऔ, दानाङभन्या परमेस्वर ओलसं लेऊ। 39 "ओटन ओले यहूदीयाङल देस सनर यरुशलेमल आढान्या सोगलै छेनल गे साचीयाङ ज्या। ओलजन नकाङै येशुजन क्रूसतं केप्स्यु रासटौ। 40 ओलझन्जै परमेस्वरले तिन दिनक जिङदा जाएस्यु आसचोटौ, तर ओलजन रुयाङ लेऊक रंनन्या आजाटौ, 41 सोगलै रुयाङजन माङडी, तर गे जोजन परमेस्वरले साचील हिसापत आछेलयिउ, ओटन ओलं सिन्यातन जिङदा आताहौ छिन्ट गे ओलसं ज्यान्या ओन्या गेढोयिउ। 42 ओले गेजन जनताल प्रचार ढान्या, सनर ओलं जिङदा सनर सिन्याङल नियादिस ताइन्याल नाल्ट परमेस्वरङन ठहराइसिन्या हो ऐलेन्या गवाइ यांऔ नाल्ट आग्या यांस्यु आनाएयिउ। 43 सोगलै अगमबक्ताङै ओलं बयन यांस्युई लेरा, कि येशुत बिस्वास ढान्या सोगलैले ओलं सक्तिङन पापल-छेमा डोएरा।"✝

44 पत्रुसले ईका छेन आछ्योङज्याऔ आछ्योङज्याऔकै बचन थएन्या सोगलैत पबित्र आत्मा लाहौ। 45 गैरयहूदीयाङजन बै पबित्र आत्माल बरदान आयांन्या रङस्यु पत्रुस सकाए रांन्या यहूदी बिस्वासीयाङ अचम्मै ताइवाङ। 46 दानाङभन्या अपुर छेनल छ्योङस्यु नकाङै परमेस्वरलं प्रसम्सा राढाज्यान्या ओयाङै राथटौ। तब पत्रुसले ऐलेऊ, 47 "गेमन्जै पबित्र आत्मा डोएन्या इकाङजन रील बप्तिस्मा यांन्यातन काङ्काले अहअ ऐलेऊ ढुदुऊ?" 48 ओटन पत्रुस ले नकाङजन येशु ख्रीस्टल मिनतन बप्तिस्मा योंचिते ऐलेस्यु आग्या आयोवाङ। तब नकाङै पत्रुसजन तचिइ दिन आलै लिज्यान्ते ऐलेस्यु अनुरोद आढोव।