प्रेरित 24

पावल बिरोदत पेसी

1 पास दिनछिन्ट प्रधान पुजाउरो हननिया सनर ख्वाएयाए मुख्याङ, तर्तुल्लस मिनला तोलोअ वकिल सकाए कैसरियाल रांवाङ, ओटन नकाङै पावलल बिरोदत फेलिक्सलं हाक मुद्दा दर्ता रांढोव। 2 पावलजन नलन पलिइरा पाइना तर्तुल्लसले नकाजन ऐलेस्यु आरोप लाहौ तअसिऊ, "बअ मानिसिन्या फेलिक्स, नल्योङन गे घिन्या शान्ति भोग ढाज्याया, ओटन नङ ईका देसला जातिल नाल्ट सुढार सुरु ढास्युलेना। 3 ईका छेन जोमनलेस्यु सोगलै पोल सोगलै समायत गे किरतग्यतासं सुइकार ढोया। 4 तर नङसं गे भ्या समाय माहोनैदी गेमि तुनन्या बिन्ति थएते।" 5 "दानाङभन्या गे ईका रुजन, सोगलैदेए दुख यांस्यु बारिन्या, सङ्सारभरिला सोगल यहूदीयाङल खार्ल आन्दोलन मच्चाईन्या, सनर नासरी पत्तिला मुख्या अगवाजन डोएस्युई लेया। 6 इकाले मन्दिर अपबित्र जाटौ बै आरोकौ हो, तर गे इकाजन कोलोअदुया। गे ब्यबस्था अनुसार कारबाइ ढान्या गेलेयिउ, 7 तर सेनापति लुसियसले गेल्योङ रा:स्यु, भ्याई जबरजस्तिसकाए नकाजन गेल्योङन न्हानस्यु आलाङौ। 8 आब नङजै इकाजन गिनन्‌कन इकाजन गे लाइन्या दोस सोगलै छेन नका ल्योङन ऐसन्ना।" 9 ईका यहूदीयाङ बै ना छेनयाङ सोगलैले मछ्यु ज्या, ऐलेस्यु सहमति ताइवाङ।

फेलिक्सलं लेऊक पावलले जबाक आयांन्या

10 शासकले पावलजन छ्योङन्ते लेस्यु सयान आढाऔ छिन्ट ओले जबाक आयोव, "तबर बर्सकन नङ यहूदी जातिला नियादिस नताइज्यान्या छेन ङासनौकाले ङा हेसाङसै छ्योङ्ङा। 11 नङ सनस्युई लेना, कि ङा यरुशलेमल आराधना ङाढानान्या बारं दिनतन भ्या ताइस्युमाल्दी। 12 इकाङै ङाजन न त काङ्का रुयाङस ङाछ्योङज्यान्या राडोएङु, न त मन्दिरलं या यहूदीयाङल आराधना झिमल अथाबा सहरल जनताङजन ङा मच्चाईज्यान्या राडोएङु, 13 न त इकाङै ङाजन आकअ रालाइज्यान्या दोसलं प्रमान यांऔ ढुदुर। 14 तर ङा ईका नलेऊक सुइकार ऐढोङा, कि जो यमजन नकाङ पाटी ऐढोर, नकाई अनुसार मोशाल ब्यबस्थालं लेन्या छेन सनर अगमबक्ताल किटापल सरसिज्यान्या सोगलै छेन बिस्वास ढास्यु ङा पुर्खाङल परमेस्वरलं आराधना ढोङा। 15 धर्मि सनर पापी नेंलोअनेंलै सिन्यातन पुनरुत्थान ताहा ऐलेन्या इकाङ रांईज सुइकार राढाऔमन ङा बै परमेस्वरतं आस नाएङा।✝24:15 दानियल १२:२ 16 नैताइस्यु ङा परमेस्वर लेऊदेए सनर रुयाङ लेऊदेए सदाई चोखा यिङ नाएन्या कोशिस ढोङा।

17 "ङा तबर बर्स छिन्ट ङा जातियाङल नाल्ट दान यांन्या सनर बलिल भिटी चराइन्या यरुशलेमल रा:स्यु ङाल्ङु। 18 इकाङै ङाजन मन्दिरलं रांडोटौक, ङा चोखा ताइन्या बिधि पुरा ढास्यु ङालेङु। ओङ नैज हुल मालेऊ, होहल्ला बै मालेऊ। 19 तर नङ एशियाला काङ्का यहूदीयाङ लेवाङ, नकाङ इल नलेऊक रांऔ परिन्या हो। यदि ङा बिरोदत कोबाअ पानन्या छेन लेकन नकाङै दोस लाहौ ऐढुदुरा। 20 अथाबा नका रुयाङै ईका महासभालं लेऊक रांईज ग्यापानरत्या, ङामि कोबाअ बिराऊ रांडोटौ का? 21 जम्मा ईकाइ तोलोअ छेन याएज ज्या, जो ङा नकाङल खार्ल च्याङस्यु कलिऊस्यु पानस्यु ङालेङु, ‘सिन्याङल पुनरुत्थानल बिस्वासलं बारेल आछिम जे लेऊक ङामि मुद्दा चलिज्याया।’"✝24:21 प्रेरित २३:६

22 ईका सत्य यमल बारेल फेलिक्सजन चान्यासै थाह लेऊ, नैताइस्यु नाले आका छेन थएस्यु नकाङजन ऐढास्यु आपरिङवाङ, "सेनापति लुसियसं इल रायापाइना ङा जे मुद्दा फैसला ढास्याच्या।" 23 तब पावलजन पहरा यांस्यु नाएच्यो ओटन नकाजन तचिइ छुट योंच्यो, ओटन नकाल आन्हाएयाङ आसेवा ढाऔ रोअरकन तारुखिचिर ऐलेस्यु कप्तानले आग्या आयोवाङ।

पावल फेलिक्स सनर दुरसिल्लालं हाक

24 तचिइ दिनछिन्ट फेलिक्सले यहूदी आमेएमा द्रूसिल्लाजन ओलसं हिनस्यु रांऔ, ओटन नकाले पावलजन खुल्स्यु येशु ख्रीस्टलयर्ता बिस्वासलं बारेत नकाङन आठटौ। 25 पावलले धार्मिकता, सङयम सनर रांन्या नियाल बारेल आछ्योङौक फेलिक्स छ्याटौ ओटन ऐआढोव, "आकअ हिनन्ते, मौका आपरिउ बेलाक ङा नङजन खुल्ना।" 26 पावल ल्योङन ऐयाङ रुप्या डोएसिऊ सन् ऐलेस्यु, नकाले आस बै आढोव। नैताइस्यु बै फिलेक्सले नकाजन बेलाबेलाक खुल्स्यु छ्योङन्या आढोव।

27 तर नें बर्स छिन्ट जब फेलिक्सलं पालोल पर्किअस फेस्तस रांऔ, तब फेलिक्सले यहूदीयाङजन खुशी जाटौ नाल्ट पावलजन झ्यालखानालै बनाएस्यु हिनौ।