प्रेरित 11

यरुशलेमला मन्डलीलं पत्रुसलं चर्चा

1 यहूदियाल लिज्यान्या प्रेरितयाङ सनर भाईयाङै गैरयहूदीयाङ बै परमेस्वरलं बचन ग्रहन ढोदुरा ऐलेन्या राथटौ। 2 जब पत्रुस यरुशलेमल रांऔ, तब खटना ढान्या बगालले नकाजन ऐलेस्यु ग्यानगिन रांढोव, 3 "नङ दानाङ खटना माढान्या ल्योङ हिनस्यु नकाङ सकाए ज्यान्याओन्या ढोन?" 4 तब पत्रुसले नकाङजन आवाऱ्याईसज आपानस्योवाङ

5 "ङा योप्पा सहरल प्रार्थना ङाढाज्याङु, ओटन ङा एकसोऱ्या ङाध्यानत ङालेङु, तब तोलोअ घिन्या क्वा मनताइन्या चार कोनाअल कोलोअस्यु नमतन वान्देए आतेइज्यान्या नैति जन्तु ङा दर्शनत ङारङ्ङु, ओटन नका ङाल्योङ रांऔ। 6 ङा दवलसं ङाखिमौक नल पिरथ्बीला जनावर सनर बन पशुयाङ, घस्रिन्या जन्तु ओटन नमता बायाङ ङारङ्ङवाङ। 7 ङाजन ऐआढाज्यान्या तोलोअ ग़ा ङा थएङु, ‘पत्रुस च्याङनते, ओटन सएस्यु कयौरते।’" 8 "तर ङा ऐङाढोङु, ‘माङडी प्रभु, नैज अपबित्र अथाबा अशुद्द जन्तु ङायाह्‌ल खकै परीस्यु माल्दी।’"

9 "तर नका ग़ाले नेंपालात स्वर्गङन ङाजन आढाङु, ‘जोजन परमेस्वरले चोखा जाएस्यु ले, नकाजन नङ अपबित्र ऐटालेन।’ 10 तिन पाला नैज ताहौ, ओटन ना सोगलै फरि नमदेए लाङसिवाङ।"

11 "नवाए बेलाई कैसरियाङन ङाल्योङ परिङसिन्या तिनगोटा रुयाङ, गे गेचुङज्यान्या झिमल ताप्‌रावाङ। 12 गाएगुइ मालस्युई नकाङसं हिनन्या ङाजन पबित्र आत्माले ऐआढाङु। ईका छ जना भाईयाङ बै ङासकाए हिनस्यु लेवाङ, ओटन गे ना रुल झिमलं गेपसियिउ। 13 नकाले गेजन आपानस्यायिउ, कि तोलोअ स्वर्गदुत नकाल झिमल च्याङस्यु ऐआलज्यान्या नकाले आरङौ, ‘योप्पाल रु परिङस्यु पत्रुस ऐढासिन्या सिमोनजन खुल्स्यु परिङचिते। 14 ओले नङजन बचन सथएवा, जोल्योङन नङ उद्दार डोएना-नङ सनर नमी सोगल नजहानले।’"

15 "जब ङा छ्योङौ ङातअसिङु, तब पईला गेत आलाइरांन्यामन पबित्र आत्मा नकाङयर्त बै नैलेस्युजै लांइरांऔ। 16 तब प्रभुले आपानन्या ना बचन ङाजन याद ताहौ, ‘बप्तिस्मा यांन्या यहुन्नाले ता री ङन बप्तिस्मा आयोव, तर पबित्र आत्माङन जे बप्तिस्मा ताहा।’✝11:16 प्रेरित १:५ 17 प्रभु येशु ख्रीस्टजन बिस्वास ढाऔक परमेस्वरले गेजन जो बरदान आयोव, नकाङजन बै नकाई बरदान योंवरा पाइनाई परमेस्वरजन रुकिऊढुदुन्या ङा काङ्का का?"

18 जब ईका छेन थएरा पाइनाई नकाङ छपक्कै दिङवाङ, ओटन ऐलेस्यु नकाङै परमेस्वरलं महिमा रांढोव "आब ता परमेस्वरले गैरयहूदीयाङजन बै जिबनल नाल्ट पस्चातापल मौका आयोवाङ रैस।"

एन्टिओखियाला मन्डली

19 स्तिफनसल पालाल सुरु ताइन्या, सटावट कारन सोगल पोदेए तत्तर बित्तर ताइन्याङै अपुऱ्याङजन माङडी, तर यहूदीयाङजन याएज बचन प्रचार ढाऔयन, फोनिके, साइप्रस सनर एन्टिओखिया समन बान्या रांढोव।✝11:19 प्रेरित ८:१-४ 20 तर नकाङ मध्य काङ्काकाङ्काङ साइप्रस सनर कुरेनीला रुयाङ लेवाङ। नकाङै एन्टिओखियाल रा:स्यु गैरयहूदी ग्रीकयाङजन बै प्रभु येशुल प्रचार रांढोव। 21 प्रभुल बाहुबल नकाङसं आलेऊकाले, नैताइस्यु भ्याई रुयाङै पस्चाताप ढास्यु बिस्वास ढान्याङ भ्याई बगालल प्रभु देए वल्वाङ।

22 ईका थाई यरुशलेमल लेन्या मन्डलीयाङै राथटौ, ओटन नकाङै बारनाबासजन एन्टिओखियाल रांपरिङौ। 23 बारनाबास ओलं रांऔ ओटन परमेस्वरलं अनुग्रहजन रङस्यु हेसाङौ, नैताइस्यु नकाङजन बिस्वाससकाए प्रभुत पुरा यिङले तोलोअ यिङला ताइस्यु लिज्यान्या हौसला आयोवाङ। 24 दानाङभन्या नकाङ चान्या, पबित्र आत्मा सनर बिस्वासलं भरिपुर्न ताइन्या बारनाबास लेऊ। रुयाङल घिन्या बगाल प्रभुत चैइसिवाङ।

25 तब शाऊलजन बारनाबासले टार्ससलं रोअनाऔ। 26 जब नकाले ओजन आडोटौ तब पावलजन एन्टिओखियाल आहोनौ। तब पुरा त बर्स समनज मन्डलीला रुयाङस नकाङ डोएसिज्याऔयन रांढोव, ओटन रुयाङल घिन्या बगालजन सिक्छ्या रांयोवाङ। बिस्वासी सिइयाङजन पहेला चोए एन्टिओखियालैज बिस्वासी ऐढासिवाङ।

27 नका बेला काङ्का-काङ्का अगमबक्ताङ यरुशलेमङन एन्टिओखियाल रांवाङ। 28 नकाङ मध्य अगाबस मिनला तोलोअ रु च्याङस्यु सोगल पिरथ्बील घिन्या अनिकाल परिङा लिज्याऔ ऐलेस्यु पबित्र आत्माङन भबिस्यबानी छ्योङौ। ना अनिकाल क्लौडियसलं शासनकालल परिया।✝11:28 प्रेरित २१:१० 29 तब सिइयाङ सोगलैले रांमि-रांमि हैसेत अनुसार यहूदियाल चुङन्या भाईबैनाङजन व्टौ नाल्ट भिटी परिङन्या टोक रांढोव। 30 नकाङै नैजै रांजाटौ, ओटन बारनाबास सनर शाऊलल कुईतन नकाङल भिटी सेरयाङ ल्योङ रापरिङस्योवाङ।