1 नकाङसं भाअसिस्यु गे री जहासलं चरिस्यु सोझै कोस टापुल गेरांयिउ, ओटन तयोअका छिम्क रोडसल सनर नङंन पटाराल गेतापरायिउ। 2 ओटन फोनिकेल हिनन्या तोलोअ री जाहस डोएस्यु गे नकालै चरिस्यु गेहिन्यिउ। 3 जब साइप्रस तापु रंनौ, तब ओलं हुदिन्टा दाबऱ्याङा सिरिया इलाकाल ल्योङ हिनस्यु टुरोसलं गेलाइयिउ। दानाङभन्या री जाहसला मालसामान ओलं ल्हाएन्या लेऊ। 4 ओङ सिइयाङस गेडोएसियिउ ओटन नकाङसं गे साट दिन ओलं गेचुङयिउ। पावलजन यरुशलेमल ताहिनन् ऐलेस्यु नकाङै पबित्र आत्माङन ऐराढोव। 5 नङंन गेमि बान्या बेला ताहापाइना गे बिदा ताइस्यु गे यमल गेपलिईयिउ, रांमि जाहान सनर लुलल्याङ समेत नकाङै सहरलन बाहेर समन रानुल्‌रिइयिउ, ओटन गे समुन्दरल वङल घुन्डा टिकिस्यु प्रार्थना गेढोयिउ। 6 तब गे बिदा ताइस्यु री जाहसलं गेचरियिउ, ओटन नकाङ फरि राझिम वल्वाङ।

7 टुरोस ल्योङन समुन्दर-बए ढास्यु गे टोलेमाइसलं गेतापरायिउ। नङ बिस्वासी भाईबैनाङजन अभिबादन ढास्यु नकाङ सकाए तयोअ गेचुङयिउ। 8 छिन्का छिम्क गे भाअसिस्यु कैसरियाल गेरांयिउ, ओटन प्रचारक फिलिपल झिमल गेपसियिउ। नका ओ साट गोटाङ मध्य तोलोअ लेऊ, ओटन गे ओलं झिमल गेपसियिउ। 9 परमेस्वरलं बचन भबिस्यबानी छ्योङन्या नकाल चारगोटा कनन्याङ लेवाङ।✝

10 गे नङ तचिइ दिन गेचुङौक यहूदियालन अगाबस मिनला तोलोअ अगमबक्ता रांऔ। 11 नकाले गेल्योङ रा:स्यु पावलल पिटी हिनस्यु आकुई-आखङ आपोकौ, ओटन ऐलेऊ, "पबित्र आत्माले ऐलेऊ, ‘ईका पिटी जो रुल हो, नकाजन यरुशलेमल यहूदीयाङले ऐलेस्युजै पोअरा ओटन गैरयहूदीयाङल कुईत जिम्मा यांन्या लेरा।’"

12 आका छेन थएस्यु, गे सनर नका टुरोसला सोगल रुयाङै पावलजन यरुशलेमल ताहिनन् ऐढास्यु बिन्ति राजुरिऊ। 13 तर पावलले जबाक आयोवाङ, "जे ऐलेस्यु व्‌रस्यु ङायिङजन दानाङ चिइचिइ जाएस्याङच्यो? दानाङभन्या प्रभु येशुल मिनल नाल्ट कैदल परिन्या याएज माङडी, तर यरुशलेमल सिन्या बै ङा तयार लेङा।"

14 नकाजन सभनौ माढुदुस्यु "प्रभुल इच्छ्या पुरा ग्याताइत्या" ऐलेस्यु गे छपक्कै गेदिङयिउ।

15 नङ तचिइछिन्ट गे हिनन्या तयार गेताइयिउ, ओटन गेमि सामानयाङ छेन्स्यु यरुशलेम देए गेलाङयिउ। 16 गेसं ख्वाएयाए सिइयाङ बै कैसरियाला हिन्वाङ, ओटन नकाङै गेजन साइप्रसला तोलोअ पुरानो सिइ मनासोन ऐढासिन्या रुल झिमल राहोनौ, ओटन नका ल्योङ तचिइ दिन गेचुङयिउ।

17 ओटन जब गे यरुशलेमल गेतापरायिउ, तब भाईयाङै गेजन हेसाङस्युकने स्वागत राढायिउ। 18 छिन्का छिम्क पावल गेसकाए याकूबजन खिमौ नाल्ट हिनौ। नङ सोगलै मन्डलीला बिस्वासी सेरयाङबै दुउसिस्यु लेवाङ। 19 नकाङजन अभिबादन, ढोवरा पाइना पावलले आसेवाकाईङन गैरयहूदीयाङ खार्ल परमेस्वरले आढान्या काम नकाङजन तो-तोलोअङन आपानस्योवाङ। 20 ईका थएरा पाइनाई परमेस्वरलं महिमा रांढोव। तब पावलजन ऐराढोव, "खिम्ते भाई पावल, यहूदीयाङल खार्ल बिस्वास ढान्याङ हजारौ लेरा, ओटन ब्यबस्थाला छेनत नकाङ सोगलै जोशलै लेरा। 21 नकाङै नमी बारेल बै कोबाअ नह्युउन्या छेनयाङ थएस्यु लेरा, ओ नैति ऐलेऊक, गैरयहूदीयाङल खार्ल चुङन्या यहूदीयाङजन नङ ‘मोशाल ब्यबस्थाजन राइन्या सनर नकाङल लुलल्याङजन खटना माढान्या ओटन रीतिथिति पालन माढान्या’ ऐलेस्यु ह्युउस्यु लेना। 22 आब गे कैलेई? नङ रा:स्यु लेना ऐलेस्यु नकाङै निस्सिबै थएस्युई लेरा। 23 नैताइस्यु जो गे पानै, ओइज ढोते बाचा ढान्या गेसकाए चारगोटाङ लेरा। 24 इकाङजन हिनस्यु नङ बै नकाङसं बोलोङ चोखा ताहन्ते, ओटन इकाङजन चाहिन्या खर्च नङ योंवरते, ओटन इकाङै चेम ग्यायनरत्या। ऐलेस्यु नङ मोशाल ब्यबस्था पालन नढान्या रङस्यु न बारेल राथएन्या छेन नैज सत्य माङडी रैस, ऐलेस्यु सोगलैले ग्यासनरत्या।✝ 25 तर गैरयहूदीयाङ जोले बिस्वास ढास्यु लेर, नकाङ स्वरुपजन बलि चराइसिन्या जन्तु, जी, ढेङ पचिरस्यु सएसिन्या पशुल चिप सनर ब्यबिचारलन अलक्कै लिज्यावपरिया ऐलेस्यु गे निर्नय सनस्यु गे चिठी सरस्यु लेया।"

26 तब पावलले तयोअछिम्क नका रुयाङजन ओलसं आहोन्वाङ, ओटन नकाङजन सनर ओलजन बै चोखा आजाटौ, ओटन चोख्याइसिन्या दिनयाङ खक पुरा ताइन्या हो, या सोगलैल नाल्ट यांसिन्या भिटीलं थाह यांऔ नाल्ट नका मन्दिर भितरलं पसिऊ।✝

27 जब साटौ दिन पुरा ताइङा लिज्याऔ, तब एशिया प्रदेसला यहूदीयाङै पावलजन मन्दिरलं रङस्यु सोगल हुलजन रांछेनौ, ओटन नकाजन राकोलोकौ। 28 नकाङ ऐलेस्यु कलिकौ तअसिवाङ "इस्राएलला रुयाङजन व्एन्या ढोचिरते! रुयाङजन जोङबै गे जाति, मोशाल ब्यबस्था अनुसार ईका पोल बिरोदल सिक्छ्या यांऔयन बान्या रु ईकाइ ज्या। आवाए जा माङडी, इकाले ग्रीकयाङजन बै मन्दिर भितरलं हिनस्यु ईका पबित्र पोजन अशुद्द जाएस्यास्यु लेया।" 29 दानाङभन्या इकाल हादेए नकाङै एफिससलं त्रोफिमस ऐढासिन्या तोलोअजन ओलसं सहरल रङसिन्याले नकाईजन पावलले मन्दिर भितर आहोनौ ऐलेस्यु नकाङै रायिङौ।

30 तब सोगलै सहरल हलचल ताहौ, ओटन रुयाङ बोलोङ चोएस्यु रांवाङ। नकाङै पावलजन कोलोअस्यु मन्दिरलन बाहेर लतारस्यु राहोनौ, ओटन ओचोएटै झलापयाङ राऱ्हुपौ।✝ 31 जब नकाङै ओलजन सटौ रारोकौ, तब सोगल यरुशलेम खल्बलिस्यु लेया ऐलेन्या छेनल थाई पल्टनला सेनापति ल्योङ ताप्‌रा:औ। 32 ओ ओचोएटै कप्तानयाङै सिपाइयाङजन बोलोङ हिनस्यु नकाङल्योङ ओचोएटै रांवाङ। ओटन जब नकाङै सेनापतिङन रांरङौ तब पावलजन टुपन्या राराहौ।

33 तब ना सेनापति नेराक रा:स्यु पावलजन आकोलोकौ ओटन नेंलोअ साङ्गलले नकाजन पोअन्या आदेस आयोवाङ। ईका काङ्का ओटन इकाले नैआढोव ऐलेस्यु नकाले आगिन्वाङ। 34 तर ना हुल मध्य काङ्काङै तोलोअ छेन ओटन काङ्काङै छुट्टै छेन छ्योङस्यु कलिऊवाङ, ओटन नकाङल होहल्लाले घटना नैति ना सनौ आमाढुदुऊकाले पावलजन अड्डाल लाङचिते ऐलेस्यु आग्या आयोवाङ। 35 जब पावल थपल्याअलेऔक ताप्‌रा:औ, तब पर्लाकापर्ला सएन्या यिङले सिपाइयाङै ओलजन छेन्स्यु रालाङौ। 36 "दानाङभन्या रुयाङै हुल ‘नकाजन सएचिते’ ऐलेस्यु कलिकौयन छिनछिन लागिस्यु नकाजन सएचिते ऐलेवाङ।"

37 अड्डाल सतापङा रालज्याऔक पावलले सेनापतिजन ऐआढोव, "नैति अनुमति डोटङ्कन, ङा कोबाअ पानङा।" नकाले ऐलेऊ, "नैति नङजन ग्रीक भासा रांऔ? 38 नैति नङ नकाई मिस्री माङडी, जोले भाबाअ बिद्रोह मच्चाईस्यु चार हजार हतियारधारी रुयाङजन जङ्गलल नलाङवाङ?"

39 तर पावलले उत्तर आयोव, "ङा ता किलिकियाला सहर टार्ससला तोलोअ यहूदी रु दी, ङा इङन्या सहरला नागरिक माङडी। बिन्ति लेया, ईका रुयाङस कोबाअ छ्योङौ यांङते।"

40 जब नकाले छ्योङौ आयोव, तब थपल्याअत च्याङस्यु पावलले रुयाङजन कुईले सयान आढोव। रुयाङ मछ्युजै छपक्कै दिङवाङ, नकाले नकाङजन हिब्रू छिन्ङन ऐआढोवाङ,