1 हननिया मिनला तोलोअ रु सनर आमेएमा सफीराले तकलाए नेंयेङ नेंयटौ, 2 ओटन येङल येएतन आमेएमाले आपानन्या अनुसार तचियाए बठा नेसकाए नेंनाटौ, ओटन अपुर बठा हिनस्यु प्रेरितयाङल हाक आनाटौ। 3 तर पत्रुसले ऐलेऊ, "ऐ हननिया, पबित्र आत्मास दानाङ ग्वारस्यु छ्योङन सनर यिङ झेनयएन्या येएतन झेन तबठा मोअन्या छेन कैलेस्यु सैतानले झेन यिङल आझोअस्यानु? 4 नका यिङ आमायेहौ समन नैति नका झेनमि माताइज्याऔका? ओटन ना झेनमायटौ हादेए नैति नका झेन अढिकारलै मालज्याऔका? ऐटाइन्या काम ढान्या बिचार झेनयिङल कढाई रांऔ? झेन रुजन माङडी तर परमेस्वरजन जै ग्वारस्यु नाएचिना।" 5 आका छेन थएस्यु हननिया नामल वङौ ओटन नाले आपरान आराहौ। नका थएन्याङ सोगलैल छ्याइ पसिऊ। 6 तब जवानयाङै च्याङस्यु नकाजन क्वाले मलिङस्यु बाहेर देए छेन्स्यु रालाङौ, ओटन रारीनौ।

7 नल जो ताइस्युलेऊ ना मासनस्युई छ्योअ तिन घन्टा छिन्ट नकाल आमेएमा बै भितरलं रांऔ। 8 ओटन पत्रुसले नाजन आगिनौ, "ङाजन पानस्याङते, झेन येङ नवाएलै झेनयएचिनु?" ओटन नकाले ऐलेऊ, "औ नवाएलै ज्या।"

9 तर पत्रुसले नकाजन ऐआढोव, "झेन कढाई सल्ला ढास्यु प्रभुल आत्माजन झेनअल्चिनु? थएते, नयोजन रींनन्याङ खिम्ते झलापतै लिज्यारा, ओटन नकाङै नङजन वुरस्यु पाखादेए लाङनरा।"

10 ओटन ओचोएटै सफीरा ओलं खङ ल्यौक वङौ ओटन परान आराहौ। जब जवानयाङ भितर रांवाङ, नकाजन आसिन्या रङस्यु पाखाल वुरस्यु रालाङौ, ओटन नकाल आयोल नेराक रारीनौ। 11 सोगलै मन्डली यर्त सनर ईका छेन थएन्याङ सोगलैयर्त घिन्या छ्याइ परिऊ।

12 आब प्रेरितयाङ्ङन तबर अचम्मला सनर हलाअताइन्या कामयाङ रुयाङल खार्ल ताइवाङ, ओटन नकाङ सोगलै तोलोअ यिङला ताइस्यु सोलोमनल पटाहाल तचोएकै दुउसिन्या ढोरा। 13 तर अपुऱ्याङ मध्य काङ्काईल बै नकाङसं मिलिरान्या हिकमत माताइदा, ताहकन बै रुयाङै नकाङजन सम्मान रांढोव। 14 प्रभुत बिस्वास ढान्या ल्हेपाङ सनर मेएमाङ नेंलोअलै हुलझन्जै भ्याई चैइसिऊ तअसिवाङ, 15 इङ समन कि रुयाङै डोहा-डोहाल नाएबोरन्याङजन राहोन्वाङ, ओटन पत्रुस आरांऔक नकाल आजिरिउ याएज ताहकन बै नकाङ मध्य काङ्का-काङ्काङयर्त ग्यापरित्या लेस्यु तान सनर चारपाईयाङल नकाङजन सएप्‌स्यु रानाएवाङ। 16 ओटन यरुशलेमल हुङाआङा सहरलन बै तबर रुयाङै नाएबोरन्याङ सनर अशुद्दआत्माले आसताइन्याङजन राहोन्वाङ ओटन नकाङ सोगलै बेल्वाङ।

17 मुख्या पुजाउरोयाङ सनर नकाङसं लिज्यान्याङ सोगलै जो सदुकी पत्तिला लेवाङ खिई ढास्यु प्रेरितयाङल बिरोदत च्याङवाङ, 18 ओटन प्रेरितयाङजन कोलोअस्यु सरकारी झ्यालखानाल राझोकौ। 19 तर प्रभुल तोलोअ स्वर्गदुतले रिउल झ्यालखानाला झलापयाङ आफएस्योवाङ, ओटन नकाङजन पाखाल हिनस्यु ऐआढोवाङ, 20 "हिन्चिते ओटन मन्दिरलं च्याङस्यु ईका छार जिबनला सोगलै थाई रुयाङजन सथएचिरते।" 21 प्रेरितयाङै ईका थएरापाइना छकाल्याई मन्दिर भितरलं पसिस्यु सिक्छ्या यांऔ तअसिवाङ। तर मुख्या पुजाउरो सनर आन्हाएयाङ रांवाङ, ओटन यहूदीयाङै घिन्या अदालत अथाबा इस्राएलीयाङलं पुरै आराधना झिमला रुयाङजन रांखुल्वाङ, ओटन प्रेरितयाङजन झ्यालखानालन होन्चिते ऐलेस्यु आदेस यांस्यु रापरिङवाङ। 22 तर यहूदी अढिकारीयाङ नङ राटापौक नकाङै ओयाङजन झ्यालखानाल रांमाडोटौकाले वलस्यु रा:स्यु थाई रांयोवाङ, 23 "गे झ्यालखानाल जोगाइस्युई ताल गेलाइयिउ सनर वुइन्याङ झलाप तै राच्याङज्यान्या गेरङयिउ, तर झलाप गेफटौक भितरलं काङ्काईजन माडोएदुयो।" 24 जब मन्दिरला कप्तान सनर मुख्या पुजाउरोयाङै आका थाई थएस्यु हलाअ ताइवाङ, तब ईका सोगलैल नतिजा नैति ताइन्या होला ऐलेस्यु नकाङ प्रेरितयाङ बारेङन अलमल्ल परिवाङ। 25 तर काङ्का तोलोअले नकाङजन रा:स्यु आपानस्योवाङ, "खिम्चिते, जे जो रुयाङजन झ्यालखानाल जेनाएचिवाङ नकाङ मन्दिरलं च्याङस्यु रुयाङजन सिक्छ्या यांज्यारा।" 26 तब अढिकारीयाङ सकाए कप्तान हिनस्यु नकाङजन बलजफत माढास्युईज राहोन्वाङ, दानाङभन्या रुयाङै अढिकारीयाङ सनर कप्तानयाङजन लुङले टुपरा ऐलेस्यु छ्याएवाङ।

27 नकाङै प्रेरितयाङजन हिनस्यु यहूदीयाङै घिन्या अदालतल हाक रा:सच्यान्वाङ, ओटन मुख्या पुजाउरोयाङै नकाङजन रांगिन्वाङ, 28 "गे जेजन नका मिनङन नैज सिक्छ्या मायान्या कडा आग्या गेया:सिनु, तर जे सिक्छ्याले सोगल यरुशलेमल भरिस्यु खेम्दा, ओटन येशुल जी बगिइल दोस गेयर्त होनौ जेरोअचिऊ।"✝ 29 तर पत्रुस सनर अपुर प्रेरितयाङै ऐलेवाङ, "गे रुयाङल माङडी तर परमेस्वरलं आग्या पालन ढान्याईजै ताहा। 30 गे पुर्खाङल परमेस्वरले येशुजन सिन्यातन जिङदा आजाटौ, जोजन जे सिङत खिलथुकिस्यु केप्स्यु जेसएचिऊ।✝ 31 परमेस्वरले इस्राएललं पस्चातापल नाल्ट सनर नकाङल पापल छेमा यांन्या वाला येशुजन रय सनर मुक्तिदाता ठहऱ्याइस्युकने आदाइन्या घोनले हर्त आजाटौ।✝ 32 ईका सोगलै छेनल गे साची लेया, ओटन नैताइस्युई पबित्र आत्मा बै, परमेस्वरले जोले आ आग्या पालन धोर नकाङजन यांस्यु आनाएवाङ।"

33 तर जब यहूदीयाङै घिन्या अदालतला सदस्याङै ईका राथटौ, तब आवाए रारिऊ उठिऊ, कि नकाङै प्रेरितयाङजन सटौजै रारोकौ। 34 तर ब्यबस्थाला भाबनयाङ सनर जनताङ्ङन मानिसिन्या गमलिएल मिनला फरिसीले महासभालं च्याङस्यु प्रेरितयाङजन तचोए बाहेर देए हिनन्या लेस्यु आदेस आयोवाङ, 35 ओटन गमलिएलले महासभाला रुयाङजन ऐआढोवाङ, "ऐ इस्राएलीयाङ, ईका रुयाङजन जे जो ढान्या जेआन्तिज्याचिऊ, नकात होसियार ताइचिते। 36 दानाङभन्या आकअ याएज माङडी हाक बै थुदासले ङा काङ्का ऐलेन्या जिग्राइ आढोव ओटन छ्योअ चार सय रुयाङ नकाल छिन्ट लागिवाङ। नका सएसिऊ, ओटन नकाल छिन्ट लागिन्याङ सोगलै सेरासेट्ट ताइवाङ ओटन सोगलै असफल ताइवाङ। 37 ईका रुल छिन्ट जनगननाल बेला गालीलला यहूदा ऐराढान्या च्याङौ, ओटन ख्वाएयाए रुयाङजन आलेऊदेए आच्योङवाङ। ना बै नस्ट ताइदा, ओटन नकाजन मानिन्याङ हुदेएअदेए सेरासेट्ट ताइस्यु असफल ताइवाङ। 38 ओटन आका मामलाल ङा जेजन ऐढाच्या, कि ईका रुयाङत अलक्कै चुङचिते, ओटन इकाङजन राइचिरते, दानाङभन्या इकाङल आका योजना अथाबा आका काम रुयाङ्ङन ताहकन ना ओलजै मिटीसिया। 39 तर यदि आका परमेस्वरङन्ता हो भन्या जे इकाङजन रुकिऊ माढुदुचिदी। मानकन्ता जे परमेस्वरलं बिरोदल जेच्याङन्या ठहरिच्या।"

40 तब नकाङै थुदासलं सल्ला रामानिऊ। ओटन नकाङै प्रेरितयाङजन महासभा भितरलं खुल्स्यु रातुप्वाङ, ओटन "येशुलं मिनङन ताछ्योङच्यो" ऐलेन्या आग्या यांस्यु नकाङजन राराइवाङ। 41 जब प्रेरितयाङै आराधना झिम राराहौ, नकाङ हेसाङस्यु आनन्द ताइवाङ दानाङभन्या परमेस्वरले नकाङजन येशुल मिनत अपमान सहिन्या लायकला आठहराइवाङ। 42 ओटन दिनकाईज नकाङै मन्दिरलं सनर झिम-झिमल हिनस्यु येशु जै ख्रीस्ट ज्या ऐलेस्यु ह्युउन्या सनर प्रचार ढान्या माराइदुरा।