1 Fe ne atu ayi nek izhi Izhu Tsetser, amunya, bam ta nyɛmɛ te izhin bǝ sɔŋ awa ba. 2 Izhin nǝ zhi mkpaŋ ndi izhin banǝ zen zǝ Arik ba, ne lɔm zhin tɛ duŋ zhin zǝ arik anǝ yaŋ vli bǝn yaŋ lɛ. 3 Fe mbla zhin te ndi ba nuŋ ayime waŋ ndi Izhu Tsetser ayou Arik ayi ben abɔu te di, <<ne te Yesɔ anu amimin ba,>> neme inuŋ ba tei di, <<Yesɔ ayi Ŋgɔŋ,>> anaga yi iwaŋ ndi Izhu Tsetser ayi ben abɔu.

4 Inǝk izhi iyime kaŋkaŋ, ama Izhu Tsetser iyi zhin. 5 Ŋkuŋkɔŋ yi zǝ Arik iyi tetɛk ama Ŋgɔŋ ayi zhin. 6 Ŋkuŋkɔŋ yi na ndum iyi tetɛk, ama ai Arik zhin wa aduŋ kɔte ŋɔwa na ndum.

7 Tǝ kɔte ŋɔwa ne nǝgu izhi iyi Izhu Tsetser te bɛ duŋ kɔte ŋɔwa aflu ne lɛ kɛ Arik. 8 Ne nek inuŋ izhi Mgbemgbeb irɛ bǝn Izhu Tsetser, inuŋ izhi kiki tetɛk ndi irɛ bǝn Izhu izhiin iyiŋɛ inǝk ishak izhi. 9 Izhiin bǝn izhu tsetser yiŋɛ inǝk neshir nuŋ itanyɛmɛ, fena neshir nuŋ mgbyamgbyaŋ kǝ duŋ are. 10 inuŋ ina ikiki yi vuŋ anu, inuŋ izhi yi du lɛ kǝ Arik, inuŋ izhi Izhu ye Arik bǝn ishetan, inuŋ nɛ nǝgu izhi izhu kaŋkaŋ, inuŋ ne nǝgu izhi bla aŋa kaŋkaŋ. 11 Bɔbɔk izhi iyiŋɛ ai ndum kɛ Izhu Tsetser izhiin iyiŋɛ ndi ana kime bɔbɔk; ndi nǝ tiu, tɛ nǝk kɔtǝ ŋɔwa kiki kaaŋkaŋ.

12 Ikpa iyi zhin, te yi ne igab tetɛk, ndi igab iyi tetɛk ama ikpa iyi izhin, amɛ Almasihu ayi zhin. 13 Fena ane su ta ne amashir ne Izhu Tsetser zhiin te ta bǝ yi ikpa zhin, kɔta bǝ yi Yahudawa kɔ ba ta yi ŋli kɛ Yahudawa ba, agɛn kɔ ba agɛn ba, bɔbɔk mɔrɔ ne nek ta Izhu izhin.

14 Amɛ ikpa ba yi gab zhin ba iyi igab tetɛk. 15 Te yi ndi iza idi, <<nga bam yi ŋɔk ba, nga bam yi ne min kɛ kpa ba,>>ibla amɛ ba tei duŋ kɛ yaŋ yi igab yi kpa ba. 16 Te yi ndi itɔŋ te di, <<nga bam yi iyi ba, nga bam yi gab yi kpa ba,>> ibla me ba tei yar yi igab yi kpa ba. 17 Abɛ di ikpa bɔbɔk yi iyi, atei wɔ lɛ ne ni? Tena yi ndi bɔbɔk ikpa ai itɔŋ, atei baŋ mgbɔ ne ni? 18 Neme Arik ne na igab yi kpa, kɔte tayi, ne nai ir keŋ ndi ne teu. 19 Abɛdi ikpa ai igab zhiin, nki gab yi kpama ibǝ yi amei? 20 Nǝ yi amɛ, igab iyi tetɛk, ama ikpa iyi zhin.

21 Iyi ba tei di iŋɔk, <<bam wɔ bu ba!>> Itu ba tei di aza,<<bam wɔb bu ba!>> 22 Ba yiŋɛ ankyak ba, igab kpa yiŋ ndi ayige bai iki nuŋ ba, iyi yi anenen, 23 igab yi kpa yiŋ ndi ayige te di ba rɛ ndi nki me ba ai yi anǝge ŋgɔŋ. Neme igab yi kpa mɔr yiŋ ndi ba rɛ tɔ ba, ai yi aŋubǝ ŋgɔŋ. 24 Igab mɔr yiŋ ndi ire tɔ ba nai ikinuŋ ba. Ama Arik ne biŋ igab yi kpa te nek ŋgɔŋ ne igab yiŋ ndi ayige bai ikinuŋ ba, 25 te kǝr yaŋ biŋ atu bɛ yi ne kpa ba, ama igab bǝ ŋub akpa men ankun azhiin. 26 Te yi ndi igab zhin te yik iyah igaba bɛ yik iyah bɔbɔk mǝne; te yi ndi te gbar nuŋ asak, abɛ nyɛr bɔbɔk mǝne.

27 Amɛ izhin yi ndi ikpa kǝ Kristi, kɔte ŋɔwa ayi igab yi kpa maa. 28 Nǝ miŋ ke abǝ zǝ Arik nɛ hria anuŋ abɛ yi abǝ du lɛ maa, anuŋ abɛ yi abǝ bla shar maa, tɛ anuŋ bɛ yi abǝ tsar lɛ maa, anuŋ abɛ yi abɛ na iki vuŋ anu, fe anuŋ nɛ nǝk ba mgbyamgbyaŋ kǝ duŋ abɛ lɔ are, anuŋ abɛ lɔk aneshire, anuŋ abɛ ŋub abɛ zǝ Yesɔ, anuŋ abɛ zhi lɛ aŋa kaŋkaŋ. 29 Ba bɔbɔk aneshir ayi abɛ du lɛ kɛ Arik ba, ba bɔbɔk aneshir ayi abɛ bla shar yi Arik ba, kɔ bɔbɔk aneshir abɛ tsar lɛ kɛ Arik ba, kɔ bɔbɔk aneshir abɛ na iki vuŋ anu ba 30 ka duŋ aneshir are nǝ lɔ men ka abe lɛ nɛ aŋa ka abɛ bla iki yiŋ ndi ilɛme di. 31 Naa asusun amin, nǝ kiki didik iyi nǝk. Ididik ŋgɔŋgɔŋ bɔbɔk, ndi ame, ai ki iyi kuzǝ yiŋɛ.