1 Nǝ zi tu zhɔk ben shur kpa yi Kristi, Mben zhin, Nga Bulus, iwaŋ ndi me <<nklu sǝsǝk>> ne yi ben ayi bǝn abɛ zhin, ama <<nǝ tar kli mgbamgbaŋ>> ndi bam teyi ben abɛ zhin ba! 2 Mben zhin tǝ kǝr zhiŋ bǝ shɔk mǝ tǝm tǝ mfu nǝ nye muŋ ba; tǝm nǝ zhi Mtei mvǝ anɛr abaŋ ndi ayik tɛ di ta tsǝn tǝ shur ayi nǝ iki yi gɔŋmimi. 3 Ai lɛ didik tǝ ta yi nǝ gɔŋmimi, ba ta tǝ ikum ir keŋ ndi aner abɛ gɔŋmimi atǝ ba. 4 Ikiki yi tyak kum mɔr ba yi ndi yi gɔŋmimi ba ama ai mgbyamgbyaŋ kɛ Arik, iyiŋ ndi ta bǝr glii tǝ zir iklik. Tǝ zir antam ayi gaaŋa; 5 ta cɔk te antam la ben lǝlɛ mimin yiŋ ndi yar zhin wɔ lɛ kɛ Arik, ta kum asusun aneshir vuŋ te bǝ kam azǝ Kristi. 6 Ta tei sɔŋ anenen te ta bǝ vǝ abɛ yaŋ zǝ lɛ kɛ Kristi, atei ndi izhin zǝ lɛ kɛ Kristi anenen.

7 Izhin nak tɔ ikiki iyɛ abɛm ankyak. Tǝ anuŋ amɔ abaŋ ndi adi akpa men tǝ aba yɛ abǝ Kristi? neme, duŋ ba abɛ na lɛ nɛ susun amen, tǝta yi abǝ Kristi ndi aba men yi. 8 Ate yi ndi mbu asa mbu asa ne mgbyamgbyaŋ keŋ ndi Ŋgɔŋ nɛ nǝk ta tǝ ta bǝ duŋ zhin flu ne naŋ ndi ta bǝ duŋ zhin zhaku, ba shisha tei tem ba. 9 Bam wɔb te me duŋ sǝsǝk te zhin ne cɛr muŋ ba. 10 Tǝ duŋ anuŋ adi, <<Icɛr Bulus iluk tǝ na klik, ama ate yi bǝn abɛta ikpa maa sik, fe lǝlɛ maa bai kinuŋ ba.>> 11 Ir aneshir abaŋa bǝ zhi te di ta yi amɛ ne cɛr mɔr ndi bata yime ba, ta te na iki yiŋ ndi tane cɛrǝ ndi ta yime.

12 Bata tei biŋ kɔ tsar atu mɔr ben abaŋ ndi agbar atu men ba. Ndi abiŋ atu men ben atu men tena tsar atu men bǝn atu men, ba ayi ne Mgbemgbeb ba. 13 Neme, taba, bata tei ŋur asa naŋ ndi ne nyak ta ba, ama ta duŋ ŋur asa mɔr ikli ne amkpa waŋ ndi Arik nɛ nyak ta, amkpa waŋ ndi ne vuŋ zhin. 14 Ba ta ne te gbagbaŋ ne ŋur asa mɔr ba, abɛ yi lɛ mimin ndi ba tei bǝ nyɛ ben abɛ zhin ba, ayi taba ne kuti gli zhin ilɛ didik yayas kɛ Kristi. 15 Iŋur asa mɔr ba ne gar kam ndum keŋ ndi ta ne na kɛ ba. Izhɔk susun mɔr iyi, teyi ndi itanyɛmɛ min te flu, amkpa ane na ndum ne miŋ min itei bu, 16 te ta bǝ du lɛ didik kǝ men nǝ ntuntun yi gbagbaŋ. Ba ta wɔb te ta bǝ ŋur asa ne ndum keŋ ndi ne nakǝ nǝ gar kɛ nuŋ ba. 17 Ama ir keŋ ndi, <<duŋ iwaŋ ndi te ŋur asa bǝ ŋur asa bǝn Ŋgɔŋ.>> 18 Tǝ ayi mkpaŋ kǝŋ ndi Ŋgɔŋ alɛ susun nɛ atu amɔr tɛ tanyɛmɛ bǝn abɛta, bai mkpaŋ kǝŋ ndi ta lɛ asusun ngɔŋ nɛ atu amɔr ba.