1 Fe mne ndi ne susun muŋ te ndi bam ntei na nyɛ bǝn zhin ndi rǝra te zhin ba, 2 Ate yi ndi mne nek zhin rǝra, ayi ŋɔwa atei na duŋ me nyɛr mba izhineba ndi mne nek zhin rǝra ma kai? 3 Mne ncɛr zhin ir keŋ ndi mne ncɛre, te duŋ ndi mtǝ nyɛ kǝr mbǝ yi nǝ mɔ bǝn abaŋ ndi aba yi abɛ duŋ susun muŋ men. Mnǝ ntanyɛmɛ bǝn abɛ zhin bɔbɔk, te ndi izhin tei nak nyɛr bǝn abɛm. 4 Tǝ mne ncɛr zhin nǝ miŋ kɛ lɛn susun ben rǝra ben zhin amayi tetɛk ba, te zhin bǝ zhi te di nyɛr zhin ngɔŋ naŋ nǝk zhin rǝra.

5 Ate yi ndi nuŋ ne nek rǝra, bane anem rǝra ba ama ne nek zhin rǝra bɔbɔk mine, bam bla amɛ tem mnǝk zhin rǝra ngɔŋ ba. 6 Iyah yiŋ ndi aneshir tetɛk neka nǝgu neyi ne mlau ma. 7 Azǝzaŋa fe izhin bǝ zu gu zhɔk te na kɔru, kǝr kɔr susun bǝ shagu kpa ngɔŋ ba. 8 Mben zhin, te izhin bǝ tau ne nyɛr ngɔŋ. 9 Mne men cɛr zhin te mtɔ itsikli min ben zǝ lɛ anenen min ne kɔte nii. 10 Izhin te zuk nuŋ zhɔk, nga muŋ yi Mnǝ nzugu nzhɔk. Iki yiŋ ndi mne zugǝ nzhɔk, ate yi ndi iki yi zuk zhɔk yime, mne nka nzugǝ nzhɔk ne ti kɛ Kristi ne atu amin, 11 te duŋ kǝr shetan bɛ vu ta awa ba. Tǝ ta ne men zhi nkuŋkɔŋ maa.

12 Fe ndi mne yir Tarwasa tǝ ngar du lɛ kǝ men nɛ atu yi Kristi, Mnǝ yik Ŋgɔŋ nɛ buum alǝla anǝ na ndum amɔ. 13 Susun muŋ ne kyak zǝ kur ba, ndi bam ne yik zumɔr Titus amɔ ba. Fe mne nduŋ anere tǝ nkam kɔmɔ nǝ Makidɔniya.

14 Fena ta ne nyɛr Arik, waŋ ndi agli ta atsine ne itsin kɛ gah mɔr ben Kristi, waŋ ndi ne atu amɔr, iwa ne abwa mgbɔ shushum ndi Izhu ashak kɔte me. 15 Tǝ taba yi mgbɔ shushum iyi Kristi ne ti kɛ Arik ne miŋ kɛ abaŋ ndi azǝn ta izuk zhɔk bǝn abɛ yir miŋ lu. 16 Ta ye mgbɔ vimvir iyi ku bǝn anuŋ; te na ŋu mgbɔ shushum iyi tsitsir bǝn anuŋ. Fe ayi ŋɔwa atei baŋ ihru kǝŋe? 17 Ba ta yi ndi idu aneshir abaŋ ndi abla lɛ kɛ Arik te bɛ aya ba ba. Nǝ ŋa nuŋ, ne miŋ kɛ Kristi, ta du lɛ kɛ Arik anenen, ir kɛ aner abɛ rɛ ben Arik.