1 Fe itanyɛme ne susun ayi ki ndi ne yi ta iyi shur ayi tena tanyɛme nǝ ki ndi bata ne yik ba. 2 Waŋa ayi ki ndi aner abɛ kukub ne tanyɛme men ne duŋ Arik ata ba.

3 Nǝ tanyɛme ta zhi te Arik nena kiki iyi gɔŋmimi ne lɛ maa, teduŋ iki ndi ne yigǝ bane nai ne yik ayi ba.

4 Nǝ tanyɛme iyi susun Abila ne tuk Arik amkpur adidik anaŋ ayou Ke ne. Nǝ tanyɛme ne di Abila ayi ner didik, ndi Arik ne lɛ ilɛ didik ne tu ayi tuk amkpur amaa. Neme ne tanyɛme ari zen lɛ, ndi neka ku.

5 Nǝ tanyɛme iyi susun ne duŋ abaŋ Enok tsitsir iyaŋ ku, ne yeme, Arik ne baŋu ne vli maa bane ku ba. Ndi Arik ne she baŋu, ne bla te ayi ner waŋ di ne naa Arik ki iyi rɛ. 6 Fena ne iyaŋ tanyɛme iyi susun bai tǝ te abɛ naa Arik ki iyi rɛ ba, te iwaŋ ndi ate nyɛ bene abɛ tanyɛme te Arik ayime te atei na nek abaŋ ndi awɔbu ne susun zhiin ai nǝk ba idǝk men.

7 Nǝ tanyɛme iyi susun ne duŋ Nuhu ne wɔ gbaŋ atɔŋ iye Arik netu kiki iyi nyɛ ndi bane yigǝ neyi ba, ne klu sǝsǝk iyi tsetser ne kpaŋ Igu ŋgɔŋ tǝ bɛ ta aner abɛ kɔmaa azhɔk. Nǝ tanyɛme maa ne zǝr gɔŋmimi teyi ita iyi abɛ na ki didik ndi ne nyɛ ne tanyɛme.

8 Nǝ tanyɛme iyi susun ne duŋ Ibrai ne wɔ ilɛ kɛ Arik ndi ne azhɔu tǝ bɛ duŋ kɔmaa te kɔmɔ ne ntun iyiŋ ndi Arik ne akpa aŋyak te iwa atei nǝgu. Ne duŋ ntun maa ne yaŋ zhi amkpa awaŋ ndi uwa gara. 9 Nǝ tanyɛme ne sɔŋ ndi icen ne ntun iyiŋ ndi Arik ne nǝgu. Ne sɔŋ ne abur, ir kɛ Ishaku ben Yakubu, aba aneta ir ki zhiin yiŋɛ ben Arik. 10 Ibrai anezen tɔ ka wa atei yik ntun iyiŋ ndi ne shur tanda teshe amei, iwaŋ ndi ne gli ira izhu iyi mɛ me aye Arik.

11 Nǝ tanyɛme iyi susun ne duŋ Ibrai neyi tetɛɛ, ndi ice neka vuŋu ŋgɔŋ te Saratu nɛ kana akam ase ayi ŋli amumun. Ne tanyɛme ben Arik te Gli itanyɛme maa. 12 Neme ibaŋ rɛ ben iner zhiin waŋa,

13 Aneshir abaŋa aneyi atsitsir ne tanyɛme iyi susun ndi ne ku. Bane ta kiki iyi kpa nyak ba; ne nak ayige tena tanyɛme neyi ire gbagbaŋ. Te gli tedi aba ayi acɛn ben acɛn ne gɔŋmimi. 14 Aner abɛ bla ir kiki yiŋɛ iduŋ ba abɛzhi tedi aba awɔb ntun iye atu amen. 15 atei ndi alɛ susun ikɛ ntun ndi ne duŋǝ, ai bɛ yi ne mkpaŋ kɛ di aba atei ŋur akam. 16 Ibǝyi amɛ, ne shur ayi te aba abɛ yik ntun didik, ntun iyi gbarshu. Ndi amɛ bane klu ishisha iye Arik te aba abɛ zhɔu te Arik amen ba, te nena ntun ngɔŋ aŋyak ba.

17 Nǝ tanyɛme iyi susun zhin ne duŋ Ibrai ne abaŋ izu maa Ishaku atuk amkpuro. Iwaŋ ndi ne ta ikpa nyak ane tei tuk amkpur ne izhiin amaa ben mgbyaŋ zu maa zhiin, 18 ne yeme Arik ne diu, <<Igar zǝ ben Ishaku te utei yik iŋle kɛ du ne kpa nyak muŋ.>> 19 Ibrai ne tanyɛme te Arik ayi ne mgbyamgbyaŋ kɛ lɛk Ishaku ne iku, ne bla nkanlɛ iyiŋɛ, Ibrai ne ta Ishaku aŋur akama ne ku.

20 Nǝ tanyɛme iyi susun Ishaku nɛ nǝk Yakubu ben Isuwa anu adidik ne sɔŋ kɛ gɔŋmimi.

21 Nǝ tanyɛme iyi susun Yakubu nɛ nǝk amun Yusuu anu adidik te ashe ku. Ne zhik aklɛ ne tu asanda ane tsǝn amaa te zǝ kuu Arik.

22 Nǝ tanyɛme iyi susun ne duŋ Yusuu, ndi mkpaŋ kǝ ku maa tate, ne abla ir tsǝn kɛ aner abɛ Isrela ire Masar ben nǝk ba iki ndi atei na ne kum maa.

23 Nǝ tanyɛme iyi susun ane tetɛɛ ben iya maa Musa ne baŋu asu ayir ihwa me tar ndi ne ŋliu, Ne yigu are nzak, fe ne akyak zǝ ilɛ kɛ bla itum ane Masar.

24 Nǝ tanyɛme iyi susun ne duŋ Musa, ndi neka flu, ne akyak tanyɛme tǝ bɛ azhɔ wa te izu iva itum. 25 Ne mtanyeme te iwa abɛ yik iyah ndi nki aneshir abɛ Arik inaŋ men kɛ lalɛ mkpaŋ. 26 Ne mtanyeme tǝ wa abɛ yik iyah netu ayi Kristi ndi ayi iki didik ŋgɔŋ inaŋ adudun ki ayi Masar, te iwa azǝn tɔ iti kɛ idǝk maa. 27 Nǝ tanyɛme iyi susun Musa ne ru ne Masar iyaŋ klu sisik iyi itum; te vuŋ kpa te duŋu neyik iwaŋ ndi ba ayigu ba. 28 Nǝ tanyɛme iyi susun ne gli inayi tuk glak ben shur azhizhi ne adɔŋkɔŋ, teduŋ Ineshar ayou Arik netu iku abɛ ŋun ŋli mla kɛ amunlum abɛ aner Isrela.

29 Nǝ tanyɛme iyi susun aneshire abɛ Isrela ne gara tsǝn te glɔ Inǝk ŋgɔŋ kluklu iyaŋ amashir; ndi aner abɛ Masar ne di aba atei na amɛ, amashir ne avuba adɔmɔ.

30 Nǝ tanyɛme iyi susun adampem ane ntun yi Jerikɔ ne zhaku, ndi aner abɛ Isrela ne goŋ ntuno ari ne iber me taŋgba.

31 Nǝ tanyɛme iyi susun Rahab ndi akur ben alulum, ne ta abɛ shar zhib tɔ ntun asuyir, bane ŋunu ben abɛ kyak wɔ lɛ kɛ Arik ba,

32 Tǝ aye nii iyi naŋ ndi Mtei na bla? Bam na yi ne mkpaŋ kɛ lɛ netu akɛ Gidiyon, Barak, Samson, Zhabta, Doda, Samula ben abɛ tɔ bla shar Arik, 33 abaŋ ndi ne tanyɛme iyi susun nɛ li ikum ne ntuntun, ne tsǝntsǝn didik, te yik iki ndi Arik ne kpai anyak. Iwaŋ ndi ne ku nunu yi ane zaki, 34 ubǝ rim ilu kǝ ta, te klu tibɛ nenu akɛ mashi; iwaŋ ndi iklu aŋin maa ne kam yi iklik; te iwa ne akam ayi ne mgbyamgbyaŋ ne kum ndi ane ta itsar klik maa ben abɛ kpaakpa ne ntuntun ye abɛm. 35 Nǝ tanyɛme iyi susun ne lɛk aner abɛ amba ne ku te akam ayi atsitsir. Anuŋ ne kyak ta izuk zhɔk, te ku ne miŋ kɛ yik iyah te abɛ ka lǝk ba ne vli kɛ rɛ. 36 Anuŋ ne pwar ba aŋyak tena milk ba tsik ne asǝsa, anuŋ ne kpa ba atabɛrbɛr te gli ba ate shur ne jaru. 37 Ne tyak ba ne mkpaŋ; anuŋ ne aŋar ba ne ada ashur aŋa yaa, ne yak anuŋ ne nzi. Ne goŋ ari te su akpaki ayi awuwu ben awanta, ijɔŋ, iyah, ben sak iyah. 38 Igɔŋmimi me bane rɛ ba ba. Ane tsǝn te ben adur ne ahwaŋ aŋgɔŋ, ben atugbu, ne ŋkɛ ben adudu ne mimi.

39 Aneshir abaŋa bɔbɔk ne nyɛr Arik ne tanyɛme iyi asusun amen, neme inuŋ ne miŋ mǝne bane ta iki ndi ne mǝne akpai aŋyak ba. 40 Arik ne na ikinuŋ iyi rɛ netu amɔr. Tǝ duŋ ben taba ai yik iklik mgbamgbaŋ.