1 Macizede Itum ne Salɛm bǝn ngɔŋ ne na ndum Arik. Ndi Ibrai ne sɔŋ aŋyak are ikum ndi ne li atum amɛ nas ne kum, Macizede ne mla bǝn abɔu te sagu ŋɔk didik, 2 ankyak Ibrai ne nǝgu izhiin ne miŋ kɛ wur ne bɔbɔk iki yiŋ ndi wa ayime neyi. (Ne kuti isak kɛ Macizede iyi <<Itum ne yi tsetser>>; tena yi Itum ne Salɛm, nena zhɔu te <<Itum ne sik susun>>.) 3 Macizede ba ne yi ne Tetɛɛ ben iyah ben nga ŋli ba; ba ne cɛr ikinuŋ ne atu yi ŋliu kɔ iku ba. Ayi ndi Izu Arik; ayi ne na ndum kɛ yaŋ klɛtu.

4 Ubǝ tɔ, te yik, ir keŋ ndi neyi ngɔŋ: Ibrai ne tu maa, ndi ayi ntsǝntsǝm amɔr, ne nǝgu izhiin ne miŋ kɛ wur kɛ iki yiŋ ndi wa ne yigǝ ne ikum. 5 Fe abaŋ ndi ayi ŋli kɛ Lawi ndi aye aba na ndum kɛ Arik ne kpa lɛ aŋyak te di abɛ ta izhiin ne miŋ kɛ wur ben aneshir abɛ Isrela, ndi aner amen, ndi anayi ŋli kɛ Ibrai. 6 Macizede bai nga ŋli kɛ Lawi ba, ama ne ta izhiin ben Ibrai te nǝgu anu didik, iwaŋ ndi ayi ne ilɛ kɛ kpa nyak bǝn Arik. 7 Bai iki te atam ba ngɔŋ anǝk vǝtsɔb anu didik. 8 Bǝn abɛ na ndum kɛ Arik abɛ kuh aba ata izhiin ne miŋ kɛ wur; ama bǝn Macizede abɛyi atsitsir aba ata izhiin ne min kɛ wur, ir keŋ ndi ilɛ kɛ Arik ne bla. 9 Amɛ, atei di, Lawi waŋ ndi ata zhiin ne miŋ kɛ wur, nɛ nǝk Ibrai izhiin ne miŋ kɛ wur. 10 Bane zen aŋli Lawi ba, ama ne lɛ ne miŋ ne kɛ atsintsim amaa, Macizede ne mla kpa bǝn Ibrai.

11 Aneyi ne atu aye ne Lawi abɛ na ndum kɛ Arik ne nek Yahudawa ilɛ kɛ kpa nyak. Neme, abɛdi ndum kɛ ane Lawi nɛ nǝk abɛ na ndum kɛ Arik ne shaga, bai abɛ duŋ nena ndum kɛ Arik nuŋ amunoru ba, iwaŋ ndi ayi ne nkɔŋ kɛ abɛ na Arik ndum ndi ai Macizede, bai Aruna ba. 12 Ate yi ndi ate sen nkɔŋ kɛ abɛ na ndum kɛ Arik, ai bɛ na sen ilɛ kɛ kpa nyak. 13 Arik amɔr iwaŋ ndi alɛlɛ ne atu amaa, ba yi nga ŋli kɛ ane Lawi ba, ba nuŋ ne nga ŋli mǝne ne na ndum kɛ Arik ba. 14 Ane zhi tedi ne ŋliu ne nga kɛ Yahuza; Musa ba ne bla ba azhɔgo ndi ne lɛ ne atu abɛ na ndum Arik ba.

15 Iyiŋɛ ne yi ndende, ine na ndum Arik nuŋ kaaŋkaŋ ne munoru; ndi ayi ndi Macizede. 16 Ne yi ne na ndum kɛ Arik, ba ne zǝ nkɔŋ ben ilɛ kɛ aneshir ba, ama mgbyamgbyaŋ kɛ ivli keŋ ndi ba yi ne klɛtu ba. 17 Tǝ ilɛ kɛ Arik idi, <<Utei yi ne na ndum kɛ Arik yaŋ klɛtu, ndi Macizede.>> 18 Lǝlɛ yi kpa nyak yi kukub ne duŋǝ, ba yi ne mgbyamgbyaŋ ba tena yi iki sha. 19 Tǝ icɛr yi Musa ba ne duŋ ikinuŋ ishaga ba. Azizaŋa nɛ nǝk ta ishur ayi didik ndi ta nyɛ gbahir ben Arik.

20 Neme, Arik nena she arim. Anuŋ abaŋ ndi aye abɛ na ndum kɛ Arik bane she ba arim ba. 21 Ama Yesɔ neyi nena ndum kɛ Arik ndi Arik ne sheu arim te diu:

<<Arik ne kpa nyak

Batei na rige ashur ba;

Utei yi nena ndum kɛ Arik yaŋ klɛtu.>>

22 Ir kaaŋkaŋ yiŋɛ, fe, ne duŋ Yesɔ ayi ne ankɔŋ ane ilɛ kɛ kpa nyak didik.

23 Waŋa anayi ikinuŋ kaaŋkaŋ: abɛ na ndum kɛ Arik ne yime tetɛk, te iku ne yar ba na ndum mǝne. 24 Ama Yesɔ ayime yaŋ klɛtu, ndum maa ben ngɔŋ maa bane baŋ kɛ anǝk inuŋ ba. 25 Fe ayi ne mgbyamgbyaŋ, kɔte mkpaŋ takɛ, te abɛ ta abaŋ ndi anyɛ ben Arik ne atu maa azhɔk, te Iwa ayime yaŋ klɛtu te abɛ ben ba Arik.

26 Yesɔ, wa, ayi ngɔŋ nena ndum kɛ Arik ndi anaa ta kiki bɔbɔk ndi ta wɔ bǝ. Ayi tsetser; ba yi ne la lɛ bǝn zumimin ba; ane amene ahriau atibe bǝn abɛ na zumimin te lɛgu agli akɔmɔ ne shu. 27 Ba yi ndi nki abɛ na ndum Arik ba; ba wɔb te abɛ tsik ibaŋ kɔte bɛr tayi ne atu ayi na zumimin maa bǝn nki aneshir ba. Ne tsik ibaŋ mkpaŋ zhiin ankyak, ndi nɛ nǝk itu maa. 28 Icɛr yi Musa ne hria anuŋ abaŋ ndi aklu anyɛ te abɛ yi angɔŋgɔŋ abɛ na ndum kɛ Arik; ama ikpa nyak yi Arik bǝn sherim, ndi ne nyɛ ne igɔŋ cɛr yi Musa, ne hria Izu maa te duŋu ashaga iyaŋ klɛtu.