Hebreus 8

Yesɔ ŋgon amɔr ne na ndum Arik

1 Neme ikiyiŋ ndi ta di tayi ne ŋgon ne na ndum kɛ Arik, iwaŋ ndi akɔ sɔŋ ne ŋɔk li ne mben yi Arik ne gbarshu. 2 Ana ndum kɛ ngɔŋ abɛ na ndum Arik ne amkpa ne tsetser, ne Akabaŋkɔŋ awaŋ ndi Arik ne nau aŋyak, bai ineshir ba.

3 Kɔte ngɔŋ tawa ndi ana ndum kɛ Arik ne hriau te abɛ tsik Arik ibaŋ yi Awuwu, fe ngɔŋ amɔr ne na ndum Arik ayi ne iki yiŋ ndi iwa maayi atei tsik ibaŋa neyi. 4 Abɛ di ne yi ne gɔŋmimi, bai abɛ yi nena ndum kɛ Arik ba, te abɛ na ndum kɛ Arik ne yime abaŋ ndi atsik ibaŋ ndi Yahudawa awɔb. 5 Ana ndum ne Akaba awaŋ ndi ayi izhu yi ikiki ndi iyi ne gbarshu. Iyi anenen ndi mkpaŋ kɛ Musa. Ndi ne tei te Ibur kɛ Arik, Arik ne diu, <<Ubɛ nak na kɛ ir keŋ ndi ne tsa ru ne tu gbu.>> 6 Ama azizaŋa, Arik ne Yesɔ ndum keŋ ndi inaŋ men, ndi ilɛ keŋ ndi Arik ne kpa kɛ aŋyak iwa ben aneshir amaa ndi irɛ, te ayi lɛ kɛ kpa nyak kɛ ikiki didik.

7 Abɛ di ilɛ kɛ kpa nyak kɛ kuti ne yi anenen bai abɛ na kpa kɛ Mkpaŋ kɛ yaa aŋyak ba. 8 Ama Arik neyik klu aŋin ben aner amaa ndi ne di:

<<Arik adi, iber nyɛ,

Ndi M tei mkpaŋ ilɛ yayas nyak ben aneshir abɛ Isrela ben aneshir abɛ Yahuza.

9 Batei yi ndi ikpa nyak yiŋ ndi Mne ntai bǝn atsǝntsǝm amen ba

Ne iber yiŋ ndi Mne vu ba ne ŋɔk muŋ te ngli ba rumɔ ne Masar.

Bane zǝ ilɛ kɛ kpa nyak muŋ ben abɛba ba,

Neme, bam ne kam tɔ ba ba.

10 Azizaŋa, waŋa ai lɛ kǝŋ ndi M tei mkpaŋ kǝ nyak bǝn aneshir abǝ Isrela

Arik adi, ne iber yi nyɛ:

M tei tib ilɛ muŋ nyak ne alambur tu amen

Tena ncɛr kɛ ne asusun amen:

M tei yi Arik amen,

Aba atei na yi aneshir amuŋ.

11 Ba nuŋ ne miŋ mǝne ndi atei tsar kpa maa,

Ka inuŋ ai tsar zumen, te di, <Ubɛ zhi Arik.>

Tǝ bɔbɔk mǝne atei zhim, ivuŋ rɛ amuotsɔtsɔb ben te gar ben angɔŋgɔŋ.

12 M tei zuk ba shur ne zumimin men

Bam tei na shuzhi la lɛ men ba.>>

13 Ndi Arik ne lɛ ilɛ kɛ kpa nyak yayas, neka duŋ yi kuti me ibǝ yi cice; neme bɔbɔk iki yiŋ ndi ne ka cɔkla itei dɔ batei na yigǝ ba.