1 Muling nagalit ang Panginoon sa mga Israelita, kaya ginamit niya si David laban sa kanila. Sinabi niya, "Isensus mo ang mga mamamayan ng Israel at Juda."

2 Kaya sinabi ni Haring David kay Joab at sa mga kumander ng mga sundalo, "Puntahan nʼyo ang lahat ng lahi ng Israel, mula Dan hanggang Beer-seba,* at isensus nʼyo ang mga mamamayan, upang malaman ko kung ilan silang lahat."

3 Ngunit sumagot si Joab sa hari, "Paramihin sana ng Panginoon na inyong Diyos ang mga tauhan nʼyo ng isandaang beses, at makita nʼyo sana ito. Ngunit, Mahal na Hari, bakit gusto nʼyong gawin ang bagay na ito?"

4 Ngunit nagpumilit ang hari, kaya lumakad si Joab at ang mga opisyal ng mga sundalo para isensus ang mga mamamayan ng Israel.

5 Tumawid sila sa Ilog Jordan at sinimulan* ang pagsensus sa Aroer, timog ng bayan na nasa gilid ng daluyan ng tubig. Mula roon dumiretso sila sa Gad hanggang sa Jazer. 6 Pumunta rin sila sa Gilead, sa Tatim Hodsi, sa Dan Jaan, at umikot sila papuntang Sidon. 7 Pagkatapos, pumunta sila sa napapaderang lungsod ng Tiro, at sa lahat ng bayan ng mga Heveo at Cananeo, at sa kahuli-hulihan, nagpunta sila sa Beer-seba, sa timog* ng Juda.

8 Nalibot nila ang buong bansa sa loob ng siyam na buwan at dalawampung araw, at pagkatapos, bumalik sila sa Jerusalem.

9 Sinabi niya kay Haring David ang bilang ng mga lalaki na may kakayahang makipaglaban: walong daang libo sa Israel at limandaang libo sa Juda.

10 Nakonsensya si David, matapos niyang ipasensus ang mga tao. Kaya sinabi niya sa Panginoon, "Nagkasala po ako dahil sa ginawa ko. Kaya nakikiusap ako sa inyo, Panginoon, na patawarin nʼyo ako na inyong lingkod sa kasalanan ko, dahil isa pong kahangalan ang ginawa ko."

11 Hindi pa nakakabangon si David kinaumagahan nang sabihin ng Panginoon kay Gad na propeta ni David, 12 "Pumunta ka kay David at sabihin mo sa kanya, ‘Ito ang sinabi ng Panginoon: Magbibigay ako ng tatlong pagpipilian mo. Mamili ka ng isa kung alin ang gusto mong gawin ko saʼyo.’ "

13 Kaya pumunta si Gad at sinabi, "Alin po sa tatlong ito ang pipiliin nʼyo: Tatlong taon* na taggutom sa bansa nʼyo, tatlong buwan na tumatakas kayo sa mga kalaban nʼyo habang hinahabol nila kayo, o tatlong araw na salot sa bansa nʼyo? Pag-isipan nʼyo po ito nang mabuti, at ipaalam nʼyo po sa akin kung ano ang isasagot ko sa Panginoon na nagsugo sa akin."

14 Sumagot si David kay Gad, "Nahihirapan akong pumili. Mas mabuti pang ang kamay ng Panginoon ang magparusa sa amin kaysa ang mga tao, dahil maawain ang Panginoon."

15 Kaya nagpadala ang Panginoon ng matinding salot sa Israel mula noong umagang iyon hanggang sa itinakda niyang panahon. At 70,000 tao ang namatay mula Dan hanggang sa Beer-seba. 16 Nang papatayin na ng anghel ang mga mamamayan ng Jerusalem, naawa ang Panginoon sa mga tao.* sa mga tao: O nagbago ang desisyon ng Panginoon sa pagpaparusa sa mga tao. Kaya sinabi niya sa anghel na nagpaparusa sa mga tao, "Tama na! Huwag na silang parusahan." Nang oras na iyon, nakatayo ang anghel ng Panginoon sa may giikan ni Arauna na Jebuseo.

17 Nang makita ni David ang anghel na pumapatay ng mga tao, sinabi niya sa Panginoon, "Ako po ang may kasalanan. Ang mga taong itoʼy gaya ng mga tupa na walang nagawang kasalanan. Ako na lang po at ang sambahayan ko ang parusahan ninyo."

18 Nang araw na iyon, nagpunta si Gad kay David at sinabi sa kanya, "Umakyat kayo sa giikan ni Arauna na Jebuseo at gumawa kayo roon ng altar para sa Panginoon." 19 Kaya umakyat si David gaya ng iniutos ng Panginoon kay Gad. 20 Nang makita ni Arauna na paparating ang hari at ang mga tauhan nito, lumabas siya at lumuhod sa harapan ni David.

21 Sinabi ni Arauna, "Mahal na Hari, bakit po kayo nandito?" Sumagot si David, "Pumunta ako rito para bilhin ang giikan mo, dahil gagawa ako ng altar para sa Panginoon, upang matigil na ang salot."

22 Sinabi ni Arauna, "Kunin nʼyo na lang po at ihandog sa Panginoon ang anumang gustuhin nʼyo, Mahal na Hari. Narito ang mga baka para ialay nʼyo bilang handog na sinusunog. Narito rin po ang mga pamatok pati ang mga tabla na ginagamit sa paggiik, upang gawin nʼyong panggatong. 23 Mahal na Hari, ibibigay ko po itong lahat sa inyo, at tanggapin sana ng Panginoon na inyong Diyos ang handog ninyo."

24 Ngunit sumagot si Haring David, "Hindi ko ito tatanggapin nang libre; babayaran kita. Hindi ako maghahandog sa Panginoon kong Diyos ng mga handog na sinusunog na walang halaga sa akin." Kaya binili ni David ang giikan at ang mga baka sa halagang limampung pirasong pilak.

25 Pagkatapos, gumawa siya roon ng altar para sa Panginoon at nag-alay ng mga handog na sinusunog at mga handog pangkapayapaan. Sinagot ng Panginoon ang panalangin ni David para sa Israel, at huminto ang matinding salot.