1 Nao i gat wan man, nem long hem Jeftaha, we hem i wan man blong faet we i no save fraet. Hem i wan man Gilead, mo mama blong hem i wan woman blong rod. Papa blong hem, nem blong hem Gilead, 2 mo hem i gat ol narafala brata blong hem we stret woman blong papa blong hem i bonem olgeta. Mo taem olgeta ya oli gruap, oli ronemaot hem i gowe long ples blong olgeta. Oli talem long hem se, "Bambae yu no save kasem wan samting nating we i blong papa blong yumi, from we mama blong yu i wan woman blong rod nomo." 3 Nao hem i ronwe long ol brata ya blong hem, i go stap longtaem lelebet long distrik ya Tob. Mo taem hem i stap long ples ya, ol stronghed blong ples ya oli luk hem, mo oli laekem hem, nao oli stap hangraon olbaot wetem hem, mo oli stap go stil long ol man.

4 Nao long taem ya we ol man Amon oli girap, oli kam blong mekem faet long ol laen* blong Isrel,* 5 ol lida blong ol man Gilead wetem ol man blong olgeta oli go luk hem, oli askem long hem blong i aot long ples ya, i kambak long ples blong olgeta. 6 Oli talem long hem se, "I gud yu kambak, yu lidim mifala, blong bambae yumi go faet long ol man Amon ya."

7 Be hem i talem long olgeta se, "!Man, yu luk! Bifo, yufala i no wantem luk mi nating, mo yufala i ronemaot mi long ples blong papa blong mi. !Be naoia, taem trabol i kasem yufala, yufala i kam lukaot mi bakegen!"

8 Nao oli talem long hem se, "Mifala i kam luk yu naoia, from we mifala i wantem blong yu bambae yu lidim mifala blong go faet long ol man Amon ya. Bambae yu yu kam lida blong mifala evriwan ya long Gilead."

9 Nao hem i talem long olgeta se, "?Sipos yufala i tekem mi mi gobak long ples blong yumi blong mekem faet long ol man Amon ya, mo Hae God i mekem we yumi winim olgeta, be bambae yufala i glad blong mi mi kam lida blong yufala?"

10 Mo olgeta oli talem se, "Yes, mifala evriwan i agri. Mo Hae God nomo i witnes long promes ya blong yumi." 11 Nao hem i gobak wetem olgeta long Mispa, mo ol man Gilead oli putumap hem i kam lida blong olgeta, mo i komanda blong ol soldia blong olgeta. Mo long taem ya, hem i mekem promes ya bakegen wetem olgeta long fes blong Hae God.

12 Nao hem i sanem sam man blong karem tok oli go luk king blong Amon, blong oli askem long hem se, "?Yufala i kam blong mekem faet long ples blong mifala from wanem? ?Wanem samting we mifala i mekem, nao yu agens long mifala from?"

13 Nao king ya i talem long olgeta se, "Taem ol olfala blong yufala bifo oli aot long Ijip, olgeta oli kam tekemaot olgeta graon blong mi, i stat long Anon Reva long saot, i folem Jodan Reva long wes, i go kasem Jabok Reva long not. Naoia yufala i mas givimbak olgeta graon ya long mifala long gudfala tingting nomo."

14 Nao taem Jeftaha i harem tok ya, hem i sanem ol man ya oli go luk king ya bakegen, 15 blong talem long hem se, "King. Ol olfala ya blong mifala bifo oli no tekemaot ol graon blong ol man Moab mo ol man Amon. Tok ya we yu yu talem i no tru ya. 16 Stori blong bisnes ya i olsem. Taem olgeta ya oli aot long Ijip, olgeta oli pastru long draeples, mo oli krosem Redsi, nao oli kam long ples ya Kades. 17 ✝Nao oli sanem tok i go long king blong ol man Edom, oli askem long hem blong i letem long olgeta blong oli pastru long kantri blong hem, be hem i no wantem. Mo oli askem tu long king blong Moab blong oli save pastru long kantri blong hem, be hem tu i no wantem. Nao from samting ya, olgeta oli stap nomo long Kades. 18 ✝Nao oli stap wokbaot nomo long draeples, gogo oli pasraon long saed blong kantri ya Edom, mo long kantri ya Moab, nao oli go kasem narasaed Moab long is, long Anon Reva saed i kam. Oli no go insaed long graon blong ol man Moab, from we Anon Reva i mak blong graon blong olgeta. 19 ✝Nao oli putumap ol haos tapolen blong olgeta long ples ya, mo oli sanem sam man oli go luk King Sihon, we i wan king blong ol man Amoro,* we hedkwota blong hem i stap long taon ya Hesbon. Oli askem long hem blong i letem long olgeta blong oli pastru long kantri blong hem blong go long ol graon blong olgeta, 20 be king ya tu i no wantem from we hem i no trastem olgeta. Nao hem i girap, i singaot olgeta soldia blong hem oli kam wanples, oli putumap ol haos tapolen blong olgeta long Jahaj, mo oli go mekem faet long ol olfala ya blong mifala. 21 Be Hae God i God blong olfala Isrel ya bifo, we mifala ya i laen blong hem, mo hem i mekem we ol bubu ya blong mifala oli winim king ya wetem ol soldia blong hem. Nao oli holem olgeta graon blong ol man Amoro i blong olgeta. 22 Mak blong olgeta graon ya we oli holem, long saed i go long saot i folem Anon Reva i godaon kasem Ded* Si, mo i folem Jodan Reva i go antap kasem Jabok Reva long not. Mo i folem Jabok Reva i go antap kasem draeples, mo draeples ya i mak blong hem saed i go long is, go kasem Anon Reva bakegen long saot. 23 Olgeta samting ya i wok blong Hae God ya nomo. Hem nao i givhan long ol olfala ya blong mifala bifo, i ronemaot ol man Amoro ya. 24 ?Olsem wanem yu wantem tekemaot ol graon ya bakegen? Kemos i god blong yufala, mo yu yu save holemtaet ol samting ya we hem i givim long yufala. Mo long sem fasin, Hae God i God blong mifala, mo mifala tu, bambae mifala i holemtaet ol samting ya we hem i givim long mifala. 25 ✝?Olsem wanem? ?Yu ting se yu yu strong moa, yu winim King Balak, king blong ol man Moab bifo, we papa blong hem Jiforo? !Hem i no kam singaot ol olfala ya blong mifala blong oli go faet long hem! !Mo hem i no kam traem mekem faet long olgeta! 26 Tu ples ya Hesbon mo Aroere, wetem olgeta vilej we oli stap raonabaot long tufala, mo olgeta taon ya tu we oli stap long saed blong Anon Reva, mifala i stap holem olgeta tri handred yia finis. !Hemia i longtaem tumas ya! ?From wanem yufala i no wantem kam tekemaot bifo? 27 !Mi mi no mekem wan samting nogud long yu! !Yu, yes! !Yu yu stap mekem i nogud long mi, we yu wantem kam mekem faet long mi! Hae God i prapa man blong jajem man, mo bisnes ya blong yumi, yufala ol man Amon wetem mifala ol laen blong Isrel, tede hem bambae i soemaot ansa blong hem." 28 Be king ya i no harem nating ol tok ya we hem i sanem i go long hem.

29 Nao Spirit blong Hae God i kam long Jeftaha, i givim paoa long hem,* blong Hae God i kam long Jeftaha, mo hem i go luk olgeta long distrik ya Gilead mo long distrik ya Manase,* blong singaot ol man blong faet oli kam, mo i kambak bakegen long Mispa long Gilead, blong pas i go long Amon. 30 Nao hem i mekem wan strong promes long Hae God se, "Hae God. Mi mi promes se sipos yu mekem we mi mi win, 31 nao mi kambak long haos blong mi, fas man we bambae i kamaot blong mitim mi, man ya bambae mi mi kilim hem, mi bonem hem long olta blong mekem wosip long yu."

32 Nao hem wetem ol man blong hem oli go insaed long graon blong ol man Amon blong go mekem faet long olgeta, mo Hae God i mekem we oli winim olgeta. 33 Oli kilim olgeta we oli meksave olgeta, i stat long Aroere, i go kasem Minit, mo i gat twanti taon we oli kilim ol man blong olgeta, gogo kasem taon ya Abelkeramim longwe. Long taem ya, olgeta oli winimgud ol man Amon, mo oli kilim plante long olgeta oli ded.

34 Nao taem Jeftaha i kamhom bakegen long Mispa, gel blong hem i kam blong mitim hem. Hem i stap kilim tamborin, mo i stap danis i kam. Gel ya i no gat brata blong hem mo sista blong hem, hem wan nomo we papa blong hem i bonem. 35 ✝Nao taem papa blong hem i luk hem, hem i harem nogud tumas, we i stap terem* klos blong hem from, nao i talem se, "!O, pikinini blong mi, yu yu mekem mi mi harem nogud tumas! ?From wanem we yu, i no narafala man we i kam mitim mi? !Samting ya i spolem mi olgeta! !Mi mi mekem wan strong promes finis long Hae God, mo bambae mi no save brekem promes ya bakegen!"

36 Nao gel ya i talem long hem se, "Papa, sipos yu yu mekem promes finis long Hae God olsem, bambae yu mas mekem long mi olsem we yu talem finis se bambae yu mekem. Hem i mekem finis we yu yu winim ol man Amon ya we oli enemi blong yu." 37 Be hem i askem long papa blong hem se, "Papa. I gat wan samting we mi wantem askem long yu. Mi wantem blong yu letem mi mi gowe fastaem. Bambae mi go stap tu manis antap long hil wetem ol gel we oli fren blong mi, blong mifala i save harem nogud mifala i krae, from we neva mi mi slip wetem man, mo bambae mi ded we mi no mared yet."

38 Papa blong hem i talem long hem se, "I gud nomo. Yu save go, mo bambae yu save stap tu manis." Nao hem wetem ol fren blong hem oli go antap long hil, oli stap krae from hem, from we neva hem i slip wetem man, mo bambae hem i ded we i no mared yet. 39 Biaen, taem we tu manis i pas, hem i kambak long papa blong hem. Nao papa blong hem i mekem olsem we hem i promes finis long Hae God, mo gel ya i ded we neva i slip wetem man samtaem.

Nao samting ya i stamba blong fasin ya we i kam kastom blong ol laen* blong Isrel,* 40 we evri yia, ol gel oli go stap fo dei long hil, blong oli krae from dota blong man Gilead ya Jeftaha.