1-3 ✝Nao Gideon, we niufala nem blong hem Jerubal, hem wetem ol soldia blong hem oli girap long eli moning, oli go stap klosap long springwota ya long Harod. Oli stap klosap long hil ya Gilead. Mo ol man Midian oli stap long not, long narasaed bigfala level ples ya Jisrehel, klosap long wan hil nem blong hem More. Nao Hae God i talem long hem se, "Gideon. Ol man ya blong yu oli plante tumas, mi no save yusum olgeta blong kilim ol man Midian. Sipos oli win, bambae oli ting se oli win long paoa blong olgeta nomo. Nao bambae oli no save ona long mi. Yu mas talem long olgeta se, ‘!Ei! !Sipos sam long yumi oli fraet, i gud oli gobak long ples blong olgeta!’ " Nao taem Gideon i talem olsem long olgeta, i gat twanti tu taosen man oli gobak long ples blong olgeta, ten taosen nomo oli stap.

4 Nao Hae God i toktok bakegen long Gideon, i talem se, "No, ol man ya oli plante tumas yet ya. Yu mas tekem olgeta oli godaon long wota, nao long ples ya bambae mi seraot olgeta. Sipos mi talem long yu se, ‘Man ya i no save go,’ bambae i no save go. Be sipos mi talem se, ‘Man ya i save go’, bambae hem i save go."

5 Nao Gideon i tekem olgeta oli godaon long wota mo oli dring. Nao Hae God i talem long hem se, "Yu seraot olgeta oli go long tu kampani. Olgeta we oli stap kasem wota long han, oli sakem i go long maot blong olgeta bambae oli go long wan kampani, mo ol narafala we oli nildaon, oli stap pusum hed blong olgeta i go long wota blong oli dring bambae oli go long narafala kampani." 6 Nao long taem ya, i gat tri handred man oli kasem wota long han blong olgeta, oli sakem i go long maot blong olgeta. Mo ol narafala man oli nildaon, oli pusum hed blong olgeta i go long wota blong oli dring.

7 Nao Hae God i talem long hem se, "Bambae mi yusum ol tri handred man ya nomo blong sevem yufala, mo blong mekem yufala i winim ol man Midian ya long faet. Be ol narafala man ya, yu talem long olgeta blong oli gohom."

8 Nao Gideon i holem ol tri handred man ya nomo oli stap, mo i talem long ol narafala man ya se, "Yufala i livim ol bigfala graonpot* wetem ol pupu blong yufala oli stap. Yufala i karem kakae blong yufala nomo, yufala i gohom."

Long taem ya, Gideon olgeta oli stap antap long hil, mo ol man Midian oli stap daon long levelples.

9 Nao long naet ya, Hae God i talem long Gideon se, "Gideon. Yu girap, yu tekem ol man blong yu, yufala i godaon long ples ya we ol man Midian ya oli stap long hem, yufala i go mekem faet long olgeta. Bambae mi mi mekem yufala i win. 10 Be sipos yu fraet blong go, i gud yu godaon yu wan fastaem wetem man ya blong wok blong yu Pura, yutufala i go lukluk ples blong olgeta. 11 Bambae yu save harem wanem we oli stap storian long hem, nao bambae tingting blong yu i kam strong blong winim olgeta." Nao Gideon wetem man ya blong hem, tufala i godaon long ples blong ol man Midian blong lesin long olgeta. 12 Ol man Midian ya wetem ol laen* blong Amalek, mo ol man blong draeples ya saed i go long is oli stap olbaot long bigfala levelples ya, mo oli plante we oli plante, oli kavremap olgeta ples olsem anis nomo. Mo ol kamel blong olgeta oli plante tumas, olsem sanbij long solwota.

13 Nao taem Gideon wetem Pura tufala i gotru, Gideon i harem we wan man Midian i stap stori long fren blong hem long wan drim blong hem. Hem i stap talem se, "Fren, mi mi drim naoia, mi luk wan samting. Mi luk wan bred* we oli wokem long bale** long Diksonari., i rol i kamdaon long hil ya olsem wan bigfala ston, i kam kasem yumi long ples ya. Hem i bangem wan haos tapolen blong yumi, nao i kafsaedem, we i flatemgud."

14 Nao fren blong hem i talem se, "Maefren, hemia ol soldia blong Gideon ya, pikinini blong Joas ya we i laen blong Isrel.* I no wan narafala samting ya. Yumi wetem olgeta soldia blong yumi, God i putum yumi evriwan finis long han blong hem."

15 Nao taem Gideon i harem mining blong drim ya, hem i nildaon, i talem tangkiu long God. Nao hem i kambak long ples ya we ol man blong hem oli stap long hem, i talemaot long olgeta se, "!Olgeta! !Yufala i girap! !Naoia i taem blong yumi! !Hae God i putum olgeta ya long han blong yumi finis!"

16 Nao Gideon i seraot ol tri handred man blong hem long tri kampani, mo i givim pupu mo bigfala graonpot long olgeta evriwan, we i gat laet i stap laet smosmol insaed long ol graonpot ya. 17 Mo i talem long olgeta se, "Taem yumi go klosap long ples blong ol man Midian, bambae yufala i mas lukluk i kam long mi. Wanem samting we mi bambae mi mekem, yufala tu bambae i mas mekem olsem. 18 Taem mi wetem kampani blong mi, mifala i blu pupu, bambae yufala tu i mas blu pupu. Bambae yumi stanap raon long ples blong olgeta, mo yumi singaot bigwan se, ‘!Yumi faet long nem blong Hae God mo long nem blong Gideon!’ "

19 Nao taem i no kasem medel naet yet, fas kampani blong wajman blong ol man Midian oli spel, mo seken kampani oli kam tekem ples blong olgeta. Nao long taem ya, Gideon wetem wan handred man blong hem oli kamtru long ples blong olgeta. Nao oli blu long ol pupu blong olgeta, mo oli smasem ol graonpot blong olgeta blong ol laet ya oli saenaot. 20 Nao wantaem nomo, tufala kampani ya tu i mekem olsem, oli blu long ol pupu blong olgeta mo oli smasem ol graonpot blong olgeta. Nao olgeta evriwan oli holem laet long lefhan, oli holem pupu long raethan, mo oli stap singsingaot bigwan se, "!Kilim olgeta! !Kilim olgeta! !Yumi faet long nem blong Hae God mo long nem blong Gideon!" 21,22 Nao ol tri handred man ya blong Gideon oli stap stanap raon long ples blong ol man Midian ya, oli stap blu long ol pupu blong olgeta. Nao Hae God i mekem ol man Midian we oli stap insaed long ples ya, oli tekem ol naef blong faet blong olgeta, oli stap kilkilim olgeta bakegen. Nao olgeta evriwan oli fraet, oli stap singaot bigwan, mo oli ronronwe. Oli resis blong go long ples ya Jaretan, nao oli kamtru long vilej ya Betsita mo long taon ya Abelmehola, we i klosap long taon ya Tabat.

23 Nao Gideon i sanem tok i go long ol laen* blong Naftali,* mo long ol laen blong Asere,* mo long tufala haf blong laen blong Manase* long is mo long wes, blong olgeta evriwan oli kam kilim ol man Midian ya, nao olgeta oli kam ronem olgeta. 24 Mo i sanem sam man oli go olbaot long ol ples blong hil long distrik ya Efrem,* blong talem long ol man se, "Yufala i kamdaon kwik blong kilim ol man Midian ya. Yufala i mas blokem ol ples we oli save krosem ol wota. Yufala i no letem olgeta oli gokros long narasaed Jodan Reva. Mo yufala i mas blokem ol smosmol reva long saed ya tu, gogo kasem draeples ya blong yufala long Betbara, blong oli no gokros long ol ples ya." Nao ol lida blong ol laen blong Efrem oli kam wanples, mo oli go blokem rod long ol ples ya, go kasem Betbara longwe, blong ol man Midian oli no save krosem ol reva ya. 25 Olgeta oli holem tu king blong ol man Midian, we nem blong tufala, King Oreb mo King Seheb, nao oli kilim tufala, mo oli katemaot hed blong tufala. King Oreb ya, oli kilim hem long ples we i gat wan ston, we biaen oli putum nem blong ston ya se Oreb, mo King Seheb, oli kilim hem long wan ples blong wokem waen, we biaen oli putum nem blong ples ya se Seheb. Nao oli stap ronem ol man Midian ya yet, mo oli tekem hed blong tufala king ya, oli go givim long Gideon, we long taem ya, hem i krosem Jodan Reva finis, i stap long narasaed i go.