1 Bifo i gat wan man i stap we nem blong hem Maeka. Man ya i wan laen* blong Efrem,* mo hem i stap long ples blong hem, long haf blong distrik ya Efrem we i ples blong hil.

2 Wan dei, hem i talem long mama blong hem se, "Mama, lastaem ya we yu luk se wan man i stilim totin kilo silva* blong yu, mi harem we yu yu singaot* bigfala trabol i kam long hem. Sore, be mi nomo ya mi tekem. Silva ya blong yu i stap."

Nao mama blong hem i talem long hem se, "Pikinini blong mi, prea blong mi we Hae God bambae i mekem i gud long yu."

3 Nao Maeka i givimbak silva ya long mama blong hem. Mo mama blong hem i talem long hem se, "Naoia mi mi givim silva ya i go long Hae God, blong trabol ya i no kasem yu. Silva ya bambae i tabu, i blong yu yu wokem wan pija long hem, blong yumi mekem wosip long Hae God long hem. Pija ya bambae oli katem long wud, nao bambae oli blokem long silva ya. Long fasin ya bambae mi givim silva ya i go long yu bakegen." 4 Nao taem Maeka i givimbak silva ya i go long mama blong hem, mama blong hem i tekemaot tu kilo haf blong hem, i givim long wan blaksmit. Nao blaksmit ya i katem wan pija long wud, mo i blokem wud blong hem long silva ya. Nao woman ya i karem pija ya, i go putum long haos blong Maeka.

5 Man ya i gat wan ples blong mekem wosip long ples blong hem. Hem i wokem ol aedol mo wan efod,* mo i putumap wan long ol pikinini blong hem blong i kam pris* blong hem. 6 ✝Long taem ya, ol laen blong Isrel* oli no gat king blong olgeta yet, nao evri man oli stap mekem olsem we oli luk se i stret.

7 Nao i no longtaem, i gat wan yang man i kamtru long ples ya. Man ya i wan laen blong Livae,* we nem blong hem Jonatan. Papa blong hem Gesom, mo bubu blong hem Moses.* Fastaem hem i stap long distrik ya Juda,* long vilej ya Betlehem, 8 be biaen, hem i aot long ples ya, nao i stap wokbaot, i stap lukaot ples we bambae i save go stap long hem. Mo taem hem i stap wokbaot, hem i kamtru long ples blong Maeka long distrik ya Efrem. 9 Nao Maeka i askem long hem se, "?Yu yu kam wea?"

Mo hem i talem se, "Mi mi wan laen blong Livae. Mi aot long vilej ya Betlehem long Juda, mo mi stap lukaot ples we bambae mi save stap long hem."

10 Nao Maeka i talem long hem se, "Yu kam stap wetem mi nomo. Bambae yu yu kam pris blong mi, mo bambae yu stap talemaot rod long mifala blong mifala i folem. Bambae mi mi stap givim faef taosen vatu* long yu long wan yia. Mo bambae mi mi givim klos mo mi givim kakae long yu tu." 11 Nao man ya i agri blong stap long ples ya, mo Maeka i stap lukaot long hem olsem we i pikinini blong hem stret. 12 Hem i putumap man ya i kam pris, mo oltaem, pris ya i stap nomo long haos blong hem. 13 Hem i talem se, "Naoia pris blong mi i wan laen blong Livae, mo mi savegud se Hae God bambae i mekem evri samting i gud long mi."