1 Nao ol laen* blong Efrem* oli tok long Gideon, oli talem se, "?From wanem yu no singaot mifala taem yu go mekem faet long ol man Midian ya? ?Weswe yu mekem mifala olsem?" Mo oli stap tok strong tumas long hem from.

2 Be hem i talem long olgeta se, "No be samting ya we mifala i mekem i smol nomo, i no kasem mak nating blong samting ya we yufala i mekem. Yufala i luk wok blong yufala se i smol, be i moa long olgeta wok we ol laen blong mi oli mekem. 3 ✝Tufala king ya blong ol man Midian, King Oreb mo King Seheb, God i putum tufala long han blong yufala, mo yufala i kilim tufala finis. ?Wanem nao mifala i mekem we i kasem mak blong wok ya we yufala i mekem?" Mo taem hem i talem olsem, olgeta ya oli no moa kros tumas long hem.

4 Nao Gideon wetem ol tri handred man ya blong hem we oli stap finis long narasaed Jodan Reva i go, oli stap gohed yet blong ronem ol man Midian ya. Oli hanggri tumas, mo oli slak from, be oli stap biaen long olgeta ya yet. 5 Nao taem olgeta oli kamtru long taon ya Sukot, hem i askem kakae long ol man blong vilej ya se, "Ei, plis yufala i givim sam kakae long mifala. Mifala i stap traehad blong holem King Seba mo King Jalmuna, tu king blong ol man Midian ya, be mifala i hanggri tumas, we mifala i slak from."

6 Be ol lida blong taon ya oli tok long hem, oli talem se, "?From wanem bambae mifala i givim kakae long yufala? !Yufala i no holem tufala king ya yet!"

7 Nao hem i talem long olgeta se, "I oraet nomo. Be sipos Hae God i putum tufala ya long han blong mi, bambae yufala i luk wan samting. Bambae mi tekem ropnil ya blong draeples, nao mi kam wipim yufala long hem."

8 Nao hem i kamtru long ples ya Peniel, i askem long ol man blong taon ya blong oli givim kakae long olgeta. Be olgeta oli sakem sem tok ya we ol man Sukot oli talem. 9 Nao hem i talem long olgeta se, "I gud nomo. Be sipos mi winim tufala ya, mi kambak, bambae mi brekemdaon bigfala haos ya we yufala i stap haed long hem."

10 Nao tufala king ya King Seba mo King Jalmuna, wetem ol soldia blong tufala oli go stap long Kakoro. Fastaem ol soldia ya we oli kamaot long draeples oli plante tumas, be ol laen* blong Isrel* oli kilim wan handred twanti taosen man finis oli ded, i gat fiftin taosen nomo oli stap. 11 Nao Gideon wetem ol man blong hem oli folem wan rod we i pasraon long saed blong draeples, long narasaed blong tufala taon ya Noba mo Jogbeha, saed i go. Nao oli kamtru long ol man Midian, be long taem we ol man Midian ya oli no rere blong faet, oli sek nomo long olgeta, nao Gideon wetem ol man blong hem oli kam kilim olgeta. 12 Tufala king ya i ronwe, be Gideon olgeta oli ronem tufala, gogo oli holem tufala. Mo oli mekem olgeta soldia ya blong Midian oli fraet we oli lusum hed, nao olgeta evriwan oli ronronwe.

13 Nao taem we faet ya i finis, Gideon olgeta oli kambak long rod ya we i gotru long medel blong ol hil long Heres. 14 Nao long rod ya, hem i faenem wan yang boe blong Sukot, mo i holem hem, i askem long hem se, "Mi wantem save nem blong ol lida ya long Sukot. ?Yu save raetemdaon nem blong olgeta?" Nao yangfala ya i raetemdaon nem blong seventi seven lida blong Sukot, mo i givim long hem.

15 Nao Gideon i go luk ol man Sukot, i talem long olgeta se, "?Ei, yufala i stap tingbaot tok ya yet we yufala i sakem i kam long mi? Yufala i talem se, ‘Nating we yufala i hanggri tumas we yufala i slak from, be mifala i no save givim kakae long yufala. !Yufala i no holem King Seba mo King Jalmuna yet!’ !Ale, hemia nao tufala!" 16 Nao hem wetem ol man blong hem oli tekem ropnil blong draeples, mo oli wipim ol lida ya long hem we oli meksave olgeta. 17 Mo biaen, oli kambak long Peniel, oli brekemdaon bigfala haos ya we ol man Peniel oli stap haed long hem, mo oli kilim ol man blong taon ya tu oli ded.

18 Nao biaen, Gideon i askem long tufala king ya se, "?Ol man ya we yufala i kilim olgeta oli ded long ples ya Taboro, yutufala i luk olgeta se oli olsem hu?"

Nao tufala i talem se, "Fes blong olgeta i olsem yu nomo. Olgeta evriwan, mifala i luk we oli olsem pikinini blong wan king stret."

19 Nao hem i talem se, "Olgeta ya oli stret brata blong mi ya, we mifala evriwan i bon long wan mama nomo. Hae God i laef, i stap we i stap, mo long fes blong hem, mi mi talem tru long yutufala, se sipos yufala i no bin kilim olgeta, bambae mi mi no save kilim yutufala i ded." 20 Nao hem i talem long fasbon blong hem Jeta se, "Ale, Jeta, yu go kilim tufala ya." Be boe ya i no save tekemaot naef blong faet blong hem, from we hem i wan yang boe nomo, mo i fraet.

21 Nao tufala king ya i talem long Gideon se, "Sipos yu yu wan man tru, yu girap, yu kam kilim mitufala." Nao hem i girap, i go kilim tufala i ded, mo i tekemaot ol flas samting we i stap hang long nek blong ol kamel blong tufala.

22 Nao ol laen* blong Isrel* oli talem long Gideon se, "I moa gud yu yu kam king blong yumi, from we taem yumi stap long han blong ol man Midian ya, be yu nao yu tekemaot yumi. Mo sipos yu yu lus, wan pikinini blong yu bambae i mas tekem ples blong yu, mo biaen, sipos hem i lus, wan pikinini blong hem bambae i mas tekem ples blong hem."

23 Be hem i talem long olgeta se, "Mi bambae mi no save kam king blong yumi, mo pikinini blong mi tu bambae i no save kam king. Hae God nomo bambae i king blong yumi." 24 Mo hem i talem se, "Be i gat wan samting we mi mi wantem askem long yufala. Yufala i tekemaot plante samting finis blong ol man Midian ya we yufala i kilim olgeta. Be mi mi wantem blong yufala evriwan i givim ol iaring ya long mi we yufala i tekem." Hem i tok olsem from we ol man Midian ya oli man blong draeples. Oli no laef long garen, oli treda nomo, mo from samting ya oli gat plante gol, mo oltaem oli stap putum gol iaring.

25 Nao olgeta oli talem long hem se, "I gud nomo. Mifala i glad blong givim olgeta iaring ya long yu." Nao oli putum wan kaliko long graon, mo olgeta evriwan oli tektekemaot ol iaring long ol samting ya we oli tekem, nao oli kam sakem long kaliko ya. 26 Ol gol iaring ya we Gideon i askem long olgeta, taem oli skelem olgeta, hevi blong hem klosap i kasem twanti kilo. Be hemia, oli no kaontem wetem ol narafala samting we oli tekemaot long ol man Midian ya, ol gol jen, mo ol bidbid, mo ol flas klos blong ol king blong olgeta, mo ol flas samting we oli stap hangem long nek blong ol kamel blong olgeta. 27 Nao Gideon i yusum ol gol ya blong wokem wan efod,* mo i karem i go long ples blong hem long Ofraha, i putumgud i stap long ples ya. Be efod ya i mekem tingting blong ol laen blong Isrel ya oli go krangke, nao oli no moa tingbaot Hae God, oli stap kam mekem wosip long efod ya nomo. Mo i olsem wan trap long Gideon tu wetem ol famle blong hem.

28 Long fasin ya, ol laen blong Isrel ya oli winimgud ol man Midian, oli mekem we olgeta oli no moa gat paoa blong mekem wan samting. Nao long foti yia, kantri blong olgeta i stap kwaet nomo, i no moa gat faet, gogo kasem taem we Gideon i ded.

29 Nao biaen long taem we faet i finis, Gideon* i gobak long ples blong hem, mo i stap long ples ya gogo i kam olfala. 30 Hem i gat seventi pikinini boe blong hem from we i gat plante woman blong hem. 31 Mo i gat wan narafala woman blong hem tu, we i stap long taon ya Sekem. Woman ya i bonem wan pikinini boe blong hem, mo Gideon i putum nem blong hem se Abimelek, we i min se "Papa i king".

32 Nao Gideon i kam olfala we i olfala, nao i ded. Oli berem* hem long wan hol long ston, we oli bin berem papa blong hem long hem. Hol ya i stap long vilej ya Ofraha, long graon blong ol laen* blong Abiesa.

33 Nao biaen, taem we Gideon i ded finis, ol laen blong Isrel* oli no moa tingbaot Hae God bakegen. Olgeta oli lego hem, mo oli stap go mekem wosip long ol pija blong god ya Bal,* mo oli leftemap wan long olgeta i kam namba wan god blong olgeta. God ya, nem blong hem Balberit, we i min se "Bal we i mekem promes wetem mifala". 34 Nating we Hae God i God blong olgeta, we i tekemaot olgeta long han blong ol enemi blong olgeta, be oli no moa mekem wosip long hem. 35 Mo oli no moa tingbaot Gideon tu we i mekem plante gudgudfala samting long olgeta, mo oli no moa ona long famle blong hem.