1 Nao ol man oli stap tok agens long Hae God, from we oli trabol tumas. Mo taem hem i harem olgeta, hem i kros, nao i sanem faea i kam long medel blong olgeta, mo faea ya i stat bonem haf blong ples ya we oli stap long hem. 2 Nao olgeta oli krae i go long Moses, blong hem i givhan long olgeta, mo hem i prea long Hae God, nao faea ya i ded. 3 Nao oli putum nem blong ples ya se Tabera*, from we long ples ya nao, faea blong Hae God i stap bon long medel blong olgeta.

4 Nao long taem ya, i gat ol narafala man oli stap wetem ol laen* blong Isrel,* mo ol man ya oli wantem tumas blong kakae mit. Mo i no longtaem, ol laen ya blong Isrel tu oli stap harem nogud bakegen, oli stat tok agens long Hae God. Olgeta oli talem se, "!Sipos yumi gat mit i gud! 5 !Long Ijip, yes! Yumi stap kakae fis olsem we yumi wantem, we yumi no pem nating. Oltaem yumi stap kakae kukamba mo melen, mo salad, mo anian, mo lae we yumi no sot. 6 !Yu luk! !Naoia yumi no moa strong nao! I no gat narafala kakae nating. !Evri dei nomo yumi stap kakae mana* ya! !Yumi les long hem finis!"

7 ✝Samting ya mana i smol samting nomo, i olsem sid blong gras ya korianda,* mo kala blong hem i waet we i yala lelebet. 8,9 ✝Hem i stap folfoldaon wetem wota blong naet long ples ya we olgeta oli stap long hem. Nao evri dei, long moning, ol man oli go pikimap, mo oli stap granem i kam olsem flaoa. Nao oli kukum, mo oli mekem ol smol bred* long hem we i flat. Mo taem oli kakae, oli harem olsem bred we oli kukum long olifoel.*

10 Nao Moses i luk we ol man oli stap hivap long doa blong ol haos tapolen blong olgeta, mo i harem we oli stap krae from we oli harem nogud. Nao Hae God i kros tumas long olgeta, mo Moses tu i harem nogud from olgeta, 11 nao hem i tok long Hae God, i talem se, "!Hae God. Yu yu mekem i nogud tumas long mi! !Mi mi luk se yu no moa laekem mi nao! ?From wanem yu putum mi mi stap lukaot long ol man ya? 12 !Mi mi no papa blong olgeta! !Mi mi no bonem olgeta! ?From wanem yu mekem mi mi kam olsem mama blong olgeta, blong karem olgeta long han blong mi, olsem we oli smol pikinini blong mi? Mi mi no save karem olgeta long fasin ya gogo oli kasem kantri ya we yu promes* long ol bubu blong mifala bifo, se bambae yu givim long mifala. 13,14 Olgeta oli stap krae long mi blong mi givim mit long olgeta, be oli plante tumas, mo mi mi wan nomo. Mi mi no save lukaot long olgeta. ?Weples bambae mi mi save tekem mit we i naf blong olgeta? 15 Sipos yu wantem mekem mi olsem, i moa gud yu kilim mi mi ded, nao bambae mi no moa save harem nogud bakegen long ol strong samting ya we yu stap mekem long mi."

16 Nao Hae God i talem long hem se, "Yu go singaot seventi man we oli lida blong yufala, we ol man oli stap tinghevi long olgeta, yu tekem olgeta oli kam wanples, blong oli kam stanap wetem yu raon long Haos Tapolen blong mi. 17 Nao bambae mi mi kamdaon long ples ya, mi toktok long yu, mo Spirit blong mi we i stap long yu, bambae mi putum i stap tu long olgeta.* blong mi we i stap long yu, bambae mi putum i stap tu long olgeta. Nao bambae olgeta oli save givhan long yu blong lukaot long ol man ya, blong wok ya bambae i no moa stap long yu, yu wan. 18 Be naoia, yu mas go talemaot long olgeta man, se oli mas mekem olgeta oli klin long fes blong mi, oli rere, from we tumora bambae oli kakae mit. Mi mi harem ol toktok ya we oli stap talem, we oli stap krae from mit, mo oli talem se bifo, taem oli stap long Ijip, i moa gud i winim ples ya. Oraet, bambae mi givim mit long olgeta. 19 Mo mit ya bambae oli no kakae long wan dei nomo, no tu dei, no faef dei, no ten dei, no twanti dei. 20 Bambae oli mas kakae evri dei gogo kasem wan ful manis. Mo nating we maot blong olgeta bambae i kam nogud long hem, mo oli harem we oli taed long hem, we oli taedgud long hem, be bambae oli mas kakae, gogo oli finisim. Fasin ya bambae i kasem olgeta from we mi mi stap long medel blong olgeta, be oli tanem baksaed long mi, mo oli stap tok agens long mi se sipos oli stap nomo long Ijip, bambae i moa gud."

21 Be hem i tok long Hae God, i talem se, "!Yu luk! Mi mi stap lidim sikis handred taosen man we mifala i stap wokbaot long leg nomo, mo yu yu talem se bambae yu givim mit long mifala we i stret long wan manis. 22 ?Olsem wanem? ?Sipos mifala i kilim evri buluk wetem ol sipsip blong mifala, yu ting se bambae i naf blong olgeta ya oli kakae, oli fulap? !Sipos mifala i go pulum olgeta fis long solwota, be bambae i no naf long olgeta ya!"

23 Be Hae God i talem se, "?Weswe? ?Yu ting se mi mi no naf blong mekem samting ya? !Mbae yu luk!"

24 Nao Moses i go afsaed, i go talemaot ol samting ya long ol man. Mo biaen, hem i tekem seventi lida oli kam wanples, mo i putum olgeta oli stap stanap raon long Haos Tapolen ya. 25 Nao Hae God i kamdaon long klaod ya we i stap lidim olgeta, mo i toktok wetem Moses. Hem i tekem Spirit blong hem we i bin givim long Moses bifo, i putum long ol lida ya tu, mo taem Spirit blong hem i kam long olgeta, olgeta oli toktok olsem ol profet, be oli no mekem longtaem.* blong hem we i bin givim long Moses bifo, i putum long ol lida ya tu, mo taem paoa blong hem kam long olgeta, olgeta oli toktok olsem ol profet, be oli no mekem longtaem.

26 Nao tu long ol seventi lida ya, we nem blong tufala Eldad mo Medad, tufala i stap nomo long haos blong tufala, tufala i no kam long Haos Tapolen blong Hae God blong mit wetem hem. Be Spirit blong Hae God i kam long tufala tu long haos tapolen blong tufala, mo tufala tu i toktok olsem ol profet.* blong Hae God i kam long tufala tu long haos tapolen blong tufala, mo tufala tu i toktok olsem ol profet. 27 Nao wan yang man i resis i kam long Moses, i talemaot samting ya we tufala i stap mekem.

28 Nao Josua, we papa blong hem Nun, we i bin stap givhan long Moses i stat taem we i yang, hem i tok long hem, i talem se, "!Masta, yu go blokem tufala ya!"

29 Be hem i talem se, "?Olsem wanem? ?Yu wantem blokem olgeta ya from we yu wantem se mi nomo mi nambawan? !Be mi mi wantem blong Hae God bambae i givim Spirit blong hem long olgeta man, i mekem olgeta evriwan oli toktok olsem ol profet!* blong hem long olgeta man, i mekem olgeta evriwan oli toktok olsem ol profet!" 30 Nao hem wetem ol lida ya oli gobak long ol haos tapolen blong olgeta.

31 Nao Hae God i sanem wan win i kam we i tekem ol pijin ya kwel* long solwota, i karem olgeta i kam we oli stap flae daon we daon olgeta, samwe long wan meta nomo blong go kasem long graon. Oli kam folfoldaon olbaot long ples ya we ol man ya oli stap long hem, mo long ol ples raonabaot long hem, i go kasem plante kilometa long evri saed blong hem. 32 Nao long wan fuldei, mo long wan fulnaet, mo long wan fuldei bakegen, olgeta man oli stap holem ol pijin ya. Mo i no gat wan long olgeta we i tekem smol nomo, olgeta man wanwan oli kasem wan taosen kilo pijin no antap long hem, nao oli putum olgeta long san olbaot long ol ples ya blong oli sandrae long olgeta. 33 Be taem we oli gat plante mit yet blong oli kakae, Hae God i kros long olgeta, nao i sanem wan rabis sik i kam long olgeta we plante long olgeta oli ded from. 34 Nao ples ya, oli putum nem blong hem, se Kibrot Hatahava we i min se "Beregraon blong ol man we oli wantem mit tumas", from we long ples ya nao oli berem ol man we oli wantem mit tumas.

35 Nao oli aot long ples ya oli go long Hajerot, oli mekem ples blong olgeta long ples ya.