1 Nao long ol laen* blong Manase,* we papa blong hem Josef, i gat ol laen blong pikinini ya blong hem Makiri, mo long olgeta ya, i gat ol laen blong Gilead we i pikinini blong Makiri ya. Nao ol hed blong ol famle blong olgeta ya oli kam luk Moses wetem ol narafala lida blong olgeta, 2 ✝mo oli talem se, "Hae God i talem long yufala, se bambae yufala i mas seraot ol graon ya i kam long ol laen blong mifala, mo bambae yufala i mas sakem ol spesel ston* blong faenemaot se wanem graon bambae i kam long wanem laen. Mo hem i talem long yufala tu, se graon ya we i blong Jelofehad, brata blong mifala, bambae yufala i mas givim i go long ol dota blong hem. 3 Be i gud yufala i tingbaot. Sipos olgeta ya oli mared long ol man blong narafala laen, bambae graon ya blong olgeta i go long narafala laen ya, nao graon we yufala i givim long laen blong mifala bambae i kam smol. 4 Mo long namba fifti yia we i Yia blong Givimbak ol Samting, we bambae mifala i mas givimbak olgeta graon we mifala i bin pem i gobak long ol fas ona blong hem bakegen, be long taem ya, ol graon blong ol dota ya blong Jelofehad bambae i stap olgeta long ol laen ya we ol gel ya oli mared i go long olgeta, nao long fasin ya, graon ya blong mifala bambae i lus olgeta."

5 Nao Moses i talemaot tok blong Hae God, blong olgeta man ya oli harem. Hem i talem se, "Samting ya we ol laen blong Manase oli talem i tru ya. 6 Hae God i talem se ol dota ya blong Jelofehad oli save mared long hu man we oli wantem, be bambae oli mas mared* insaed long laen ya nomo blong olgeta* 7 Nating we yufala i blong wanem laen, be olgeta graon we bambae yufala i kasem, bambae i mas stap long laen blong yufala nomo. 8 Sipos gel i gat raet blong holem graon we i blong wan olfala bubu blong hem, bambae hem i mas mared insaed long laen ya blong hem nomo. Long fasin ya, graon blong hem bambae i stap nomo long laen blong ol bubu blong hem, 9 mo bambae i no save aot long han blong laen blong hem, blong pas i go long han blong narafala laen. Bambae olgeta graon blong yufala i mas stap olwe long han blong yufala nomo."

10,11 Nao ol dota ya blong Jelofehad, we nem blong olgeta, Mala, mo Tijaha, mo Hoglaha, mo Milka, mo Noa oli mekem olsem we Hae God i talem long Moses, oli mared long ol pikinini blong ol brata blong papa blong olgeta. 12 Oli mared insaed long wan long ol laen blong Manase, we papa blong hem Josef ya bifo. Nao long fasin ya, ol graon blong olgeta i stap olwe nomo long han blong laen blong papa ya blong olgeta.

13 Hemia nao ol loa mo ol rul we Hae God i givim long Moses blong i givim long olgeta, long taem ya we oli stap long bigfala levelples ya long Moab, long saed blong Jodan Reva long is, we taon ya Jeriko i stap narasaed reva ya i go.