1 ✝Nao biaen long taem ya we rabis sik ya i finis, Hae God i talem long Moses mo Hae Pris Eleasara we papa blong hem Eron se, 2 "Yutufala i mas mekem sensas blong kaontem olgeta man ya we i laen* blong Isrel,* we yia blong olgeta i kasem twanti i go antap, we oli naf finis blong go long faet. Bambae yutufala i mas folem nem blong ol stamba blong olgeta blong kaontem olgeta." 3,4 Nao tufala i mekem olsem we hem i talem. Olgeta oli stap long bigfala levelples ya long Moab, klosap long Jodan Reva, we taon ya Jeriko i stap narasaed i go, nao tufala i singaot olgeta man we yia blong olgeta i kasem mak ya oli kam wanples, nao tufala i kaontem olgeta.

Nao ol twelef laen blong Isrel we bifo oli aot long Ijip oli kam, taem olgeta oli kam kasem ples ya, namba blong olgeta i olsem.

5-7 Ruben,* we i fasbon pikinini blong Isrel, hem i gat fo pikinini boe blong hem, we nem blong olgeta, Hanok mo Palu mo Hesron mo Kami. Nao long laen blong Ruben, i gat ol laen blong Hanok, mo ol laen blong Palu, mo ol laen blong Hesron, mo ol laen blong Kami, mo namba blong olgeta evriwan i gat foti tri taosen seven handred toti.

8 Nao long laen blong Palu, i gat Eliab, 9 wetem trifala pikinini blong hem, Nemuel, mo Datan, mo Abiram. Datan mo Abiram, hemia tufala ya we olgeta oli jusumaot tufala blong tufala i lida blong olgeta, be tufala i agens long Moses mo Hae Pris Eron, nao tufala i joen long Kora olgeta taem oli girap, oli agens long Hae God. 10 Nao long taem ya we faea i kilim Kora wetem tu handred fifti man blong hem oli ded, graon i open, i solemdaon tufala ya, nao tufala oli ded wetem Kora olgeta. Tufala ya i kam olsem wan saen long olgeta man blong wekemap olgeta blong oli no agens long Hae God. 11 Be ol pikinini blong Kora oli no ded long taem ya.

12-14 Mo Simeon* i gat faef pikinini boe blong hem we nem blong olgeta, Nemuel, mo Jamin, mo Jakin, mo Sera, mo Saol. Nao long laen blong Simeon, i gat ol laen blong Nemuel, mo ol laen blong Jamin, mo ol laen blong Jakin, mo ol laen blong Sera, mo ol laen blong Saol, mo namba blong olgeta evriwan i kasem twanti tu taosen, tu handred.

15 Mo long sem fasin, long laen blong Gad,* i gat ol laen blong Jefon, mo ol laen blong Hagi, mo ol laen blong Suni, 16 mo ol laen blong Osni, mo ol laen blong Eri, 17 mo ol laen blong Arod, mo ol laen blong Areheli, 18 mo namba blong olgeta evriwan i kasem foti taosen, faef handred.

19-22 Mo long laen blong Juda,* i gat ol laen blong Sela, mo ol laen blong Peres, mo ol laen blong Sera. Mo long laen blong Peres ya, i gat ol laen blong Hesron mo ol laen blong Hamul. Mo namba blong olgeta evriwan i kasem seventi sikis taosen, faef handred. Mo i gat tu narafala pikinini blong Juda bakegen, we tufala i ded bifo olgeta, long Kenan,* we nem blong wan Ere, mo nem blong narawan Onan, be i no gat ol laen blong tufala.

23 Mo long laen blong Isakara,* i gat ol laen blong Tola, mo ol laen blong Pua, 24 mo ol laen blong Jasub, mo ol laen blong Simron, 25 mo namba blong olgeta evriwan i kasem sikisti fo taosen, tri handred.

26 Mo long laen blong Sebulun,* i gat ol laen blong Sered, mo ol laen blong Elon mo ol laen blong Jalehel, 27 mo namba blong olgeta evriwan i kasem sikisti taosen, faef handred.

28 Nao pikinini blong Isrel ya Josef, hem i gat tu pikinini boe blong hem, we nem blong tufala Manase* mo Efrem.*

29-32 Mo Manase i gat pikinini boe blong hem we nem blong hem Makiri, mo Makiri i gat pikinini boe blong hem we nem blong hem Gilead, mo Gilead i gat ol pikinini boe blong hem we nem blong olgeta, Jesa, mo Helek, mo Asriel, mo Sekem, mo Semida, mo Hefa. Nao long laen blong Manase, i gat ol laen blong Makiri, mo long laen blong Makiri, i gat ol laen blong Gilead, mo long laen blong Gilead, i gat ol laen blong Jesa, mo ol laen blong Helek, mo ol laen blong Asriel, mo ol laen blong Sekem, mo ol laen blong Semida, mo ol laen blong Hefa. 33 Mo long laen blong Hefa ya, i gat wan man we nem blong hem Jelofehad. Hem i no gat pikinini boe blong hem, i gat ol gel nomo, we nem blong olgeta, Mala, mo Noa, mo Hoglaha, mo Milka, mo Tijaha. 34 Mo namba blong olgeta evriwan i kasem fifti tu taosen, seven handred.

35 Mo long laen blong Efrem, i gat ol laen blong Sutela, mo ol laen blong Bekere, mo ol laen blong Tahan. 36 Mo long laen blong Sutela ya, i gat ol laen blong Eran. 37 Mo namba blong olgeta evriwan i kasem toti tu taosen faef handred.

Hemia nao olgeta laen blong Josef.

38 Mo long laen blong Benjamin,* i gat ol laen blong Bela, mo ol laen blong Asbel, mo ol laen blong Ahiram, 39 mo ol laen blong Sefufam, mo ol laen blong Hufam. 40 Mo long laen blong Bela ya, i gat ol laen blong Ad mo ol laen blong Nahaman. 41 Mo namba blong olgeta evriwan i kasem foti faef taosen sikis handred.

42 Mo long laen blong Dan,* i gat ol laen blong Husim, 43 mo namba blong olgeta ya, i kasem sikisti fo taosen fo handred.

44 Mo long laen blong Asere,* i gat ol laen blong Jimnaha, mo ol laen blong Jisvi, mo ol laen blong Beria. 45 Mo long laen blong Beria ya, i gat ol laen blong Heba, mo ol laen blong Malkiel. 46 Asere ya, hem i gat wan gel tu, we nem blong hem Sera. 47 Mo namba blong olgeta evriwan i kasem fifti tri taosen fo handred.

48 Mo long laen blong Naftali,* i gat ol laen blong Jajehel, mo ol laen blong Guni, 49 mo ol laen blong Jeja, mo ol laen blong Silem, 50 mo namba blong olgeta evriwan i kasem foti faef taosen fo handred.

51 Nao long taem ya, namba blong olgeta laen blong Isrel evriwan we oli man, mo we oli naf blong faet, i kasem sikis handred wan taosen, seven handred toti.

52 ✝Nao Hae God i talem long Moses se, 53 "Moses. Ol graon ya we bambae mi mi givim i go long yufala, bambae yufala i mas seraot i go long ol laen ya blong yufala, folem ol namba blong olgeta. 54-56 Bigfala graon bambae i go long laen we i gat plante man long hem, mo smol graon bambae i go long laen we i no gat plante man long hem. Be yufala i mas sakem ol spesel ston* blong faenemaot se wanem graon bambae i go long wanem laen."

57 Nao long laen blong Livae,* i gat ol laen blong Geson, mo ol laen blong Kohat, mo ol laen blong Merari. 58 Mo long ol laen ya, i gat ol laen blong Libni, mo ol laen blong Hebron, mo ol laen blong Mali, mo ol laen blong Musi, mo ol laen blong Kora. Nao long laen blong Kohat, i gat wan man bifo we nem blong hem Amram, 59 mo hem i tekem wan woman we i laen blong Livae we nem blong hem Jokebed. Woman ya i bon long Ijip, mo tufala i bonem tri pikinini, wan gel, we nem blong hem Miriam, mo tu boe, we nem blong tufala Eron mo Moses. 60 ✝Nao Eron ya i kam hae pris, mo hem i gat fo pikinini boe blong hem, we nem blong olgeta, Nadab, mo Abihu, mo Eleasara, mo Itamara. 61 ✝Be Nadab mo Abihu, tufala i ded long taem ya we tufala i bonem insens* long faea we i no tabu blong givim i go long Hae God. 62 Nao namba blong olgeta laen blong Livae we oli man, mo oli gat wan manis no antap long hem, i kasem twanti tri taosen. Be tufala i no kaontem olgeta ya wetem ol narafala laen ya, tufala i putum olgeta long wan narafala lis, from we olgeta ya, Hae God i talem finis se bambae oli no save holem graon long kantri ya we hem bambae i givim long olgeta.

63 Long taem ya we ol laen blong Isrel oli stap long bigfala levelples ya long Moab, klosap long Jodan Reva, we taon ya Jeriko i stap narasaed i go, Moses mo hae pris, tufala i raetemdaon nem blong ol man blong olgeta, folem ol laen blong olgeta. 64 Be ol man we oli stap long ol lis blong sensas ya we Moses mo Hae Pris Eron, tufala i bin mekem bifo long draeples long Sinae, i no moa gat wan long olgeta nating i stap long ol niufala lis ya, 65 ✝from we Hae God i talem finis se olgeta evriwan bambae i ded long draeples, nao olgeta evriwan oli ded. Keleb we papa blong hem Jefune, mo Josua we papa blong hem Nun, tufala ya nomo i stap.