Akpa Ñwed Kọrint 12

Idem Keed, Uwak Ndido

12 Kpa naña idem ado keed ado anie uwak ndido, ndin afịd uwak ndido edo idem keed, kpa ntoro ke ado ye Krais. 13 Sia ekiduọk afịd ñnyịn mmọọñ ke Sịbidịd keed nọ ñnyịn ikappa ido idem keed, me ido mme Yuu me mme Gentile, afʌn me amanaisọñ, ekenyʌñ inọ afịd ñnyịn Sịbidịd keed ami inwọñ. 14 Kpayeado idem inieghe ndido keed, anie uwak ndido.

15 Adieke ukod akpebooho ate, "Sia ami mmiidooho ubọk, ami ndooho mbaak idem," ado idiinama anye atre adido ndido idem. 16 Adieke utọñ akpebooho ate, "Sia ami mmiidooho anyen, ami ndooho mbaak idem," ibooho ito ke ntak ado anye atre adido ndido idem. 17 Adieke afịd idem akpedooho anyen, ekpenam die ekop ñkpọ? Adieke afịd idem akpedooho utọñ, ekpenam die enuuno ñkpọ? 18 Ado ke akpanikọ Abasi akeneeñe mme ndido abono ke idem, keedekeed, kpa naña anye akeyem nọ ammọ eba. 19 Adieke afịd ndido ekpedooho ndido keed kpọd, idem ndin akpeba ke mmọ? 20 Naña aba ado, ndido e-ewak, ado idem ado keed.

21 Anyen ikanna adibo ubọk "Ami uyemme fiin!" Iwuod ñko ikanna adibo ukod, "Ami uyemme fiin!" 22 Utu ke ado, mme ndido idem e-ebaaha nte ammọ edo se imem ikan, ammọ ekap edo se enekke eyem, 23 ndin mme ndido idem se ñnyịn ikere ke idooho se awo akịt ke ñnyịn ikappa inọọ asaña-asaña ukpono. Mme ndido idem a-awo imiibenne isio inyan edo mbon se ekama ukpono-ukpono, 24 ke ini adooho ndido idem se ekịt inieghe utọ asaña-asaña ukpono ado. Ado Abasi a-akoono mme nsio-nsio ndido idem abok keed, akappa aben akaakan ukpono anọ mme ndido i-imiikinieghe, 25 mbaak ubakka ndomokeed adiba ke afịd idem, ado anam mme ndido ekere ñkpọ ebaña emọ-emọ. 26 Adieke ndido keed anieghe mfịna, afịd ndido enie mfịna ado ye anye; adieke ndido keed abọọhọ ukpono, afịd ndido edaara ye anye.

27 Ndin ndufo edo idem Krais, ndufo keedekeed edo ndido idem ado.