1 Ke ini Mọdekai amaakekop afịd se ekenam, anye amaawai afọñ amọ, asịne afọñikpo anyʌñ afiọññọ ntọñ, amaanyʌñ awuọ akaa abio, atua idod-idod ayịd ke akpọsọñ uyio. 2 Ado anye ikibọhọke inuaatob adidem, sia awo ikiyakka awo se isịne afọñikpo aboiyo adʌk. 3 Ke afịd idʌñ ake mbed ye ewʌhọ adidem akesịmme ekamba mfʌhọ amaaba ke ufọọd mme Yuu, ke utreudia, ayịd ye ñkpo. Uwak emaenaa ke afọñikpo ye ntọñ.

4 Ke ini mme itọ ye ifʌn ibaan abọọñanwaan Esta ekedidọkkọke anye ebaña Mọdekai, anye amaaba ke mfʌhọ. Anye amaanọ afọñ esọk Mọdekai ado anye ikinyịmmeke adibọ ammọ nsịne. 5 Ndin Esta amaakoot Hatak, keed ke atu mme itọ adidem akeseeghe ñkpọ abaña anye, anyʌñ adọñ anye yak akeduuñọ adiọọñọ me nsoo ido mfịna Mọdekai ye ntak.

6 Ndin Hatak amaakaa abịne Mọdekai ke anwa esiin abio ke iso inuaatob adidem. 7 Mọdekai amaadọkkọ anye afịd ñkpọ se ikitịppe inọ anye, adiana ye ekọmudua ake Haman anwọñọke adikpe nsịn ke itie unịmakʌk adidem nọ esobo afịd mme Yuu. 8 Anye amaanyʌñ anọ ayịnufọk Esta ñwed ewʌhọ ake Haman ayemme adisobo ammọ, emaekesio edian ke Susa, adiwọt Esta ñnyʌñ nnam nọ anwaña anye, ndin Mọdekai amaabo anye yak adọkkọ Esta nọ aka iso adidem akekpe ubọk anyʌñ abeeñe mbọm anọ mbon amọ.

9 Hatak amaanyọñ anyʌñ akedọkkọ Esta se Mọdekai aketañ. 10 Ndin Esta amaadọñ Hatak akedọkkọ Mọdekai abo, 11 "Afịd mme adaaha adidem ye mbon awo ke abio ediọọñọ ke awodeen me awonwaan akpeka abịne adidem ke esịd akwere amọ ke idaha adidem imiikoodo anie kpa mbed keed: ana nte ewot anye ibọhọke adidem anyan esañ ubọọñ kold anọ ammọ anyʌñ afeen uwem ammọ. Ado usen edịb mme duob aboiyo tọọñọ ekeñkoot ndʌk ñkekịt adidem."

12 Ke ini ekedọkkọke Mọdekai mme ikọ Esta, 13 Mọdekai amaadọñ ibọọrọ ami asọk Esta: "Kuukere ke sia afo amedʌñ ke ufọk adidem ke afo ikpọọñ ke afịd mme Yuu uduubọkkọ. 14 Sia adieke afo adoppo uyio ini ami, ubọkkọ ye adinyaaña ayaato itie mfen abịne mme Yuu, ado afo ye ufọk ete mfo eyaetak. Anie awo idiọọñọ me afo akedi ufọk adidem ke abaña ini ntom?"

15 Ndin Esta amaanọ ibọọrọ ami esọk Mọdekai: 16 "Kaa, koot afịd mme Yuu se iba ke Susa bon, inyʌñ itie utreudia innọ miin. Ikiidia ñkpọ ikiinyʌñ inwọñ ñkpọ ke usen ita, akonayio ye uweemeayio. Ami ye nditọufọk mmi iyainyʌñ itie utreudia naña ndufo enam ñko. Ke emaenam ami, ami ñyaakaa mbịne adidem, akpesʌkado mbed akpanna. Ndin adieke ami ntakka, yak ntak."

17 Ndin Mọdekai amaawuọ anyọñ anyʌñ akenam afịd mme item Esta.