1 Ndin adidem ye Haman emaekaa usọrọ ndia enọ Abọọñanwaan Esta, 2 ndin naña ammọ ekesʌkkọ enwọñ ukọd ke ayọhọ usen iba, adidem amaamaana abịp ate, "Abọọñanwaan Esta, nsoo ido ebeeñe mfo? Eyaunọ fiin. Nsoo ido ebeeñe mfo? Ñkọm akpedo mbaak keed ke abioubọọñ mmi, eyaenam unọ fiin."

3 Akem Abọọñanwaan Esta amaabọọrọ ate, "Abọọñ mmi, adieke ami ñkịtte mfọn ke iso mfo, ñko adieke unemme fiin esịd, nnọ miin uwem mmi, ebeeñe mmi ado mi. Nyʌñ yaak uwem mbio mmi, ebeeñe mmi ado mi. 4 Sia emaeñnyam miin ye ikọd mmi enọ nsobo, ewot enyʌñ esọọk esio. Adieke adooho ekinyam ñnyịn nte ifʌn ideen ye ibaan ikpọọñ, ami ñkpaakedop uyio, sia ñkpọ ntom idotto adikifịna adidem."

5 Adidem Seeses amaabịp Abọọñanwaan Esta ate, "Anie ke anye ado? Mmọọ ke anye aba, awo adeeghede adinam utọ ñkpọ ami?"

6 Esta amaabọọrọ ate, "Awo idiọọkesịd ye awo usua! Haman awo ndoom ami!"

Ndin ndịk amaanam Haman ke iso adidem ye abọọñanwaan. 7 Adidem amaadakka ada ke iyadesịd, akpọñ ukọd amọ anyʌñ awuọ akaa ke inwañ ufọk adidem. Ado Haman, ke ini adiọọñọke ke adidem amaabebiide se ikiinaa atịppe anọ anye, amaasọñọ ada adikpeiye Abọọñanwaan Esta mbaña uwem amọ.

8 Kpa ke ukem ini adidem aketịmmeke adi itie usọrọ ndia, se Haman mi, mmọdo akekʌbọ ke ñkpọitie Esta aketieghe.

Adidem amaasio ñkpo ate, "Ana nte anye afiọññọ abọọñanwaan ke idaha anye abaaha ye ami ke ufọk?"

Kpa idaha i-ikọ ado awuọhọ ke inua adidem, emaefʌk iso Haman. 9 Akem Habona, keed ke atu mme itọ adidem amaabo ate, "Eto anyọọñọ ke ñkpọ nte kubid aba mme duob* mmọdo ada ke ufọk Haman. Anye akebeeñe ami anịm anọ Mọdekai, a-aketañña ikọ adinyaaña adidem."

Adidem amaabo ate, "Ekọọñ anye do!" 10 Ndin emaekọọñ Haman ke eto anye akewuuhọ anọ Mọdekai. Ndin iyadesịd adidem amaasuuhọ.