1 Ke ayọhọ usen duob mme ita ke ayọhọ afiọñ duob mme iba, ke afiọñ Adaa, akena nte enam ewʌhọ adidem usen ado. Mbon usua mme Yuu emaenie idodanyen adikan ammọ udịd ke usen ado, ado idahami eyʌt ñkpọ ekappa ndin mme Yuu emaenie edikan ebaña mbon se ikisua ammọ. 2 Mme Yuu emaeboho ke mme abio ammọ ke afịd abio Adidem Seeses adinwana ye mbon ekebeeñeke idem adisobo ammọ. Ibaaha awo se ikikan inwana ye ammọ, sia mme awo ke idịd mfen emaekop ndịk ebaña ammọ. 3 Ndin afịd mme mbọọñ ke mme abio, mme akara idʌñ, mme adaukara ye mme akama utom adidem emaenwam mme Yuu, sia ndịk Mọdekai amaamʌm ammọ. 4 Mọdekai amaawuọ etob ke ufọk adidem; etob amọ amaasuana ke afịd mme idʌñ, ndin anye amaanekke anie adudu.

5 Mme Yuu emaewot mme asua ammọ eduọñọ ke isọñ ke akañkañ, ewot enyʌñ esobo ammọ, ndin ammọ emaenam se ammọ ekemama ye mbon usua ammọ. 6 Ke sitadeel Susa, mme Yuu emaewot enyʌñ esobo awo ikie ition (500). 7 Ammọ emaewot Pasandata, Dalfon, Aspata, 8 Porata, Adalia, Aridata, 9 Pamasta, Arisai, Aridai ye Faisata, 10 nditọ ideen duob Haman ayịn Hamedata, awo usua mme Yuu. Ado ammọ ikituuho ñkpọ mbịme ado.

11 Emaedọkkọ adidem mme ibad awo se ekewot ke abio Susa usen ado. 12 Adidem amaadọkkọ Abọọñanwaan Esta ate, "Mme Yuu esobo ideen ikie ition (500) ye nditọ ideen Haman duob ke sitadeel Susa. Nsoo ke ammọ enam ke mme abio adidem mfen? Idahami nsoo ido ebeeñe mfo? Eyaunọ fiin. Nsoo ke ayem? Ñko eyaunọ fiin."

13 Esta amaabọọrọ ate, "Adieke anemme adidem esịd, nọ mme Yuu ke Susa uyio adika iso ñko nnam ewʌhọ ami, ndin yak ekọọñ nditọ ideen Haman duob ke eto."

14 Ndin adidem amaanọ uyio ate enam ntoro. Emaesio ewʌhọ ke Susa, ndin emaekọọñ nditọ ideen Haman duob ke eto. 15 Mme Yuu ke Susa emaesoobo ke ayọhọ usen duob mme inaañ ke afiọñ Adaa, ndin ammọ emaewot ideen ikie ita (300) ke Susa, ado ammọ ikiyakka ubọk ammọ atuuk ñkpọ mbịme.

16 Ado, ubaak mbon Yuu se ikiba ke mme abio adidem emaenyʌñ esoobo idem adikpeme idem ammọ mbaak mbon usua ammọ. Emaewot mme asua ammọ awo tọsịn ata mme duob mme ition (75,000) ado ubọk ammọ ikituuho mme ñkpọ mbịme. 17 Afịd ami aketịppe ke ayọhọ usen duob mme ita ke afiọñ Adaa, ndin ke ayọhọ usen duob mme inaañ ammọ emaeduọk adudu enyʌñ enam anye ado usen usọrọ ye idaara.

18 Mme Yuu ke Susa emaesoobo ke ayọhọ usen duob mme ita ye ayọhọ usen duob mme inaañ, ndin ke ayọhọ usen duob mme ition, ammọ emaeduọk adudu enyʌñ enam anye usen usọrọ ye idaara.

19 Ntak ado anam mme Yuu, e-edʌññọ ke mme esịd idʌñ, enịmme ayọhọ usen duob mme inaañ ke afiọñ Adaa nte usen idaara ye usen udia usọrọ, usen unọ emọ-emọ mme enọ.

20 Mọdekai amaawet mme ñkpọ ami anịm, ndin anye amaanọ ñwed esọk afịd mme Yuu ke mme abio Adidem Seeses, ke ñkpere ye ke anyan usʌñ, 21 adinam ammọ edia usọrọ ke isua ke isua ke ayọhọ usen duob mme inaañ ye ayọhọ usen duob mme ition ke afiọñ Adaa 22 nte ini ake mme Yuu ekenieghe ubọkkọ eto mbon usua ammọ, ñko nte afiọñ ake mfʌhọ ammọ akekappake ado idaara, ñko ntuaña ammọ akappa ado usọrọ. Anye akewet ammọ adinịm mme usen ami nte usen usọrọ ye idaara adinyʌñ nnọọ mme awo enọ ndidia ñnyʌñ nnọọ mme uweene mme enọ.

23 Ndin mme Yuu emaenyịmme adika iso nnam usọrọ ammọ emaeketọọñọ, enam afịd se Mọdekai akewet anọ ammọ. 24 Sia Haman ayịn Hamedata, awo Akak, awo usua afịd mme Yuu, amaaduak adisobo mme Yuu ñnyʌñ nsịn afia (a-adooho, usịn ukañ) nnọọ ñwuudo ammọ ye nsobo ammọ. 25 Ado idaha adidem akediọọñọke abaña ibak ami, anye amaasio ñwed ewʌhọ ate yak idiọọk ake Haman akeyemme adinam mme Yuu adodo anye ke iwuod, ñko yak ekọọñ anye ye nditọ ideen amọ ke eto. 26 (Ke ntoro ekekoot mme usen ami Purim, a-atooho ikọ pur.) Akeene afịd ñkpọ se ekewet ke ñwed ñko ye se ammọ ekekịt ye se ikitịppe inọ ammọ, 27 mme Yuu emaebiere ke idem ammọ ete ke mmimọ ye emana ke emana ye afịd mbon se idiana ye mmimọ idiitreke adinịm usen ami ke afịd isua, ke usʌñ ewʌhọ ye ke ini enịmme. 28 Ana nte afịd ubon etoiyo enyʌñ enịm usen ami ke afịd emana, ke afịd idịd ye ke afịd abio. Ndin mme Yuu idiitreke adidia usọrọ usen Purim, me eyak nọ mme usen emi ekpa ke atu nditọ ammọ.

29 Ndin Abọọñanwaan Esta, ayịn awonwaan Abihel, amaadiana ye Mọdekai awo Yuu, ewet ñwed ye ayọhọ uko adisọọñọ udiana ñwedetob atañña abaña Purim ami. 30 Ndin Mọdekai amaanọ mme ñwed esọk afịd mme Yuu ke afịd mme abio Seeses ikie keed mme edịb mme itiaba (127), etob ekọọm mfọn ye etob idọñesịd, 31 adinịm mme usen Purim ami ke ayọhọ ini amọ, naña Mọdekai awo Yuu ye Abọọñanwaan Esta emaekesọọñọ enọ ammọ, ñko naña ammọ emaekenịm enọ idem ammọ ye ubon ammọ abaña mme ini utreudia ye aseeme. 32 Ewʌhọ Esta amaasọọñọ mme mbed ami abaña Purim, ndin emaewet esịn ke ñwed.